Read Termanu HAGAI 2 Bible Online

HAGAI 2 - Termanu bible

HAGAI 2

¹Nai hataholi Yahudi-la bula ka hitun-na, fain 21, fo bei nai teuk ndia dalen-na boe, MANETUALAIN kokolak seluk, tunga Nabi Hagai-a.

²MANETUALAIN nadenu Hagai, fo ana kokolak no gobelnol Zerubabel-la, Imam Matuaina Yosua, boema laun-nala, fo nanduku-nalosak hala heheluk-ka nde ia, nae,

³ “Ade, nai emi dalek, bei hapu hataholi nafandendelek makahulun-na, Au Umang ia lole-napun ma matea-mahelen do ta? Besak ia, tunga emi hahapu ma, leo beek?. Ta malole makandondook fa hetu?

⁴Tehu, boso ketu namahehena mala, hai emi basa-basam-mala lemin! Tao-no'i makandoo bela-ba'uk ndia, nana neukose Au tulu-fali ahele emi.

⁵ Lelek emi kalua meme Masir mai-a, Au aheluk basa ae neukose, Au asulu-ahapa ahele emi. Ma besak ia boeo, Au bei asulu-ahapa emi. Da'di ta palu emi bii-mamata'u fa.

⁶ Ta dook-ka so'on, te neukose Au anggenggengok lalai-a, ma daebafak-ka, daema'dak-ka ma tasi-a.

⁷Neukose Au tao anggengek basa leoina-la, fo neukose leni hata-heton-nala leo ia mai, nalosa Au Umang-nga, neukose henuk no sila su'i-beten-nala.

⁸Basa lilopilas ma lilofulak, manai daebafak ia lala'en-na, nde been-na Au nuung.

⁹Neukose Au Uma beung-nga lole-napun, lena heni makahulun-na, fo nai mamanak ia nde, neukose Au fe mole-dame ma su'i-betes neu Au leoina nga.” MANETUALAIN Fo Manakoasa nde manakokolak-ka.

¹⁰Nai hataholi Yahudi-la bula ka 9-na, fain 24, fo nai Mane Darius-sa, ana paleta neu teu ka dua-na, MANETUALAIN Fo Manakoasa kokolak seluk no Nabi Hagai-a,

¹¹nae, “Moke imam-mala, fo ala fe nakeketuk la'eneu dede'ak ia.

¹²Leo uni'ka, hapu hataholi ho'i-na paa biak esa, neme paa tutunu-hohotuk fo nanafe basak neu MANETUALAIN so, boema ana potin neu ba'du manalun dale, de nenin leo uma neu, de basa boema, ba'du manalun ndia, koila'e loti do nana'a tasak, do angol, do mina setun, do nana'a mata beek boe, ade basa sila-la, neukose ala da'di malalaok do ta?” Lelek Hagai fe natatanek ndia boema, basa imam-mala lataa lae, “Ta.”

¹³ Basa boema, Hagai natane seluk nae, “Leo uni'ka, hataholi esa da'di nanggenggeo, nanahu ana koila'e mamates, de basa boema, ana koila'e nana'ak sila-la matak esa, ade nana'ak ndia da'di nanggenggeo do ta?” Boema basa imam-mala lataa lae, “Hei, tao leo bee-o, nanggenggeo!”

¹⁴Basa boema, Hagai kokolak seluk nae, “MANETUALAIN nafa'da nae, nakanenetek ndia boeo, ana da'di ba'eneu hataholi Israel manaleo nai nusak ia, ma basa hata lala'en fo neme sila ue-osan buna-boan mai. Da'di, hata fo sila fen nai mei tunu-hotuk ia lain nde been-na, manggenggeok.”

¹⁵MANETUALAIN nafa'da nae, “So'ba taoafik neu hata, fo ana da'di nai hua-binesak-ka so, fo nde Au Umang ia, beita tao matalolole fan! Nai faik ndia, emi so'dam-ma leo beek?

¹⁶Emi meu mete basa gandum manadodouk-ka so, de emi maedaenga, neukose emi hapu gandum kilo natun dua, te se'ko na hapu ka'da kilo natun esa. Emi meu, fo emi ndui angol litel natun esa neme tong angol dale mai, tehu hapu ka'da litel 40 nai tong ndia dalek.

¹⁷Au akona basa anin mato'bik-ka, ma u'da batuk-ka so, fo ana tao nakalulutuk basa emi tina-osim buna-boan; tehu emi ta nau fali ma'im-ma leo Au mai boen.

¹⁸Nai faik ia, hataholi Yahudi-la bula ka 9-na, fain 24, duahulu ha, basa Au Umang-nga laten-na! Taoafik neu hata, fo neukose mulai hatematak ia, ana da'di.

¹⁹Leomae ta ela gandum, ma ai angol, ma ai kaak, ma ai dalima, ma ai setun fo beita laboa fa, tehu mulai hatematak ia, neukose Au ba'e-pala emi!”

²⁰Nai faik ndia boe, fo nde hataholi Yahudi-la bula ka 9-na, fain 24, MANETUALAIN fe hala hehelu ka dua neu Hagai,

²¹fo nanduku-nalosak-kana neu gobelnol Zerubabel-la. MANETUALAIN nafa'da nae, “Ta dook-ka so'on, te neukose Au nggenggengok lalai-a ma daebafak-ka,

²²Au tao akalulutuk nusa-nusak-kala, ma Au tao akalulutuk koasan-nala. Neukose Au fae alenga kaleta natee-nata'tin-nala loo hataholi manaho'un-nala; neukose mate basa ndalan-nala, ma hataholi manasa'ek-kala, esa taonisa esa.

²³Nai faik ia, neukose Au so'u o Zerubabel, fo Au atang-nga, fo o paleta menik Au na'deng-nga. Nanahu, o nde, Au hele basak-ka so.” MANETUALAIN Fo Manakoasa nde manakokolak-ka.