Read Termanu HABAKUK 3 Bible Online

HABAKUK 3 - Termanu bible

HABAKUK 3

¹Nabi Habakuk-ka huhule-haladoin nde ia:

²Ou MANETUALAIN, au amanene la'eneu O tatao-nono'im boema, au ame'da nai au daleng dale, henuk no malela ka. Sa'di leo been-na, O tao la'iesa seluk, tatao-nono'i matuaina ndia. Ma O mafa'dan nai ami tepo-lelem ia. Ela leo been-na, O sue-lai ami, leomae O dalem-ma namahana loo-loo.

³O Manetualain Fo Malalao-malalafuk nanseli, mai neme Téman mai O mai meme letelepa Paran mai. O matua-mademam poti-na lalai; daebafak-ka henuk no kokoa-kikiok ba'eneu O.

⁴O mai no mandela-masa'ak, mandela-masa'ak-ka kalua neme O limam-ma mai, O mafuni O koasam-ma nai ndia.

⁵O madenu he'di-laus la'ok nai matam-ma ma mamates-sa tunga O deam-ma.

⁶Metema O hahae soona, daebafak-ka dele. Metema O mete soona, leoina-la lakalupu-lakasee. Lete matea-mahelek-kala hea ba'es, pupukuk fo namadema neme doon losa doon-na boeo, ala kaba'o, nai pupukuk sila-la lain nde O la'ok neme tepo-lelek makahulun eli mai.

⁷Au ita bibii-namata'uk-ka, sa'e-na Kusyan laun-nala, ma hataholi Midian nala dele bengge'be.

⁸Ou MANETUALAIN, ade, hu ka nde tasi-a de, O nasam-ma fo'a do? Ade, lee-la nde tao-la O mamanasa do? O sa'e ko'as-sa da'dileo ndala ma kaleta musu, nai lelek O fe O anam-mala sesengik.

⁹O sadia basa kokouk-ka so, kokou isik-ka nanasadiak soaneu po'in neu. Boema O ta'tiba'e daebafak-ka da'di lee.

¹⁰Letek-kala lita O boema, langgengo, u'dan-na neme lalai mai, sama leo nanapo'ak-ka. Tasiina manai daebafak-ka buin-na, oen-na nangguu, de lii-la lapoponu ma nggu-nggu.

¹¹O kokou isim-mala lapu no lai-laik sama leo ndelas-sa, O tee isim-ma nangale'do boema le'do nate'e, ma bulak-ka nemek mamanan-na.

¹²O la'ok okofeo daebafak-ka no nasak, O heheta-aa'i leoina-la nenik O dalem-ma namahana loo-loo.

¹³O nggani leo uluk muu fo soi-po'i O anam-mala ma soaneu soi-tefa-ma, O hele manek-ka. O fepa mabuu hataholi manatao sala-singok-ka mauli-malangan, O ho'i falik la'iesak basa ana manatungan-nala hahaen-na.

¹⁴O kokou isim-mala tola mauli-malanga solda'du nai lelek ala mai sama leo ani-sangu, fo ala tao tapasasala ami. Ala hika no namahokok sama leo hataholi fo no denge-dengek ala tuni-ndeni hataholi manato'a-taak-ka.

¹⁵O heheta-aa'i tasi maloaina nenik O ndalam-ma de tasi fulak no fufu'dek-ka.

¹⁶Au amanene ndia boema au daleng-nga dele ma au difadoong-nga dele ngge'be-ngge'be. Au aong-nga none-na'u, de balakaik ta so au la'ok su'di nai bee boe, au eing-nga nakatunu. Neukose au ahani no dale tesa-tamak Manetualain huhukun-na neu hataholi manamusu no ami.

¹⁷Leomae ai kaak-ka boan ta ma ai angol-la boan ta, leomae ai saitun-na buna-boan ta, ma gandum-ma nai tina pi'da-nalak leomae mate la'iesak bi'ilopo-la ma bana-manu lalaen-nala louk,

¹⁸tehu neukose, au amahoko tataas esa nana au manasoi-manatefang nde O fo MANETUALAIN.

¹⁹ O fe au be'i-balakaik, O tao matea-mahele au eing-nga, sama leo nusa ein-na. Lelek au la'ok nai letelepak lain, O hela-nole au, fo ela au daleng-nga tesa-tama.