Read Termanu MIKHA 3 Bible Online

MIKHA 3 - Termanu bible

MIKHA 3

¹Mamanene leon hai emi fo manakoasa Israel-la lemin! Tunga ndoon-na, emi bubuluk ndoos ma matetuk-ka,

²tehu nakalenak emi ta mahiik hata fo malole fa, te emi mahiik hata fo mangalauk. Au leoinang-nga bei maso'dak, tehu emi ali heni loun-na, ma emi sii-sii isin-na neme duin-na mai.

³Emi mi'a au leoinang-nga. Emi sii-sii loun-na, ma emi tao makalulutuk duin-na. Emi kee-kees sama leo kee-kee paa, fo taon leo ulek dae dale neu.

⁴Neukose fain-na losa, emi nggasi moke tutulu-fafalik neu MANETUALAIN, tehu Ana ta nau nataa fa. Neukose Ana ta namanene emi huhule-haladoim fa, nanahu emi tao tatao-nono'i mangalauk so.

⁵Nabi-nabi fo lafa'da memak hata fo malole neu hataholi manafes doik-ka, ala ke'di-ndiu Au leoinang-nga, tehu ala tao musu ma ala heheta-aa'i hataholi manafe taak-kala. MANETUALAIN nafa'da nabi-nabi leo silak-ka nae,

⁶“Hai nabi, emi faim-ma, hihii nae basan so; emi le'dom-ma sanga tenak so. Neukose emi ta hapu seluk ninitak fo nafa'da Au dale tutu'ung-ngala so'on. Neukose emi ta hapu mafa'da memak hata-hata so'on.”

⁷Hataholi-hataholi fo lafa'da memak fai manamaik-ka nenini na, neukose ala hapu mamaek, nanahu lafa'da memak-ka, ta la'e fan. Mopo basa-basas mata-panan, nanahu Manetualain ta nataa fas.

⁸Tehu la'eneu au aoinang ia soona, MANETUALAIN tao duladalen ma koasan-na nai dalek. Ana fe au malelak la'eneu ndoos ma matetuk, ma napalanik boe, fo au afa'da hataholi Israel-la tao basa sala-singok-kala so.

⁹Mamanene au hala-kokolang ia-la leon, hai emi manakoasa Israel fo ta hii ndoos ma matetuk-ka ma manapo'de nasafali ndoos-sa.

¹⁰Emi mafofo'a Yerusalem, fo Manetualain kotan-na, nenik kanisak ma ta tunga ndoos ma matetuk-ka fa.

¹¹Manakoasa kota-la paleta soaneu ala hapu doi sosolok, imam-mala lanoli MANETUALAIN hoholo-lalanen soaneu hapu ngga'di, ma nabi-la loke natutu'duk neme Manetualain mai fo hapu doik — boema sila basa-basas lae daenga MANETUALAIN nok sila. Lafa'da lae, “MANETUALAIN nai ita tala'da heon; neukose susa-soe ta tuni-ndeni la'e ita fa.”

¹² Hu kande emi tatao-nono'i mangalaum ndia, de neukose lakauuk Sion sama leo hadeoe, neukose Yerusalem da'di ai-batu madodouk, ma pupukuk fo MANETUALAIN Uman-na, neukose ana da'di nula na'u-aiana.