Read Termanu ZAKHARIA 1 Bible Online

ZAKHARIA 1 - Termanu bible

ZAKHARIA 1

¹ Nai hataholi Yahudi-la bula ka falun-na, fo Mane Darius-sa paleta Persia nai teu ka dua-na, MANETUALAIN nanduku-nalosak hala heheluk ia neu au, Nabi Zakharia, fo Berekhya anan-na, ma Ido upun-na.

²MANETUALAIN paleta au, fo au afa'da anan-nala ae leo ia, “Nai tepo-lelek makahulun-na, MANETUALAIN Fo Manakoasa, namanasa emi bei-ba'i kaim-mala nanseli.

³Tehu besak ia, au afa'da neu emi, fali ma'im-ma leo Au mai leona, soona Au boeo, fali leo emi neu boe.

⁴Boso sama leo emi bei-ba'i kaim. Makahulun eli, basa nabi-la landuku-lalosak Au hala hehelung-nga neus, fo ela ala boso boe tao seluk tatao-nono'i mangalauk, ma tao sala-singok bai. Tehu ala ta lafaduli ma ala ta nau tunga Au fa.

⁵Besak ia, emi bei-ba'i kaim ma nabi sila-la lai bee? Tak-kasa so.

⁶Au anduku-alosak Au paletang-ngala, ma Au hala nasanene'dang-ngala neu emi bei-ba'i kaim, tunga basa nabi-nabi fo Au atang sila-la. Tehu ala ta taoafik-kana fa, nalosa ala muse lu'a-lepa buna-boan. Boema lasasale dale, ma ala manaku lae Au, MANETUALAIN Fo Manakoasa, huku basa sila, nandaa no sala-singon-nala, ma nandaa no Au nakeketung-nga.”

⁷Nai hataholi Yahudi-la bula Syebat-ta, fain 14, fo nde bula ka 11, nai Mane Darius-sa, ana paleta neu teu ka dua-na, MANETUALAIN nanduku-nalosak hala hehelun-na neu au. Nai ninitak esa dalek, fo nai fai le'odaek,

⁸ au ita MANETUALAIN ata nusa so'dan esa, sa'e ndala pilas esa. Ana hahae neme bafak esa, nai ai murat-tala tala'da. Ndala fe'ek de'ubee, lapadaik lai dean-na, nggelok pilas, nggelok pila kumeak, ma nggelok fulak.

⁹Au atanen ae, “Tuan, ndala ia-la, sosoa-ndandaan beek?” Boema nataa nae, “Neukose au atu'du o, sosoa-ndandaan.

¹⁰MANETUALAIN haituas mai, fo ala palisak daebafak-ka.”

¹¹Basa ndala sila-la, leni hala nafa'dak fe ata nusa so'dak-ka nae, “Ami la'ok okofefeo basa daebafak-ka lala'en-na so, de se'kona daebafak ia, nee-nee lino-lino, ma so'da-molek.”

¹²Boema, ata nusa so'dak ndia nae, “MANETUALAIN Fo Manakoasa, O mamanasa Yerusalem ma kota-kota manai Yehuda-la, teuk hituhulu dalen-na. Neukose O mamanasa maheles, ma ta fe do'o do ampon neu fas losa faihi'da?”

¹³MANETUALAIN nataa ata nusa so'dak ndia, nenik hala-kokolak fo neni kokoe-nanasik,

¹⁴de ata nusa so'dak ndia, nadenu au anduku-alosak hata fo MANETUALAIN Fo Manakoasa nafa'da nae, “Au sue-lai anseli, ma Au taoafik neu kota Yerusalem, fo Au kota malalao-lalafung-nga.

¹⁵Tehu Au amanasa anseli, neu leoina fo lame'da nee-nee lino-linok, ma so'da-molek. Nana, nai lelek Au akatatakak Au nasang-nga, neu Au anang-ngala, leoina sila popo-tama seluk doidosok, neu Au anang-ngala.

¹⁶Besak ia, Au fali leo Yerusalem u, fo Au fe do'o do ampon neu kota ndia. Neukose Au Umang-nga nananafofo'a falik, ma neukose kota Yerusalem-ma, nanatao nahiik seluk.”

¹⁷Ata nusa so'dak ndia, nadenu au anduku-alosak hala heheluk-ka nde ia boe, nae, “MANETUALAIN Fo Manakoasa, naheluk nae, neukose Ndia kotan-nala lalole-lanapu falik, ma nae Ana tulu-fali Yerusalem la'iesa seluk, ma Ana manakun da'di leo Ndia pusaka mesan.”

¹⁸Nai ninita fe'ek esa dalek, au ita sapi susulak 4.

¹⁹Au atane ata nusa so'dak, fo manakokolak basa no au-a ae, “Bana susulak sila-la, sosoa-ndandaan beek?” Boema nataa nae, “Bana susulak sila nde been-na, ta'du-tana neme nusa-nusak balakaik fo manatao tapasasala laun Yehuda, Israel ma Yerusalem-ma.”

²⁰Boema, MANETUALAIN natu'du au, tuka besi 4, leni ai kalapu'ak.

²¹Boema au atane ae, “Sila mamain-na, tee-tee tutu'dan leo beek?” Boema nataa nae, “Soaneu tao nanggengek ma loli heni leoina fo manatao nakalulutuk Yehuda ma manatao tapasasala laun-na.”