Read Termanu BILANGAN 34 Bible Online

BILANGAN 34 - Termanu bible

BILANGAN 34

¹MANETUALAIN fe Musa

²paleta ia-la, fo ana fen neu leoina Israel-la nae, “Ba'ihanak seluk bai te, emi masok leo nusa Kanaan, fo Au fen neu emi, da'di leo dae pusaka. Emi nusam ndia, too-lanen nde ia.

³Too kona, mulai neme moo solokaek Zin-na, fo nakandoo leo Edom neu. Too dulu, mulai neme Tasi Mates-sa pe'dan kona,

⁴fo ana dilu leo kona neu, fo leo Enok Akrabim-ma neu, de nakandoo leo Zin, losa Kades-Barnea fo nai kona. Soona ana dilu neme ndia mai, fo ana leo muli neu, fo ana losa Hazar-Adar, fo nakandoo leo Azmon neu.

⁵Soona ana dilu neme ndia leo bafak manai Masir dae toon-na, fo nate'e nai Tasi Tala'dak.

⁶Emi nusam-ma, dae toon muli nde Tasi Tala'dak.

⁷Too kii, mulai neme Tasi Tala'dak leo Letek Hor-ra neu,

⁸neme ndia mai fo ana leo Enok Hamat-ta neu, fo nakandoo leo Zedad neu,

⁹soona nakandoo leo Zifron neu, de nate'e nai Hazar-Enan.

¹⁰Too dulu, mulai neme Hazar-Enan, fo leo Sefam neu.

¹¹Boema ana kona neme ndia leo Ribla neu, fo nai Ain boboan dulu, boema nakandoo leo pupukuk manai Dano Galilea su'un dulu,

¹²boema ana leo kona neu, fo ana su'di Lee Yarden-na nanalun-na, losa Tasi Mates-sa. Emi nusam-ma too-lanen manai boboa-kaisun nde ndia.”

¹³ Musa nafa'da nggileo-bobongik Israel-la nae, “Dae ndia nde neukose emi sipon nenik tu'u batu, fo nde dae fo, tunga MANETUALAIN paletan-na, de muse nanababa'ek neu leoina Israel-la, leon sio seselik.

¹⁴Leo Ruben ma leo Gad-ta, boema leo Manasye seli, ala sipo-la sila baba'en-na so, de dae ndia nanababa'e basak neu sila teidale-bobongin-nala so.

¹⁵Sila dae pusakan-na, nai Lee Yarden-na boboan dulu, fo deka no kota Yerikho-a.”

¹⁶MANETUALAIN nafa'da Musa nae,

¹⁷“Hataholi fo muse baba'e fe emi dae ndia nde been-na, Imam Eleazar-ra, ma Yosua, fo Nun anan-na.

¹⁸Matu'du hataholi esa, neme leo-la esa-esak mai boe, fo ala fali Eleazar no Yosua nai dae ndia baba'en-na.”

¹⁹Hataholi sila-la na'den-nala nde ia: [Leo] — [Mauli-malangan] Yuda — Kaleb, fo Yefune anan-na Simeon — Semuel, fo Amihud anan-na Benyamin — Elidad, fo Kislon anan-na Dan — Buki, fo Yogli anan-na Manasye — Haniel, fo Efod anan-na Efraim — Kemuel, fo Siftan anan-na Zebulon — Elisafan, fo Parnah anan-na Isakhar — Paltiel, fo Azan anan-na Asyer — Ahihud, fo Selomi anan-na Naftali — Pedael, fo Amihud anan-na

²⁹Hataholi sila-la, nde MANETUALAIN paletas, fo ala baba'e dae pusaka neu leoina Israel-la, nai nusa Kanaan-na.