Read Termanu MIKHA 2 Bible Online

MIKHA 2 - Termanu bible

MIKHA 2

¹Soe ba'eneu hataholi fo ana tutu'u eno mangalauk, nai lelek fai la'odaen-na nangape'uk nai pepe'uk lain, boema ana taon nai fai fafain-na, nanahu lanuu be'i-balakaik soaneu ala tao-no'i tatao-nono'ik ndia.

²Metema lahiik tina esa soona, ala loso-lan. Metema lahiik uma esa soona, ala leo-lan tutik. Nau hata-heto do uma isi la, ta hapu nee-nee lino-linok fa.

³Hu ndia de, MANETUALAIN nafa'da nae, “Au tutu'u susa-soe neu emi, nalosa emi ta hapu maladeak fa. Nai fai soe ndia, neukose emi ta hapu la'ok no koao-ndaeaok so'on.

⁴Neukose hataholi pake emi ua-nalem da'dileo dede'a holo, ma neukose ala tao nakamee fafaluk-ka nde ia: ‘MANETUALAIN loso-na ami nusam ia so de Ana fen neu hataholi fo manafoo neni ami-a. Ami lutu-lutu makandondook so.’ ”

⁵Hu ndia de, metema losa fain fo fe falik nusak ndia leo MANETUALAIN, anan-nala neu soona, neukose ta hapu hataholi esa boen neme emi mai, sipo baba'en-na fa.

⁶Hataholi manatui-benga fe au-a, nafa'da nae, “Boso tui-benga fe ami. Boso tui-benga la'eneu basa sila-la. Te neukose ami ta hapu mamaek fa.

⁷Boso maedaenga, MANETUALAIN supa-soo basa hataholi Israel-la so! Neukose MANETUALAIN ta tao dede'ak leondiak-ka fa. Beita la'iesa fo mopo dudu'a-aafi manalun-na fa. Ade, Ana ta kokolak no mangana'uk neu hataholi fo manatao dede'a ndoos-sa fa do?”

⁸MANETUALAIN nataa nae, “Emi sama leo musu-a, de emi nde sapu-ma, Au anang-ngala. Hataholi-a fali ma'in neme natee-natatik dale mai no namahehenak, neukose ana hapu nee-nee lino-linok nai uman, te se'kona nakalenak emi mahani memak nai naa, fo loso-ma uman-na.

⁹Emi usi heni inak manai Au anang-ngala dalek, neme uma susuen-na mai, ma emi loso-ma baba'e-papalak fo Au fen neu anang-ngala losa dodoon-na.

¹⁰Fo'a fo la'o leona; te nai ia ta nee-nee lino-lino so'on. Emi sala-singom neni susa-soe maneni bibii-namata'uk-ka, nai mamanak ia so.

¹¹Emi mahiik nabi fo ana nau nasapepeko-nasandandali ma tipu-dai, boema ana bubuluk hata fo neukose ana da'di nae, neukose emi manuu angol ma ala-lalu sasi kao-kao.”

¹²MANETUALAIN nafa'da seluk nae, “Hai hataholi Israel fo bei elak-kala lemin! Neukose tao leo bee-o, Au tao akabubua emi, fo Au tao-a emi da'di esa, sama leo bi'ilopo-a fali leo lalaen-na neu. Sama leo mook fo henuk no bi'ilopo-a, leondiak boe emi nusam-ma, neukose henu seluk-kana no hataholi makadotok.

¹³Neukose Au soi enok-ka, fo Au o emi kalua meme mamana tu'u-tapak mai. Neukose emi hona malulutuk lelesuina-la fo emi la'o no pe'daom. Au, MANETUALAIN mesak-kana nde emi Manem, ma neukose Au hela-nole emi fo emi kalua.”