Read Termanu BILANGAN 7 Bible Online

BILANGAN 7 - Termanu bible

BILANGAN 7

¹Nai lelek Musa napadedeik basa MANETUALAIN Lalaa Teman-na boema, nakatema Lalaa Temak ndia no basa hata-heton lala'en-na, nenik ana lose mina feta neu basa-basan. Ana tao leondiak boe, neu mei tunu-hotuk-ka, no basa hata-heton lala'en-na.

²Boema basa lasi-lasi Israel fo nde basa maneleo fo manamete-lakanae, nai lelek leke hataholi Israel-la dede'un-na,

³ala tunu-hotu fe MANETUALAIN, gelobak 6, ma sapi sanahulu dua: fo lasik dua soona, ala fe galobak esa, ma lasik esan-na, fe sapi esa. Ala tunu-hotu basan boema,

⁴MANETUALAIN nafa'da Musa nae,

⁵“Sipom-ma tunu-hotuk sila-la, fo ndolo Au Lalaa Temang-nga soona, pakes; fe basa tunu-hotuk sila-la leo hataholi Lewi-la neu, nanahu nandaa no sila bela-ba'un.”

⁶Boema Musa fe pedati-la loo sapi sila-la leo hataholi Lewi-la neu.

⁷Ana fe pedati dua ma sapi haa leo hataholi Gerson-nala,

⁸pedati haa ma sapi falu leo hataholi Merari-la, nandaa no bela-ba'uk fo ala tao-no'in, fo Imam Harun-na anan Itamar, nde nauli-nalangas-sala.

⁹Tehu, Musa ta fe hataholi Kehat-tala gelobak do sapi fa, nana ala muse lu'a bua-lo'as malalao-malalafuk, fo ala mete-lakanaes-sala.

¹⁰Basa lasi-lasik-kala leni tunu-hotuk soaneu tao feta nakatema mei tunu-hotuk-ka. Lelek laheheleaon basa fo leni sila tunu-hotun leo mei tunu-hotuk-ka matan-na neu boema,

¹¹MANETUALAIN nafa'da Musa nae, “Mafa'das mae nai fai 12 dalen-na, tunga faik, mauli-malangan sila-la, esa muse tunu-hotu tutunu-hohotun, soaneu feta nakatema mei tunu-hotuk-ka.”

¹²Esa-esak neni tunu-hotun tunga baba'ek-ka nde ia: [Faik] — [Leo] — [Mauli-malangan] Fai ka esa — Yehuda — Nahason, fo Aminadab anan-na. Fai ka dua — Isakhar — Netaneel, fo Zuar anan-na. Fai ka telu — Zebulon — Eliab, fo Helon anan-na Fai ka 4 — Ruben — Elizur, fo Syedeur anan-na Fai ka 5 — Simeon — Selumiel, fo Zurisyadai anan-na Fai ka 6 — Gad — Elyasaf, fo Rehuel anan-na Fai ka 7 — Efraim — Elisama, fo Amihud anan-na Fai ka 8 — Manasye — Gamaliel, fo Pedazur anan-na Fai ka 9 — Benyamin — Abidan, fo Gideoni anan-na Fai ka 10 — Dan — Ahiezer fo Amisyadai anan-na Fai ka 11 — Asyer — Pagiel, fo Okhran anan-na Fai ka 12 — Naftali — Ahira, fo Enan anan-na Sila esa-esak tunu-hotun nde been-na matak esa, fo nde pinga lilofulak maloa esa, belan-na kilo esa seselik, ma bokol lilofulak esa, belan-na gram natun falu, tunga tatais fo nanapakek nai MANETUALAIN Lalaa Teman-na. Mamanak ka duak sila-la, nanapo'a nahenuk ne(...)

⁸⁴Mauli-malangan ka sanahulu duak-kala leni tunu-hotuk fo soaneu mei tunu-hotuk ndia nakateman-na, basa-basan lala'en-na: — pinga lilofulak maloa sanahulu dua, ma bokol lilofulak sanahulu dua, fo basa-basan lala'en-na, belan-na kilo duahulu hitu gram natun nee — pinga lilopilas maloa sanahulu dua, de basa-basan lala'en-na, belan-na kilo esa gram natun telu duahulu, henuk no boomenik — sapi mane sanahulu dua, bi'ilopo mane sanahulu dua, ma bi'ilopoana sanahulu dua, besak-ka teuk beke esak, sama-sama no tutunu-hohotu nana'ak-ka, fo da'di leo tatamak neu tutunu-hohotu nanatunuk-ka — bi'ihiik sanahulu dua, soaneu tutunu-hohotuk fo sala-singok hapu do'o do ampon — sapi mane duahulu haa, bi'ilopo mane neehulu, bi'ihiik neehulu, ma bi'ilopoana neehulu, besak-ka teuk beke esak, soaneu tutunu-hohotu mole-dame.

⁸⁹Metema Musa neu leo MANETUALAIN Lalaa Teman dale neu, fo ana kokolak no MANETUALAIN soona, namanene MANETUALAIN kokolak non neme Peti Hehelu-balataak-ka tatanan lain mai, fo Peti Hehelu-balataak ndia, nai mahahae nusa so'da ka duak-kala dodoki-dudulan tala'da.