Read Termanu ZAKHARIA 11 Bible Online

ZAKHARIA 11 - Termanu bible

ZAKHARIA 11

¹Hai Libanon, soi heni o lelesum-mala leona, fo ela ha'i na'a heni o ai aras-mala!

²Hai ai daru-la lemin, makaleleu leona, nanahu foi heni kaiou-la so, ai matuaina-la, tu'u leu so. Hai ai matuaina manai Basan-nala lemin, kii leona. Nana, ai manai lasi maloainan-nala dalek, nanalo'o henik so.

³Mamanene manakoasa-la kii-makaleleun leona, sila ua-nale malolen-nala mopok-kasa so! Mamanene singa-singa manai nula-la, langao; nana, nalutu sila mamana leleon fo ndolo-ndolo Lee Yarden-na su'un-na so.

⁴MANETUALAIN nafa'da au nae, “Ta'ko o nono'kabai manafoo-a, de o foo bi'ilopo fo sanga do'don.

⁵Hataholi manaasak-kala, do'do bi'ilopo sila-la, te ala ta hapu huhukuk fa. Hataholi fo lase'o bi'ilopo sila-la paan-na, lafa'da lae, ‘Koa-kio MANETUALAIN leona! Besak ia, ita boetai tamasu'i!’ Manafoo sila-la, dalen-nala ta tu'da kasian neu sila bi'ilopon-nala fa.

⁶Au ta nau, Au daleng-nga tu'da kasian seluk neu su'di see boen, nai nusak ia fa. Au nde fe basa laun lala'en-na, leo manakoasa-la leu. Sila nde, neukose tao lakalulutuk nusak ia, te Au ta loso falik-kana, neme sila koasan-na mai fa.”

⁷Au, Zakharia, boema manadangan bi'ilopo-la se'ba au, soaneu foo bi'ilopo, fo neukose nanado'ok sila-la. Au aitete'eng 2; de Au foi esa na'de “Dale Malole” ma esak-ka seluk, na'de, “Hehengek.” Basa boema, au mulai anea, ma au akaboboi bi'ilopo sila-la.

⁸Manafoo 3, de 3-s ta hii au fa, ala tao-la au hihii amanasa. Au usi henis, nai bulak esa dalen-na.

⁹Basa boema, au afa'da bi'ilopo bubuak ndia ae, “Au ta nau foo emi so'on. Bee muse mate soona, nemen-na fo maten, ma bee muse mopo-mate soona, nemen-na fo mopo-maten. Boema bei elak-kala, esa taonisa esa.”

¹⁰Boema, au ho'i-a aitete'ek fo au foin na'de “Dale Malole” ndia, de au helu la'din, fo tao nakamate hehelu-balataak fo MANETUALAIN Manakoasa taon no basa leoina-la.

¹¹Nai faik ndia boe, hehelu-balataak ndia, ta paken so'on. Basa manadangan bi'ilopo sila-la, taoafik neu au, de lame'da lae, Manetualain bei kola-kola tunga au tatao-nono'ing lala'en-na.

¹² Au afa'das ae, “Metema Tuan-tuan-nala lakaheik soona, fe au ngga'ding-nga mai leona, metema ta soona, nemen-na.” Boema ala bae au ngga'ding-nga, doi isi lilofulak 30. MANETUALAIN nafa'da au nae, “Tao doik sila-la leo kas manai Au Umang dale neu.” Da'di, au tao doi isi lilofulak ka teluhulu sila-la, leo kas manai MANETUALAIN Uman dale neu. Sila dale sususen neu au a, ba'uk-ka'da ndia.

¹⁴Basa ndia boema, au helu la'di au aitete'e ka dua, fo au foin na'de “Hehengek”, boema heaba'e Yehuda ma Israel nakabua-nakesan-na.

¹⁵Boema MANETUALAIN nafa'da au nae, “Tao la'iesa seluk, nono'kabai o manafoo, tehu oek ia soona, o da'di leo manafoo ta malole fa.

¹⁶Nanahu neukose Au paleta manafoo esa, fo nanea Au bi'ilopo bubuang-nga, tehu ana ta taoafik neu bi'ilopo manasalak-ka, boeo ana ta puli-namo'do bi'ilopo bisuk-ka, ma ana ta fe bi'ilopo maso'dak-ka, na'a fa. Te se'kona, ndia nde na'a bi'ilopo maao-a paan-na, ma ana fe'a bana ndia eifangan-nala.

¹⁷Soo-supak ba'eneu manafoo sosoa-ndandaa tak ndia! Ana la'oela bi'ilopo bubuan-na so. Neukose natee-natatik-ka, tao nate'e koasan-na. Neukose, male heni alun-na, ma poke mata konan-na.”