Read Termanu ZAKHARIA 12 Bible Online

ZAKHARIA 12 - Termanu bible

ZAKHARIA 12

¹MANETUALAIN hala hehelun la'eneu Israel nde ia. MANETUALAIN fo nakapepela lalai-a, ma nakadada'dik daebafak-ka, boema manafe maso'dak neu hataholi daebafak-ka, nafa'da nae,

²“Neukose Au tao-a, Yerusalem sama leo nggalas fo isin-na angol; nusa-nusak manai titia-tatain-nala, neukose linun, fo laleulilok, sama leo hataholi manamafuk-ka. Ma metema, lakahapi-la Yerusalem soona, neukose lakahapi-la, bei ela kota-kota manai nusa Yehuda boe.

³Tehu neu faik bee, fo faik ndia losa soona, neukose Au tao-a Yerusalem, sama leo batu mabelaina; fo su'di leoina bee boe, ana so'u so'ban, soona ana hapu soe. Basa leoina manai daebafak-ka, lakabubua, fo leu sapu-la Yerusalem.

⁴Nai faik ndia, neukose Au tao-a basa ndala-la lapangamak ma manasa'en-nala lamulu, neukose Au anea laun Yehuda, tehu Au tao apoke basa ndala musun lala'en-na.

⁵Boema Yehuda teidalen-nala, neukose bekola lai dalen-nala dalek lae, ‘MANETUALAIN Fo Manakoasa, nde fe be'i-balakaik neu anan manaleo nai Yerusalem-mala.’

⁶Nai faik ndia, neukose Au tao-a Yehuda teidalen-nala da'di sama leo ha'i-a nai ai ha'i madodouk dale, do obol-la pila nai gandum aik-kala dalek; neukose ala tao lamopo-lamate leoina manai boboa-kaisun-nala Tehu laun Yerusalem-mala, neukose ala leo lahele leme kota dale no nee-nee lino-linok.

⁷Au, MANETUALAIN, nde makasososa fe sesengik neu solda'du Yehuda-la, fo ela ha'da-holomata fo Dauk tititi-nonosin sipon, boema laun Yerusalem-mala, ta lenak neme ha'da-holomata fo laun Yehuda fe'ek-kala sipok-ka fa.

⁸Nai faik ndia, neukose Au asulu-ahapa laun Yerusalem-mala; ma manandole-dakuk nanseli, nai sila dalek boeo, neukose ala da'di mabe'i-balakaik, sama leo Dauk be'i-balakain. Neukose Dauk tititi-nonosin hela-noles, sama leo Au ata nusa so'dang-nga hela-noles nakalenak, sama leo Au nde hela-noles-sala.

⁹Nai faik ndia, neukose Au tao amopo-amate, leoina bee, fo ana so'ba neu sapun-na Yerusalem.

¹⁰ Basa boema, Dauk tititi-nonosin, boema neukose Au fe laun Yerusalem-mala, dalek fo nau sue-lai, ma nau hule-haladoi. Neukose ala mete ndia fo ala pau basan so, fo ala kii-makaleleun, sama leo hataholi kii-makaleleu ana kisan-na. Neukose ala kii-makaleleu no dale he'dik, sama leo hataholi fo namopo ana ulun-na.

¹¹Nai faik ndia, neukose hapu kii-makaleleu matuaina nai Yerusalem, sama leo kii-makaleleuk ba'eneu Hadad-Rimon nai Bafak Megido-a.

¹²Boema basa teidalek manai nusak ndia, neukose ala kii-makaleleu mesa-mesan-nala; nanahu Dauk tititi-nonosin teidalen-nala, Natan tititi-nonosin teidalen-nala, Lewi tititi-nonosin teidalen-nala, Simei tititi-nonosin teidalen-nala, ma basa teidale fe'ek-kala. Neukose basa teidalek-kala, ala kii-makaleleu mesa-mesan-nala, ma basa teidale touk-kala, neukose ala kii-makaleleu fe'e leme inak-kala mai.”