Read Termanu ZAKHARIA 2 Bible Online

ZAKHARIA 2 - Termanu bible

ZAKHARIA 2

¹Nai ninita manatungak-ka dalek, au ita touk esa ho'u tali uukuk.

²Au atane ae, “O sanga leo bee mu?” Nataa nae, “Sanga uku Yerusalem. Au hii bubuluk, kota ndia loa-nalun de'ubee.”

³Basa boema, au ita ata nusa so'dak fo manakokolak basa no au ndia, ana nggani leo uluk neu, de ata nusa so'da fe'ek esa, natongo noon.

⁴Ata nusa so'da makasososak-ka, nafa'da ata nusa so'dak-ka dua nae, “Muu lai-lai leo touanak ndia muu, fo mafa'dan mae, neukose Yerusalem henuk no hataholi daebafak ma bana manu, nalosa ta bisa nafofo'a papala nanadamak nai boboa-kaisun fa.

⁵MANETUALAIN naheluk basa nae, neukose Ndia nde da'di papala nanadamak ha'i okofefeo kota ndia, fo nasulu-nahapan, ma neukose Ana leo nai naa, nai koasa ma matua-mademan lala'en-na dalek.”

⁶MANETUALAIN nafa'da anan-nala nae, “Au tao tapasasala basa emi, leo bu'u-bu'uk lala'en-na neu so. Tehu besak ia, hai hataholi nanafook-kala lemin, malai meme Babel mai leona, fo fali me'um-ma leo Yerusalem meu.

⁸See natee-nata'ti no emi soona, natee-natati no Au tei-ateng nde ndia.” Boema MANETUALAIN Fo Manakoasa nadenu au fo anduku-alosak hala heheluk ia, neu leoina fo lamanako Au anang-ngala hata-heton.

⁹“Neukose MANETUALAIN mesak-kana nde la'ban emi, ma neukose emi usi heni emi atam-mala, sila nde lamanako seluk emi. Metema, dede'ak ndia ana da'di soona, neukose emi bubuluk, mae MANETUALAIN Fo Manakoasa, nadenu basa au so.”

¹⁰MANETUALAIN nafa'da nae, “Makamee no namahokok leon, hai laun Yerusalem-mala lemin! Neukose Au leo nai emi tala'da heom!”

¹¹Nai lelek ndia, neukose leoina makadotok, ala mai leo Au mai, fo ala da'di Au anang. Neukose, Ana leo nai emi tala'daheom, ma neukose emi bubuluk, mae MANETUALAIN haitua basa au leo emi neu so.

¹²La'iesa seluk, neukose Yehuda da'di MANETUALAIN nuu hehelin, nai daen fo malalao-malalafu ka, ma neukose Yerusalem da'di Ndia kotan, fo Ana sue-lai nan, ba'un-na seli.

¹³Emi basa-basam-mala, boso mahahala nai MANETUALAIN matan! Nanahu, Ana mai neme mamana leleon manai nusa so'dak-ka mai so.