Read Termanu ZEFANYA 1 Bible Online

ZEFANYA 1 - Termanu bible

ZEFANYA 1

¹ Zefanya nde been-na Kusyi anan. Bei-ba'in tutuin-na, nanatuik neme dae leo lain neu, fo nde: Kusyi, Gedalya, Amazia, ma manek Hizkia. MANETUALAIN hala hehelun neu Zefanya nai lelek Mane Yosia fo Amon anan-na paleta Yehuda nde ndia.

²MANETUALAIN nafa'da nae, “Neukose, Au tao amopo-amate basa hata manai daebafak-ka lala'en-na:

³basa hataholi daebafak-kala, ma bana-manu, ma manupui-la ma i'ak-kala boe. Neukose Au taoisa hataholi mangalauk-ka. Neukose Au tao amopo-amate basa hataholi daebafak-ka lala'en-na, neukose Au ta po'ilotak maso'dak esa boen, Au fo MANETUALAIN dede'a-kokolang leondiak.

⁴Neukose Au huku Yerusalem ma Yehuda laun-nala lala'en-na. Bei ela hataholi fo ala sene-do'ok neu Baal-la, neukose Au tao amopo-amates leme mamanak sila-la mai. Neukose, lafandele heni imam-imam fo lalalau-laoono Baal-la.

⁵Neukose Au sapu balisi su'di see, fo ana kae leo uma kalan lain neu, fo ana sene-do'ok neu le'do-a, bulak-ka, ma nduuk-kala. Neukose Au tao amopo-amate sila, fo ala sene-do'ok neu Au, ma ana soo-supa lilineka nahele Au, tehu ana soo-supa nenik lamatua daebafak Milko na'den-na boe.

⁶Neukose, Au tao amopo-amate sila, fo ala ta mai leo Au mai fa, do loke Au hehela-nonoleng, ma sila fo manala'o ela Au, ma ala ta nau tunga Au so'on.”

⁷MANETUALAIN fain-na deka so. Neukose Manetualain ho'i nakeketuk nai faik ndia. Hu ndia de, pe'daom nai matan-na. MANETUALAIN naheheleaon soaneu Ana ho'i-na anan-nala ani hahaen-na, sama leo do'do bana tutunu-hohotuk-ka, de ana ka'i basa Yehuda musun-nala so.

⁸MANETUALAIN nafa'da nae, “Nai fai dodo'dok ndia, neukose Au huku basa hataholi matua-madema-la, basa manek-kala anatoun-nala, ma basa hataholi manatunga hataholi manamai-la ito-aton.

⁹Neukose Au huku basa hataholi fo ala sene-do'ok, sama leo hataholi fo ta lalelak Au fa, ma sila fo lamanako, ma lanisa, fo ala tao lahenu sila malangan-na uman-na nenik bua-lo'a nakok-kala.”

¹⁰MANETUALAIN, nafa'da nae, “Leo ndia, nai faik ndia; neukose kii-kiik-ka nananamanenek nai Lelesuina I'ak-ka. Hala makaleleuk-kala, neukose nananamanenek neme nggolo beuk-kala mai, ma manandefa matuaina-la nggun-na, neukose nanggu neme pupukuk-kala mai.

¹¹Kii-makaleleuk nai faik fo emi mamanene dede'ak ndia, hai laun fo manaleo manai kota boboan dae. Nana, basa manadangan-nala, ma hataholi makatotonak doik-kala, nanataonisak so!

¹²Nai faik ndia, neukose Au de'de obor, fo Au palisak lutu-lutuk kota Yerusalem-ma. Neukose, Au huku laun fo ta namahele te'e-te'e ndia fa, boema name'da-nana, dai so, ma hataholi fo ana dodoo nae Au, fo MANETUALAIN ta la'iesa fo Ana ho'i nakeketuk leo iak do leonak boen.

¹³Neukose, nakodaa-la kalo leni hata-heton-nala, ma ala tao lakalulutuk uman-nala. Neukose lafofo'a seluk uma, tehu ala ta leo fan. Neukose ala tao osi angol, tehu ta linu angol-la oen-na fa.”

¹⁴MANETUALAIN fai naketu-nala'din deka so, hei, ana deka nanseli so, nakalenak, ana losa no lai-laik. Faik ndia, henuk no dale he'dik-ka, nalosa solda'du palani ta'tibatu-la boeo ala nggasi beau nanahu ketu namahehenan-nala!

¹⁵Faik ndia, fai nasa-meluk, to'a-sotak ma to'a-taak, fai manandefak, ma nakalulutuk, fai makahatuk, ma mata-pana makamamasuk, fai masakoko'ak ma makamamasuk.

¹⁶Nai fai manalu ndia dalen-na, pupuuk-ka liin-na nananamanenek, ma manamatee-matatik-kala eki bekao, fo lata'ti loo kota-kota makota musuk-kala, ma uma puni madema-la.

¹⁷MANETUALAIN nafa'da nae, “Neukose, Au fe susa-soe ba'uk-ka, leo hataholi daebafak-ka neu, nalosa lafangganggao, sama leo hataholi pokek-ka. Lasala-lasingo neu Au so, de besak ia, neukose daan-nala faa sama leo oe-a, ma popolan-nala laboo lai dae lain.”

¹⁸Nai fai bibii-namata'u matuaina ndia, neukose MANETUALAIN natu'du nasa-melun, soona ala ta hapu ho'i-la la'iesak lilopila-lilofulan-nala fa. Neukose Manetualain ha'i nasa-melun hotu naputu la'iesak daebafak-ka lala'en-na. No kaiboboianak, neukose Ana ho'i-na basa mahahaek manai daebafak ia lala'en-na.