Read Termanu HAGAI 1 Bible Online

HAGAI 1 - Termanu bible

HAGAI 1

¹ Mane Darius-sa, ana paleta Persia neu teu ka dua-na, fo nai hataholi Yahudi-la bula ka 6-na, fain esa boema, MANETUALAIN Ana kokolak tunga Nabi Hagai-a. MANETUALAIN fe hala hehelun ndia neu Zerubabel, fo Sealtiel anan-na, ana da'di gobelnol nai Yehuda, ma Ana fen neu malanga Imam Matuaina Yosua fo Yozadak anan-na.

²MANETUALAIN Fo Manakoasa nafa'da Hagai nae, “Leoina ia, nafa'da nae, fain-na beita losa, soaneu naofo'a falik MANETUALAIN Uman-na fa.”

³Basa boema, MANETUALAIN nafa'da anan-nala tunga Nabi Hagai nae,

⁴“Hei anang-ngala lemin, ade fain-na losa ba'eneu emi, soaneu leo nai uma matea ma mahelek, tese'kona, Au Umang-nga soona, bei nalupa ai-batu madodouk do?

⁵So'ba taoafik neu emi ha'da tataom leona!

⁶Emi sele-nggali basa bini ngges makadotok so, tehu emi ketu-kolu faanak. Emi manana'ak de emi mi'a, tehu emi ta makabete fa. Emi manuu angol de emi minu, tehu emi dalem-ma, ta namahoko fa. Emi manuu bua papakek, tehu ta dai, soaneu tao nato'bi emi aoinam-ma fa. Ma kuli-la sipo ngga'di-a, ta dai soaneu tao natetu so'dan-nala fa.

⁷Emi ta bubuluk, tao le'e de dede'ak ndia ana da'di?

⁸Besak ia, kae leo pupukuk-kala lain meu, fo ho'i ai, fo mafofo'a Au Umang-nga; soona neukose Au daleng-nga loak, ma neukose Au nanasene-do'ok seluk, no eno matetuk. So'ba taoafik neu emi ha'da-tataom!

⁹Emi mamahena emi ketu-kolum buna-boan sasi kao-kao, te se'kona emi hapu ka'da faa anak nanseli; emi ho'i meni, emi ketu-kolum ndia buna-boan, tehu Au fun, nalosa anin-na fuu neni la'iesak-kasa. Tao le'e de, Au tao enok ndia? Natatan-na nde ia: Nanahu, Au Umang-nga bei nalupa ai-batu madodouk, tehu emi basa-basam-mala puselaipana no mafofo'a emi esa-esak uman.

¹⁰Hu ndia de, u'dan ta, de nalosa bubu'u-palusa ta hapu moli fa.

¹¹Au fe fai hanas nakandoo neu dae ma'dak-ka, ma pupukuk-kala, neu tina gandum-mala, neu osi angol-la, boema osi setun-nala, ma neu basa bubu'u-palusa manai dae lain-na, boe te, neu hataholi-a, ma bana manu, boema basa hata lala'en fo emi palusak-kala boe.”

¹²Basa boema, Zerubabel ma Yosua boema basa hataholi Israel manafali ma'is leme Babel fo mamana tu'u-tapak, ala tunga Hagai dede'a-kokolan; Hagai fo MANETUALAIN hataholi nadedenun ndia. Ala tao hata fo MANETUALAIN paleta neus, nanahu ala bii MANETUALAIN.

¹³Boema, Hagai nanduku-nalosak MANETUALAIN hala hehelun-na neu laun-nala, nae MANETUALAIN naheluk basa, nae neukose nasulu-nahapas.

¹⁴Boema, MANETUALAIN nakababale Gobelnol Zerubabel-la, Imam Matuaina Yosua, boema basa hataholi manafali ma'is leme mamana tu'u-tapak mai-a, dalen-nala, fo ela basa-basas lafofo'a MANETUALAIN fo sila Manetualain, Uman-na.

¹⁵Ala mulai ho'un ndek hataholi Yahudi-la bula ka 6-na, fain 24, fo nai Mane Darius-sa, ana paleta teu ka dua-na.