Read Termanu ZAKHARIA 10 Bible Online

ZAKHARIA 10 - Termanu bible

ZAKHARIA 10

¹Metema fai hanan-na losa soona, moke u'dan neme MANETUALAIN mai. Soona neukose, MANETUALAIN Ana tao-na lalai nasakoko'a, fo u'daina mai, nalosa tina osi da'di momo'dok ma lalole, ba'eneu hataholi lala'en-na.

² Hataholi la loke natutu'duk neme sosongo-tatangok ma neme basa hataholi malelak-kala mai, tehu ala hapu natataak-ka nde been-na, ka'da masapepeko-masandandalik, ma kokola bafa louk mesan. Hapu nggelok lafa'da mangalele'do me'i-afek, tehu sila nafa'da mangalele'don-na, tao-na emi matofa-matalak, ma ala fe kokoe-nanasik-ka, sosoa-ndandaan ta. Hu ndia de, laun-na tapasasala, sama leo bi'ilopo-a. Ala male-tale, hu kande ta lanuu mauli-malangan fa.

³MANETUALAIN nafa'da nae, “Au amanasa anseli neu manakoasa fo ala paleta Au ana-ngala, de neukose Au hukus. Tehu laun Yehuda-la nde been-na, Au nuung, ma Au, MANETUALAIN Fo Manakoasa, neukose akabobois. Neukose Au taos da'di ndala natee-nata'ti palani ba'eneu Au.

⁴Neukose, Au hele manakoasa, mauli-malangan ma malanga solda'du matuaina-la, neme sila dalek mai, fo ala paleta Au anang-ngala.”

⁵Neukose laun Yehuda-la, ala sengi, sama leo palani ta'tibatu-la, ala heheta-aa'i musu-a, sama leo tane-a nai enok lain. Neukose, lata'ti lakandoo, hu kande Au, MANETUALAIN tulu-falis, ma solda'du musu manasa'e ndala-la, neukose ala sengi la'iesak-kasa.

⁶“Neukose, Au tao-a laun Yehuda-la balakaik, neukose Au soi-tefa hataholi Israel-la. Fo Au o falik-kasa leo nusan-na neu nanahu Au sue-lais. Neukose Au taos sama leo leoina, fo Au beita alelesi ita fas. Au nde MANETUALAIN fo sila Manetualain-na, Neukose, Au taoafik seluk neu basa sila huhule-haladoin lala'en-na.

⁷Hataholi Israel-la, neukose sama leo palani ta'tibatu mabe'i-balakaik, sama leo hataholi maninu angol, fo neukose lamahoko-setelee Sila tititi-nonosin neme tepo-lelek leo tepo-lelek neu neukose ta lafandeleheni, sesengik fo Au fen ia. Neukose ala lamahoko nanahu Au tatao-nono'ing ba'eneus.

⁸Neukose Au aloo Au anang-ngala, Au tao akabubuas da'di esa. Au soi-po'is, ma Au fes lamade'u leo makahulun-na.

⁹Leomae Au tao tapasasalas leo leoina-la tala'da leu boe, neukose lafandendelek lahele Au nai naa. Neukose laso'da, leondiak boe, anan-nala ma neukose, ala fali sama-sama leo nusan-na mai.

¹⁰Neukose Au o falik-kasa leme Masir ma Asyur mai. Neukose Au fes leo lai sila nusa mesan-na. Au os leo Gilgal ma Libanon leu boe, nalosa sila henu nusak-ka lala'en-na.

¹¹Metema, ala lena tasi to'a-taak-ka soona, Au, MANETUALAIN neukose fepa lii-la; soona ma'da Lee Nil-la buin-na. Leoina Asyur, fo manakoao-ndaeaok ndia, neukose nananakadadaek, ma Masir, fo palani ta'tibatu ndia, neukose namopo koasan-na.

¹²Neukose Au atea Au anang-ngala, neukose lakatele, ma ala sene-do'ok neu Au. Au, MANETUALAIN Manakoasa, nde manakokolak-ka.”