Read Termanu BILANGAN 33 Bible Online

BILANGAN 33 - Termanu bible

BILANGAN 33

¹Hataholi Israel-la, kalua la'oela Masir boema, no Musa ma Harun hehela-nonolen, de ala la'ok tunga esa-esak leoinan, boema ala singa leme mamanak de'ubee.

²MANETUALAIN paleta Musa, fo ana sulak, ala singa mamanak-kala, na'den-nala.

³Leoina Israel-la, la'oela Masir, ndek hataholi Yahudi-la bula ka esan-na, fain sanahulu lima, fo ndia te, basa Paskah makasososak-ka, faik esa ndia so. No MANETUALAIN nasulu-nahapan, de ala la'oela kota Rameses-sa, nai leoina Masir-ra matan,

⁴fo ndia te, lakalulupu latoi-latono sila anaulun fo, MANETUALAIN taonisak-kala. No manada'dik ndia, fo MANETUALAIN fe buti, nae Ndia be'i-balakain lena heni Masir lamatua daebafak-nala.

⁵Lelek leoina Israel-la, la'oela Rameses boema, ala ofu leme Sukot.

⁶Boema, ala la'o seluk, de ala ofu leme Etam, fo nai moo solokaek-ka su'un-na.

⁷Ala la'o leme ndia mai, de ala fali ma'is leo Baal-Zefon mai, boema ala ofu deka loo Migdol.

⁸Basa boema, ala la'oela Pi-Hahirot, de ala lena tasi fo ala masok leo moo solokaek Etam-ma leu; ala la'ok faik telu boema, ala ofu leme Mara.

⁹Ala la'ok lakandoo leme ndia mai, de ala ofu leme Elim; nai ndia, hapu oemata sanahulu dua, ma ai korma hituhulu.

¹⁰Basa boema, ala la'oela Elim, de ala ofu deka loo Namo Suez-sa.

¹¹Basa boema, ala ofu leme moo solokaek Sin-na, boema neme deka no Dofka, basa ndia boema, neme Alus, de basa boema neme Rafidim, tehu oe nininuk ta ndia.

¹⁵Ala la'o leme Rafidim mai, de lakano leo Letek Hor-ra leu, de ala ofu leme mamanak-kala nde ia: moo solokaek Sinai, Kibrot-Taawa “Loo-lates Tenepetak”, Hazerot, Ritma, Rimon-Peres, Libna, Risa, Kehelata, Letek Syafer-ra, Harada, Makhelot, Tahat, Tarah, Mitka, Hasmona, Moserot, Bene-Yaakan, Hor-Gidgad, Yotbata, Abrona, Ezion-Geber, moo solokaek Zin, ma Letek Hor-ra, fo nai dae Edom-ma, dae toon-na.

³⁸ No MANETUALAIN paletan-na, de Imam Harun-na kae leo Letek Hor-ra lain neu. Boema maten neme ndia, fo la'e hataholi Yahudi-la bula ka liman-na, fain esa, fo ndia te, hataholi Yahudi-la la'oela Masir, teuk haahulu ndia so. Lelek Harun maten ndia te, teun natun esa duahulu telu.

⁴⁰ Ndia te, nusa Arad-ta manen-na, fo nai Dae Negeb-pa, nai Kanaan Kona, ana hapu halak, nae hataholi Israel-la leu leo nusan-na leu.

⁴¹Nai hataholi Israel-la leleo-lala'on leme Letek Hor-ra leo masadokek Moab-pa, ala ofu leme mamanak-kala nde ia: Zalmona, Funon, Obot, ndendefak Abarim-ma, nai nusa Moab-pa, Dibon-Gad, Almon-Diblataim, Letek Abarim-ma, fo deka no Letek Nebo-a, ma masadokek Moab-pa nai Lee Yarden-na su'un-na, fo deka no kota Yerikho-a, fo nai Bet-Yesimot no Bafak Sitim-ma tala'da.

⁵⁰Nai masadokek Moab ndia, fo nai Lee Yarden-na su'un-na, deka no kota Yerikho-a, MANETUALAIN fe Musa

⁵¹paleta ia-la, fo Musa fen neu leoina Israel-la nae, “Metema, emi lena Lee Yarden-na, fo masok leo nusa Kanaan-na soona,

⁵²emi muse usi heni nusak ndia, laun-nala lala'en-na. Taom-makalulutuk la'iesak sila sosongo-tatangon, fo ala taon neme batu ma liti-a mai, boema sila mamana sosongo-tatangon-nala.

⁵³Emi muse loso-ma dae ndia, fo mangatuu-man, nanahu Au fe nusak ndia neu emi.

⁵⁴ Basa soona, baba'en neu emi leo-ingum-mala nenik tu'u batu, fo ala taon da'di sila pusakan. Emi muse fe leo-ingu matua-la, baba'en-na matua, ma leo-ingu anak-kala, baba'en-na anak-ka.

⁵⁵Tehu metema, emi ta usi heni nusak ndia laun-nala fa soona, hataholi manaleo lahele manai sila-la, neukose ala tao susa emi, sama leo solokaek-ka nai emi matam-ma, do nggauk-ka nai emi eim-ma. Mahani te, sila nde latee-latati loo emi-a.

⁵⁶Metema emi ta usi heni fas soona, neukose Au tao amopo-amate emi, sama leo Au tutu'un soaneu sila.”