Read Termanu ZEFANYA 2 Bible Online

ZEFANYA 2 - Termanu bible

ZEFANYA 2

¹Hai leoina fo bibii-mamae tak-kala lemin, mame'dak leona,

²beidai emi beita male-tale ma mamatuu-tongo sama leo bunga! Mameme'dak leona, beidai MANETUALAIN, fai nasa-melun beita losa fa, fo MANETUALAIN nasa-melun mana pila lo'a-lo'an ndia, la'e emi.

³Fali ma'im-ma leo MANETUALAIN mai leona, hai basa hataholi dale taidaek manai nusak ia, ma basa hataholi manatunga paletan-nala lemin! Tao tunga MANETUALAIN dale hihiin-na, ma makaloe-makadae aom-ma nai matan-na. Fafa'kama, neukose emi mala huhukuk-ka deak, nai MANETUALAIN fain fo natu'du nasa-melun-na.

⁴ Neukose, ta hapu hataholi esa boen, hapu so'dak nai kota Gaza fa. Neukose Askelon nee-nee lino-lino, nana ta hapu hataholi nai ndia so'on. Neukose Asdod laun-nala nanausik, nai natee-nata'ti kaiboik esa dalek, nai le'dohana nees, ma neukose ladenu Ekron laun-nala, fo ala la'oela sila kotan-na.

⁵Emi nanasoo-supak, hai hataholi Filistin fo leoina manaleo ndolo-ndolo tasi su'un-na. MANETUALAIN naketu basa huhukuk ba'eneu emi so. Neukose Ana tao namopo-namate emi, fo ta hapu emi esa boen, naladeak fa.

⁶O nusam manadeka no tasi-a, ana da'di mook; manafoo-la lalaan-nala, ma bi'i lalaen-nala neukose lapadeik lai ndia.

⁷Neukose Yehuda laun fo laladeak-ka, langatuu-la o nusam ndia. Neukose, ala foo bana-manun-nala nai mamanak ndia, ma nai fai le'odaen-na, neukose ala sungu lai hataholi Askelon-na uman-nala. Nana, neukose MANETUALAIN, fo sila Manetualain-na, nasulu-nahapa seluk-kasa, ma Ana fes lamasu'i-lakabete seluk.

⁸ MANETUALAIN Fo Manakoasa nafa'da nae, “Au amanene basa leoina Moab, ma leoina Amon-nala nakamumulu-nakamamaen, ma hakinonolin neu Au anang-ngala so. Ala tui dede'a me'i-afek lae neukose ala ho'i-la Au anang-ngala daen-na.

⁹ No Au fo maso'dak, ma leoina Israel-la Manetualain-na na'den-na, neukose Au sapu balisi Moab ma Amon, sama leo Sodom ma Gomora. Neukose nusak sila-la henuk no oedolu oe masik-kala, ma henuk no ai-batu manatapasasalak fo manaketu-basa taak-ka, de na'u-aiana moli lai ndia. Bei ela Au anang fo lala huhukuk-ka deak-ka, neukose ala bonga laun-na uman-nala, ma latona-la daen-na.”

¹⁰Neukose, Moab ma Amon laun-nala huhukun-na leondiak, nanahu koao-ndaeaok, ma namatutua-namadedema aok-ka, boeo nanahu lakamumulu-lakamamaek MANETUALAIN Fo Manakoasa anan-nala.

¹¹Neukose, MANETUALAIN tao-nalas ala bii-lamata'u lanseli. Neukose Ana tao nakalulutuk, lamatua daebafak manai daebafak-kala. Boema, basa leoina lala'en-na, neukose ala sene-do'ok neu Manetualain, nai esa-esak nusan-na.

¹² Boeo neukose MANETUALAIN naketu huhuku mamates soaneu Sudan laun-nala.

¹³ Basa ndia soona, neukose MANETUALAIN Ana pake koasan-na, fo Ana tao nakalulutuk Asyur. Neukose Ana tao kota Niniwe da'di nee-nee lino-linok, ma moo na'u tak.

¹⁴Bana bubuak-kala, ma bana mata-matak-kala lai ndia, de neukose ala lu'u ma ala hahaeaon-nala. Neukose ko'donaok-kala, landunu nai ai batu madodouk sila lain, ma ala nggasi leme batu-la lelan-nala mai. Neukose manupui kaa-la, ala nggasi lai lelesu-la bafan-na. Neukose ala bonga heni, kota ndia uman fo nanataok neme ai kaiou-a mai.

¹⁵Manada'dik ndia nde neukose, ana da'di neu kota fo henuk no hika-setelek ndia, ma nafa'da nae ndia so'da-molek. Laun-nala laedaenga, sila kotan ndia, kota matuaina nanseli nai daebafak-ka. Te se'kona, kota ndia nee-nee lino-linok nanseli, ta hapu hataholi leo nai ndia fa, ka'da bana fuik-kala leo lai ndia! Hataholi see la'ok tunga kota ndia soona, neukose ana nggenge, ma aon-na ndefa kao-kao.