Read Termanu ZAKHARIA 9 Bible Online

ZAKHARIA 9 - Termanu bible

ZAKHARIA 9

¹ MANETUALAIN hala hehelun-na nde ia. Naketu basa soaneu huku nusa Hadrakh ma kota Damsyik-ka. MANETUALAIN nuun ta ka'da Israel leon-nala fa, tehu Siria nusan-na, polon-na boe.

²Hamat fo nakatoo no Hadrakh boeo, Ndia nuun leondiak boe, kota-kota Tirus ma Sidon, no basa laun malelainan-nala lala'en-na.

³Tirus nafofo'a basa kota musun-nala, ma nadoudou-na, lilopilas ma lilofulak makadotok nanseli, nalosa lilopilas lilofulak sila-la da'di buas biasa, sama leo solokaek-ka ma tane-a, nai enok lain.

⁴Tehu neukose MANETUALAIN tao-nan da'di nuu-taa hata-taak. Basa kota ndia, su'i-beten lala'en-na, neukose Ana tu'u-tapa henis leo tasi dale neu, ma neukose ha'i na'a heni kota ndia.

⁵ Neukose kota Askelon ma kota Gaza litan, fo ala bii-lamata'u. Neukose Ekron nitan boe, de mopo basa namahehenan lala'en-na. Neukose mopo Gaza manen-na, ma neukose Askelon da'di kota nee-nee lino-linok ma kota louk.

⁶Neukose hataholi-la leme leoina sese'do-babalik-kala mai, fo ala leo-la Asdod. MANETUALAIN nafa'da nae, “Neukose Au taoisa la'iesak hataholi Filistin manakoao-ndaeaok sila-la.

⁷Neukose ala ta la'a seluk paa matak do nana'a nalulik so'on. Basa hataholi fo bei ela kala, neukose ala da'di Au anang-ngala, ma nanasipok, fo ala da'di leo esa nai leo Yehuda dalek. Neukose Ekron da'di Au anang, sama leo hataholi Yebus-sala nai tepo-lelek makahulun-na.

⁸Neukose Au anea Au dae-oeng, ma Au apanggengge solda'du nusa dea fo ala sanga la'ok tunga ndia. Neukose Au ta fe seluk hataholi manatuni-ndenik-kala loak, fo ala paleta Au anang-ngala fa. Nana, Au ita basa doi-doson-nala so.”

⁹ Hai laun Sion-nala lemin, mamahoko-setelee leon! Hai laun Yerusalem-mala lemin, eeki-matadale leon! Mete leon! Emi Manem-ma, ana mai no matua-mademan! Ndia manek fo manatao tunga ndoo-matetun-na, fo maneni so'da-molek-ka. Tehu henuk no dale taidaek, ana losa ana sa'e keledei, keledei ana esa.

¹⁰ MANETUALAIN nafa'da nae, “Neukose Au tu'u-tapa heni kaleta-kaleta musu manamaik leme Efraim mai, neukose, Au tao amopo-amate ndala manai Yerusalem mala, ma neukose Au tao akalulutuk basa kokouk lala'en-na Neukose emi Manem-ma po'a-benga mole-dame neu leoina no leoina. Neukose, ana koasa neme tasi leo tasi neu, neme Lee Efrat-ta, losa daebafak-ka bu'un-nala.”

¹¹ MANETUALAIN nafa'da anan-nala nae, “No hehelu-balatak fo Au taon no emi, hehelu-balatak fo nanapakunisak nenik bana tutunu-hohotuk daan-na, neukose Au soi-po'i o laum fo manadoi-doso nai mamana tu'u-tapak dalek sama leo hataholi nanalongak-ka nai oedolu ma'dak dale.

¹²Fali leon, hai hataholi nanafook-kala lemin, besak ia, emi manuu namahehenak so. Fali me'um-ma leo emi mamana nasulu-nahapam meu, Neukose Au ba'e-pala ahele emi. Mamanene leona: Neukose Au ba'e-pala emi diku la'i dua nanahu basa doidosok lala'en, fo emi la'ola'din.

¹³Neukose Au pake Yehuda da'di leo palani ta'tibatu-la kokoun-na, ma Israel da'di leo kokou isik, fo nahani ka'da po'in neu. Au pake laun Sion-na da'di leo tafaina; fo no tafaina ndia, neukose Au sapu-a hataholi Yunani-la.”

¹⁴Neukose MANETUALAIN natu'du aoinan-na neu anan-nala, Ana kou kokou isi manapilan-na, sama leo ndelas-sa. Neukose MANETUALAIN fo Mademaina, Ana puu pupuuk-ka, fo da'di ta'du-tana natee-natatik mulai boema Ana la'ok tutulumatak, nai ani-sangu maneme kona, dalek.

¹⁵Tao leo bee-o, Ana fe anan-nala nasulu-nahapak, nalosa ala hapu sengi basa musu lala'en-na. Sama leo hataholi mana mafuk nininuk-ka, ana eki, leondiak boe, ala eki nai natee-natatik-ka dalek. Sama leo bana tutunu-hohotuk-ka daan-na, nanapo'ak leo mei tunu-hotuk lain neu leondiak boe, ala ta'ti heni musu daan-na.

¹⁶Metema, faik ndia losa soona, neukose MANETUALAIN soi-tefa anan-nala, sama leo manafoo-a, ana soi-tefa bi'ilopon-na neme soe dale mai. Neukose langale'do nai MANETUALAIN daen-na, sama leo bulamolik poemata mangadilak-ka.

¹⁷Mahani te, MANETUALAIN, daen-na malole nanseli, malole ma mana'ahiik nanseli! Angol ma gandum-mala moli no malole nai ndia, fo ana tao-na ta'eanak anafe'oanak boetai balakaik.