Read Termanu ZAKHARIA 6 Bible Online

ZAKHARIA 6 - Termanu bible

ZAKHARIA 6

¹Au hapu ninita fe'ek. Oek ia, au ita kaleta natee-natatik 4, ala kalua leme lete liti 2 tala'da mai.

² Kaleta esa soona, ndala 2 helan, de makasososak-ka ndala pilas, ka dua, ndala nggeok,

³ ka telu, ndala fulak, ma ka 4, ndala keke'ak.

⁴Boema, Au atane ata nusa so'dak ndia ae, “Tuan, kaleta natee-natatik ia-la, sosoa-ndandaan-na beek?”

⁵ Nataa nae, “Metema, lasasalematak basa loo MANETUALAIN fo manamakadada'dik lalai maloa soona, leu leo bu'u 4 leu.

⁶Ndala nggeok-ka hela kaleta natee-natatik-ka, neu leo Babel boboan kii neu. Ndala fulak-ka, neu leo muli neu, ma ndala keke'ak-ka, neu leo nusak manai kona neu.”

⁷Lelek ndala keke'ak ndia kalua, boema metes soona, nono'kabai, ala nau, no lai-laik leu palisak daebafak-ka. Ata nusa so'dak ndia nae, “Muu leon fo palisak daebafak-ka!” Boema ala la'o leona.

⁸Basa boema, ata nusa so'dak ndia naloo bou-bou neu au nae, “Ndala manala'o leo Babel neu ndia, ana tao-na MANETUALAIN nasan-na tenak so.”

⁹MANETUALAIN Ana fe au hala heheluk-ka nde ia,

¹⁰nae, “Ho'i-ma tunu-hotuk fo Heldai, Tobia ma Yedaya, fo nde hataholi fo besak-ka ala fali ma'is leme mamana okak manai Babel-la, fe-ka. Meni tunu-hotuk sila-la no lai-laik leo Yosua, fo Zefanya anan-na, uman neu.

¹¹Taom-ma bulamolik esa neme sila fe lilopila-lilofulak-kala, fo tao neu Imam Matuaina Yosua, fo Yozadak anan-na, langan-na.

¹² Mafa'dan mae Au, MANETUALAIN Fo Manakoasa, nafa'da nae, ‘Hataholi fo loken lae, Manabuku beuk-ka, neukose naua-nanale nai mamanak fo ana leo, ma neukose nafofo'a falik MANETUALAIN Uman-na.

¹³Neukose, ndia nde nafofo'a falik Au Umang-nga ma ana sipo ha'da-holomata, sama leo manek esa, de neukose ana paleta laun-na. Neukose imam esa non, fo lalau-laoono leuesa no mole-dame.’

¹⁴Pe'da bulamolik ndia, nai Au Umang, fo ana da'di nasanene'dak neu Heldai, Tobia, Yedaya, ma Yosia.

¹⁵Neukose hataholi-la, ala mai leme mamana dook-ka mai, fo ala tulu-falin, fo lafofo'a falik Au Uma nga. Metema tao basa uma ndia soona, neukose ala bubuluk, lae Au MANETUALAIN Fo Manakoasa, nde nadenu basa o, leo sila neu so. Neukose basa sila-la, ala da'di, metema te'e-te'e ala tao tunga Au, MANETUALAIN fo sila Manetualain, paletan-nala.”