Read Termanu MIKHA 1 Bible Online

MIKHA 1 - Termanu bible

MIKHA 1

¹ Mikha neme kota anak esa na'de Moresyet. Nai lelek Manek Yotam, Ahas ma Hizkia ala paleta beiko nai nusa Yehuda. Mikha sipo MANETUALAIN hala-hehelun la'eneu Samaria ma Yerusalem.

²Mamanene leon, hai leoina-la lemin! Taoafik leon, hai laun manai daebafak-ka lala'en-na lemin! MANETUALAIN Fo Mademaina mai, da'dileo sakasii, fo la'ban emi basa-basam-mala! Mamanenen Ana kokolak neme Uma malalao-malalafun-na nai nusa so'dak-ka.

³Ana kona neme mamana leleo malalao-malalafun mai de Ana la'ok nai lete-letek manai daebafak-ka poin-na.

⁴Letek-kala noe henis nai ei tata'bu daen-na sama leo lilik-ka nai ha'i manapilak dale; daen-na ndefa, de ana tu'da leo bafak-kala dalek neu, sama leo oe faa neme pupukuk lain leo dae neu.

⁵Neukose basa sila-la ala da'di, nanahu hataholi Israel-la lasala-lasingo, ma ala la'ban Manetualain. See kande, tao-na Israel nasala-nasingo? Ade, ta hu Samaria kotainan-na fa do? See kande, tao-na Yehuda sene-do'ok neu songo-tangok? Ade, ta hu Yerusalem fa do?

⁶Hu ndia de, MANETUALAIN nafa'da nae, “Neukose, Au tao Samaria da'di ai-batu madodouk nai mook-ka, ma mamanak fo hataholi-a sele ai angol. Neukose Au tu'u kota ndia dae bubua manandefan-na leo bafak dale neu, ma Au ofe heni kota ndia uma laten-na.

⁷Neukose Au akalulutuk dodoki-dudula kabeli inan-nala, ma neukose Au hotu heni basa ala fe bua-lo'as neu ina-inak fo lalalau-laoono nai uma sosongok-ka, boema neukose Au tao amopo-amate sosongo-tatangon lala'en-na. Bua-lo'as sila-la nde been-na, buna-baok neme sila huhule-haladoin neu lamatua daebafak fo manafe dae-oe naisi-namina. Besak ia, neukose musu ho'i neni basa sila-la, fo loke makasi neu sila lamatua daebafan-nala.”

⁸Hu ndia de Au, Mikha, daleng-nga he'dis-sa, ma haladoi. Neukose au la'ok no makaholak ma ta pake ta'bueis fa, soaneu atu'du ae, au daleng-nga he'dis-sa nanseli. Neukose au nggo sama leo busa fui-a, ma dola sama leo manupui onta.

⁹Nana Samaria bisun-nala ta hapu hai fa, ma neukose ua-nalek fo sama, tuni-ndeni-na Yehuda. Susa-soe losa Yerusalem, fo au leoinang-nga dae-oen lelesuinan-na so.

¹⁰Boso mafa'da ita musun-nala lai Gat, la'eneu ita susa-soen; boso fes lita emi kii. Hai laun Bet-Le-Afra-la, lololi nai afu dale, fo da'dileo ta'du-tana ketu namahehenak!

¹¹Emi laun Safir-ra, la'o no makaholak, ma bibii-mamaek leo mamana tu'u-tapak neu! Hataholi Zaanan-nala, ta lapalani kalua leme sila kotan-na mai fa. Laun Bet-Haezel-la, honggu'un natu'du emi nae nai naa, ta hapu nasulu-nahapak so'on.

¹²Susa-soe neme MANETUALAIN mai, ana losa nai Yerusalem lelesuinan-na so! Hu ndia de, hataholi Marot-tala, ta bisa lamahena tutulu-fafalik so'on.

¹³Emi fo laun Lakhis-sala, pa'a ndala neu kaleta natee-natatik-ka leona! Emi na'da-ma Israel tao sala-singok-ka, nalosa ana tao-na Yerusalem nasala-nasingo boe.

¹⁴Besak ia, hai hataholi Yehuda la lemin, neukose emi mamopo kota Moresyet-Gat. Neukose Israel manen-nala, ta hapu tutulu-fafalik neme kota Akhzib-ba mai so'on.

¹⁵Hai hataholi Maresya-la lemin, neukose MANETUALAIN fe emi leo musu fo ana sanga paleta emi kotam-ma. Neukose mauli-malanga Israel fo manakoasa-la, ala ke'ke lai lea-leak manai Adulam-ma dalek.

¹⁶Hai hataholi Yehuda-la lemin, nggute heni emi langadoom-ma, fo da'dileo ta'du-tana manafaluk, ba'eneu emi anam fo emi sue-laik-kala. Nggeu heni emi langadoom-ma losa dilak, sama leo manupui mana'a popolak-ka, nana neukose emi anam-mala, nanafook leo mamana tu'u-tapak neu.