Read Termanu NAHUM 3 Bible Online

NAHUM 3 - Termanu bible

NAHUM 3

¹Soe ba'eneu kota ia, fo henuk no masapepeko-masandandalik ma kanisak; henuk no bua-lo'a naseti-nalakak, do bua-lo'a namoak.

²Nenene ue-a liin-na ma kaleta ei liin-na, ndala malaik-ka ei ndu'un-na, ma kaleta lulu-tatan.

³Solda'du manasa'e ndala-la, ala sapu no tene henuk, no tafaina mangale'dok ma tee isi mangadilak. Ta leke-nala hataholi mates-sala fa, popolan-nala ladou-dou, de hataholi-la lakatunu.

⁴Niniwe nanahukuk sama leo manasosoa-piaok-ka. Mata makee tuan-na tao-na hataholi-a matan-na fo'a, Ana suangi-na leoina ba'uk-ka so, ma ana fufu'di-oo'dos nenik fufu'di-oo'do makee-maminan-na.

⁵MANETUALAIN Fo Manakoasa, nafa'da nae, “Hai Niniwe, neukose Au fepa-li'u o! Au o'du akaholak o nai leoina-la matan, fo lita o tatao-nono'im fo maneni mamaek-ka.

⁶Au tao o da'dileo bua-lo'a nanamaluak, Au tapa heni o moo kadafuk-ka; Au tao o da'di buas, fo lanilun.

⁷Hataholi manita o neukose a nadook aoinan-na, ma nafa'da nae, ‘Niniwe da'di ai batu madodouk so! See kande susa sama-sama noon? Ta hapu hataholi nau kokoe-nanasi fan.’ ”

⁸Hai Niniwe, masa bole o malole lena Tebe, fo nusa Masir-ra polon-na? Tebe boeo nai lee su'un-na, fo nde lee manamasulu-mahapan da'dileo kota musun-na. Hei, Lee Nil ndia nde kota musun-na.

⁹Tebe paleta Sudan ma Masir, ma koasan-na too-lanen ta. Ndia tia-lain nde Libia ma Put.

¹⁰Leomae leondiak boe, laun Tebe-la, nanafook de los leo mamana tu'u-tapak neu. Anan-nala nanafepa-popokok losa mates, nai basa eno kaba'ek-kala. Hataholi matua-mademan-nala nanalangek, de ala baba'es neu hataholi manaho'u nalas-sala.

¹¹Hai Niniwe, neukose o boeo sapala'o, nanahu mamafuk-ka. Neukose o boeo sanga enok, fo daenga o mala o musum-mala deak.

¹²Basa o kota musum lala'en-na, neukose da'dileo ai kaak-ka, henuk no ai boa latuk. Metema nggenggengok huun-na soona, neukose boan-na tu'da leo hataholi fo nahiik na'an-na, bafan dale neu.

¹³O solda'du mala ndole-ndaku, sama leo inak-ka, ma o nusam-ma nasasalematak no musu-a soona, mopo be'i-balakain. Neukose ha'i na'a heni o lelesuinam-mala ai betubalan-nala.

¹⁴Ka'da aso oe fo sadia, nai lelek lakahapi-la o, ma tao matea-mahele o kota musum-mala! Aa'i tane fo tao batu bata, ma sadia mamana cetak batu!

¹⁵O tao su'di beek boe, neukose palsuma la'iesak-kana, nana tao leo bee-o, neukose ha'i na'a heni o, do o mate nai natee-natatik dale. Neukose mopok o, sama leo lamak-kala la'a heni tina-osi buna-boan. O mamade'u sama leo lamak-ka so!

¹⁶O hataholi manadangam-mala dede'un-na lena heni nduuk manai lalai-a! Tehu besak ia, mopok-kasa, sama leo lamak-ka lofa li'dan-na, boema ana laa fo mopon.

¹⁷O hataholi matua-mademam, ma manapaletam-mala, sama leo lama bubuak fo ala sulu nai papala nanadamak-kala lain, nai lelek ala makaleni. Tehu le'do tii soona, no lai-laik ala laa fo mopok-kasa. Hataholi esa boen, ta bubuluk ala laa leo bee leu fa.

¹⁸Hai nusa Asyur-ra manen-nala lemin! Mate basa o gobelnom-mala so, ma basa o bupatim-la sungu losa dodoon-na. O laum-mala tapasasala nai letelepak-kala, de ta hapu hataholi esa boen no falik-kasa fa.

¹⁹O makahinam-ma, ta hapu puli-namo'do fan, ma o bisum-mala ta hapu hai fa. Basa hataholi fo lamanene halak la'eneu o nakalulutum-ma, ala totoko liman-nala nana lamahoko. Nana basa hataholi-la doi-doso, hu kande o tatao-nono'i mangalaum fo ta hapu mate'e-mahanin ndia fa.