Read Termanu ZAKHARIA 8 Bible Online

ZAKHARIA 8 - Termanu bible

ZAKHARIA 8

¹MANETUALAIN Fo Manakoasa, fe au hala heheluk-ka nde ia nae,

²“Au ahiik anseli, tulu-fali Yerusalem, nanahu Au sue-lai laun-na ba'un-na seli, ma hu kande Au susue-lalaing ndia, de Au daleng-nga namahana loloo neu kota ndia, musun-nala.

³Neukose Au fali leo Yerusalem, fo Au kota malalao-malalafung ndia u, fo Au leo nai ndia. Neukose lalelak Yerusalem, da'di leo kota manalilinekak, ma neukose loke MANETUALAIN Fo Manakoasa pupukun-na soona, lae Pupuku Malalao-malalauk.

⁴Neukose toulasik ma inalasik fo lamalasi lanseli so, nalosa ala muse la'ok pake aitete'ek, langatuuk lai Yerusalem moo maloan dale.

⁵Neukose ni'iana manamakaminak-kala, henu seluk eno-enok manai kota dale-la.

⁶Metema, mete dede'ak ndia soona, nono'kabai manada'di tak ba'eneu leoina ia hataholi bei maso'dan-nala, tehu manada'dik ba'eneu Au.

⁷Neukose Au soi-tefa ala, Au anang-ngala leme nusa-nusak fo mamanak, ala foo lenis-sala,

⁸fo Au o falik-kasa leme dulu ma leme muli mai, fo ala leo seluk lai Yerusalem. Neukose sila da'di Au anang, ma Au da'di sila Manetualain. Neukose Au paletas no lilinekak ma tunga ndoos ma matetuk.”

⁹MANETUALAIN, nafa'da anan-nala nae, “Matetea emi dalem-ma. Besak ia, emi boeo mamanene hala-kokolak fo nabi la kokolak-kana, nai lelek ala pe'da batu makasososak fo lafofo'a falik Au Umang-nga.

¹⁰Faik ndia beita losa fa, te ta hapu hataholi napalani se'ba hataholi do bana balakain, ma ta hapu hataholi naso'da no nee-nee lino-linok, neme musu-a nakasese'bon-na mai fa. Au tao-alas, esa nakasese'bok esa so.

¹¹Tehu besak ia, Au ha'da-tataong soaneu leoina ia hataholin bei maso'dan-nala, ta sama leo makahulun-na so'on.

¹²Neukose ala sele-nggali bini-ngges no mole-dame. Sila ai angon-na laboa, neukose dae-a fe buna-boan, ma neukose u'dan-na ba'uk-ka. Au fe basa baba'e-papalak sila lala'en-na, neu leoina ia hataholin bei maso'dan-nala.

¹³Hai laun Yehuda ma Israel-la lemin! Nai fai maneuk-ka, metema hataholi nusa dea-la, esa soo-supa esa soona, lafa'da lae, ‘Sa'di leo been-na, susa-soe manala'e Yehuda ma Israel-la, la'e o boe!’ Tehu neukose Au soi-tefa-ala emi, nalosa hataholi nusa dea sila-la, neukose lakokolaok lae, ‘Sa'di leo been-na, baba'e-papalak fo ana kona neu Yehuda ma Israel-la, ana kona neu o lain boe!’ Hu ndia de, matetea emi dalem-ma, ma boso bii-mamata'u!”

¹⁴MANETUALAIN Fo Manakoasa nafa'da nae, “Lelek emi bei-ba'i kaim-mala tao-la Au amanasa, boema Au ho'i nakeketuk fo hukus no balakaik. Au ta hela falik Au nakeketung ndia fa, te Au akalala'o kana.

¹⁵Tehu besak ia, Au sanga ba'e-pala laun Yerusalem-mala ma laun Yehuda-la. Da'di boso bii-mamata'u.

¹⁶ Emi muse tao tunga paleta-la nde ia nae: Metema emi kokolak soona, kokolak ndos neu emi nonoo hataholim-ma. Ho'i nakeketuk tunga ndoos ma matetuk, ma neni mole-dame.

¹⁷Boso tutu'u eno mangalauk neu emi nonoo hataholim-ma. Boso soo-supa pepekok. Au ta hii masapepeko-masandandalik ma ta manatao tunga ndoos ma matetun-na ma naseti-nalakak-ka fa.”

¹⁸MANETUALAIN Fo Manakoasa, fe au hala heheluk-ka nde ia, fo au anduku-alosak-kana neu anan-nala nae,

¹⁹“Ala tao okaaok manai hataholi Yahudi-la bulak ka 4, ka 5, ka 7, ma ka 10-na dalek, neukose ana da'di feta fo henuk no namahokok-ka, ma hika-setelek ba'eneu laun Yehuda-la. Sue-lai ndoos ma mole-dame-a!”

²⁰MANETUALAIN Fo Manakoasa, nafa'da nae, “Neukose fain-na losa, kota ba'uk-ka laun-nala, neukose ala mai leo Yerusalem mai.

²¹Neukose kota esa laun-na, nafa'da kota esa laun-na nae, ‘Mai fo ata teu sene-do'ok neu MANETUALAIN Fo Manakoasa, fo ata dokodoe baba'e-papalan. Tunga moo ami leona!’

²²Boema hataholi ba'uk-ka, ma leoina mabe'i-balakaik ba'uk-ka, neukose ala mai leo Yerusalem mai, fo ala sene-do'ok neu Au, MANETUALAIN Fo Manakoasa, fo ala dokodoe Au baba'e-papalang.

²³Nai faik ndia, neukose hataholi nusa dea 10 mai leo hataholi Yahudi esa mai, fo lafa'da lae, ‘Ami boeo mahiik maua-manale sama leo emi boe, nana ami mamanene, lae Manetualain ba'e-pala emi.’ ” MANETUALAIN Fo Manakoasa nde manakokolak-ka.