Read Termanu NAHUM 2 Bible Online

NAHUM 2 - Termanu bible

NAHUM 2

¹Hai Niniwe, mamanene leona! Hataholi fo ana nau tao nalutu o-a, ana mai so! Manea o kota musu mala! Manea enok-kala! Maheheleaom fo matee-mata'ti. (

²Tete'ek-ka, neukose MANETUALAIN tao falik Israel matua-mademan, fo ela ana da'di sama leo makahulun-na, fo nai lelek musun-nala beita bonga uman-nala fa.)

³Musu-a babaa fanan-na dula pila, ma bua papake musun-nala leo daak-ka. Musu-a naheheleaon basa soaneu ana sapu. Kaleta besin-na mangadilak sama leo ha'i-a. Basa ndalan-nala lakaboboku.

⁴Kaletan-nala tutulumatak no lai-laik nai enok-kala lain. Esa usi esa nai moo maloa. Meten soona, sama leo obol manapila lo'a-lo'ak-ka, lausik lakamiu sama leo ndelas-sa.

⁵Laloo basa malanga solda'dun-nala fo tutulumatak, lakatunu kose-kose, nai lelek ala sapu. Ala la'ok lai-lai leo kota ndia papala nanadaman-na leu. No lai-laik, lapadedeik besi manahona nakalulutuk-ka.

⁶Faa neni te'te lee lala'en-na so boema nakalupuk-ka nai uma manek-ka lala'en-na!

⁷Musu ho'un-na Ina Manek-ka, de anafe'oana malalau-maoonon-nala lakadii-lakau ma ala kii-makaleleu, ala haladoi sama leo manupui kalua, ma ala babapa fanan-nala nanahu ala susa.

⁸Laun manai Niniwe-la lalai tapasasala, sama leo nalutu te'te-a, de oen-na kalua. Halak-ka nggasi-ma nae, “Mate'e, mate'e!” Tehu ta hapu manafalik fa.

⁹Loso-ma la'iesak lilopila lilofulan! Hata-heto manai kota ia, tete'ek-ka ana sasi kao-kao!

¹⁰Niniwe lutu-lutu so, ana da'di mamana nees ma na'u-aiana, ta moli nai ndia so'on. Hu kande, bibii-namata'uk-ka de laun-na dalen-nala makasufu. Lungulangak-ka nakamate ma dele ngge'be-ngge'be. Basa hataholi-la mata panan-nala befula.

¹¹Besak ia, kota ndia nai bee? Kota fo sama leo leak-ka, fo singa mamana leleon-na. Mamanak fo ala fe singa ana-la la'a, mamanak fo singa mane no singa ina lahiik-kana, mamana neulauk ba'eneu anan-nala?

¹²Makahulun-na, singa kaan-na, nana'an-na nai ndia, de ana sisii fen neu singa ina no anan. Ana tao nahenu ndunun-na nenik paa bibiak fo ana kaa nalak-kala.

¹³MANETUALAIN Fo Manakoasa nafa'da nae, “O musum-ma nde Au ia. Neukose Au hotu heni o kaletam-mala. Neukose mate o solda'dum-mala nai musu dale, ma neukose Au ho'i-a basa hata fo o ho'i malas leme hataholi fe'ek-kala mai. Neukose ta lamanene o hataholi nadedenum-mala hala nonoken-nala so'on.”