Read Termanu BILANGAN 6 Bible Online

BILANGAN 6 - Termanu bible

BILANGAN 6

¹MANETUALAIN nadenu Musa

²fe nakanenetek ia-la neu hataholi Israel-la. Metema touk esa do inak esa, ana fe nasar, soaneu naso'da hehelik ba'eneu MANETUALAIN, da'di leo nazir esa soona,

³ ta bole ninu angol ma ala-lalu fa. Ta bole ninu ala-lalu matak leo beek fo taon neme angol-la boan-na, do ai boa fe'ek-kala mai. Ta bole na'a angol boa mamatak do tuuk fa, do su'di beek fo taon neme ai angol-la mai; ta bole na'a de'en-na do pe'dun-na boen.

⁵Nai faik-faik fo ana be fe nasar-ra, ana ta bole nggute langadoon-na, do nggeu nggolomein-na fa. Nai lelek ndia, muse namaa langadoon-na, ma nggolomein-na, nemen-na fo lamanalu. Hataholi ndia nanapa'ak no ndia nasar-na, losa basa tepo lelek, fo ana fe hehelik aoinan-na neu MANETUALAIN.

⁶Langadoon ndia, nalupa ta'du-tana nae ndia nanafe hehelik ba'eneu Manetualain. Nai lelek ana fe nazar-na, ana ta bole tao nanggenggeo aoinan-na fa; ana ta bole deka mamates fa, leomae mamates ndia nde been-na, ndia aman, do ndia inan, do ndia tolanoon boe.

⁸Nai lelek ana da'di hataholi nazir, ndia nde been-na hataholi hehelik soaneu MANETUALAIN.

⁹Metema hataholi nazir esa, ana fe hehelik langadoon-na so, boema langadoon-na nanggenggeo nanahu ana deka hataholi fo maten no kaiboik, soona ana muse nahani faik hitu dalen-na; basa ndia soona, muse ana ngguteheni langadoon-na, ma nggolomein-na, fo besak-ka ana da'di malalaok.

¹⁰Neu faik-ka falun-na, muse neni manupui kalua dua, do kateu dua leo imam-ma nai lelesu manai MANETUALAIN Lalaa Teman-na.

¹¹Imam-ma muse tunu-hotu manupui esa, soaneu tutunu-hohotuk fo sala-singok hapu do'o do ampon, ma manupui esak-ka soaneu tutunu-hohotu nanatunuk, fo tao namopo manggenggeon-na. Nai faik ndia boe, muse ana fe hehelik langadoon-na neu MANETUALAIN,

¹²ma ana tao nabebeu aoinan-na da'di leo hataholi nazir. Ta leke fai-fai maneuk-kala so'on, nanahu ana da'di nanggenggeo so. Muse ana tunu-hotu bi'ilopoana esa, besak-ka teuk esa, da'di leo tutunu-hohotu bae hutak.

¹³ Metema hataholi nazir esa basa fai nasar-na soona, muse ana tao feta ia. Muse no hataholi ndia, leo MANETUALAIN Lalaa Teman-na lelesun-na neu,

¹⁴ma neni fe MANETUALAIN bana telu, ta mana lu'u-la'ak fa: bi'ilopo maneanak esa, besak-ka teuk esa, soaneu tutunu-hohotu nanatunuk, bi'ilopo tenaanak esa, besak-ka teuk esa, soaneu tutunu-hohotuk fo sala-singok hapu do'o do ampon, ma bi'ilopo mane esa, soaneu tutunu-hohotu mole-dame.

¹⁵Boeo, muse ana tunu-hotu loti ta pake laluteik lepeneu esa, fo nde loti bobongok, fo taon neme ha'desopu nanasese'dok mina setun, ma koki ni'ianak, fo nanalosek nenik mina setun. Fe'ek neme ndia mai, muse ana tunu-hotu tutunu-hohotu nana'ak ma tutunu-hohotu nininuk boe.

¹⁶Imam-ma muse neni basa sila-la leo MANETUALAIN matan-na neu, boema ana tunu-hotu tutunu-hohotuk fo sala-singok hapu do'o do ampon, ma tutunu-hohotu nanatunuk.

¹⁷Muse ana tunu-hotu fe MANETUALAIN, bi'ilopo mane ndia sama-sama no loti lepeneu kisak ndia, da'di leo tutunu-hohotu mole-dame. Boeo muse ana tunu-hotu fe MANETUALAIN, tutunu-hohotu nana'ak, ma tutunu-hohotu nininuk sila la.

¹⁸Hataholi nazir ndia, muse nggeuheni langadoon-na nai MANETUALAIN Lalaa Teman-na lelesun-na, fo tu'u langadook ndia leo ha'i manapilak manai tutunu-hohotu mole-dame ndia dalek neu.

¹⁹Basa ndia soona, metema bi'ilopo mane ndia eialun-na namatasa soona, imam-ma muse ho'i-nan sama-sama no loti bobongok esa, ma koki ni'ianak esa, ho'in neme lepeneu ndia dalek mai, fo ana pe'das leo hataholi nazir ndia liman dale neu.

²⁰Boema imam-ma, muse natu'du nana'ak sila-la, da'di leo fee-fee hehelik neu MANETUALAIN; ndia nde been-na, baba'e malalao-malalafuk, fo imam-ma baba'en-na nde ndia, baba'ek ndia fe'ek neme bi'ilopo mane-a tenen-na, ma sakibolon-na, fo tunga nakanenetek-ka soona, imam-ma baba'en-na nde ndia so. Basa ndia soona, besak-ka hataholi nazir ndia, bole ninu angol.

²¹Ndia nde nakanenetek soaneu hataholi nazir-ra; tehu metema hataholi nazir esa naheluk fe tutunu-hohotuk fo lena neme nazar-na mai soona, muse ana tao natetun nandaa no hata fo ana helun ndia.

²²MANETUALAIN nadenu Musa

²³nafa'da Harun no anan-nala, nae ala muse kokolak dede'a-kokolak ia-la, nai lelek ala fe leoina Israel-la baba'e-papalak. Nae leo ia:

²⁴Ela leo been-na, MANETUALAIN ba'e-pala, ma nakaboboi emi.

²⁵Ela leo been-na, MANETUALAIN dalen-na malole neu emi, ma Ana ta mali emi fa.

²⁶Ela leo been-na, MANETUALAIN sue-lai emi, ma Ana fe emi mole-dame.

²⁷Ma MANETUALAIN nafa'da nae, “Metema ala kokolak Au na'deng-nga da'di leo baba'e-papalak neu leoina Israel-la soona, neukose Au ba'e-palas.”