Read Termanu ZAKHARIA 5 Bible Online

ZAKHARIA 5 - Termanu bible

ZAKHARIA 5

¹Au mete seluk, de oek ia soona, au ita susula dok nanalunuk esa, ana laa nai lalai.

²Ata nusa so'dak ndia natane nae, au ita beek. Boema au ataa ae, “Susula dook nanalunuk-ka, ana laa nai lalai. Nalun-na metel 9, ma loan-na metel 4 seselik.”

³Boema nafa'da au nae, “Nai susula dook nanalunuk ndia dalek, nanasulak soo-supak soaneu nusak ia lala'en-na. Nai dook esa dalek, nanasulak nae basa nakodaa lala'en-na, neukose kalua henis leme nusak ia mai. Ma nai doo fe'ek esa dalek, nanasulak nae, basa hataholi manasoo-supa pepekok-kala boeo, neukose kalua henis.

⁴MANETUALAIN Fo Manakoasa, nafa'da nae, soo-supak ndia, neukose Ana fen sa'e-na basa nakodaa-la, ma hataholi manasoo-supa pepekok-kala uman-na. Soo-supak ndia, neukose la'e nakandoo uma sila-la, losa ala da'di ai-batu madodouk.”

⁵Ata nusa so'dak ndia, to'da mai seluk, de nafa'da au nae, “Mitak! Hapu manamai seluk!”

⁶Au atane ae, “Beek ndia?” Boema, nataa nae, “Sapai esa. Ndia nde ta'du sala-singok, neme nusak ia lala'en-na mai.”

⁷Sapai ndia tatanan-na, ala taon neme tima mai. Au bei meten te, sapai ndia tatanan-na natahuka, te se'kona inak esa nangatuuk nai sapai ndia dalek.

⁸Ata nusa so'dak ndia nae, “Tatao-nono'i managalauk-ka, salaon-na nde inak ia.” Boema ana ne'e falik, inak ndia leo sapai dale neu, de ana tatana sapai ndia.

⁹Au anganalo leo lain neu te, au ita inak 2, ala laa lasale leo au mai. Li'dan-nala balakaik sama leo manupui danoe li'dan-na. Boema, ala ho'i-la sapai naka'sa, de ala laa leona.

¹⁰Au atane ata nusa so'dak ndia ae, “Leni sapai ndia leo bee neu?”

¹¹Boema, nataa nae, “Lenin leo Babel neu, fo ala sanga tao fen uma sosongok nai naa. Metema ala tao basa uma sosongok ndia soona, neukose ala pe'da sapai ndia neu ndia, fo ala sene-do'ok-kana.”