Read Termanu MALEAKHI 1 Bible Online

MALEAKHI 1 - Termanu bible

MALEAKHI 1

¹MANETUALAIN, hala hehelun-na nde ia, neu Maleakhi ba'eneu hataholi Israel-la.

² MANETUALAIN nafa'da anan-nala nae, “Au sue-lai emi.” Tehu, lataa lae, “Tao leo bee de, MANETUALAIN sue-lai ami?” Boema MANETUALAIN nataa nae, “Ade, Yakob ka'an ta Esau fa do? Tehu, Au sue-lai Yakob,

³te Au ta hii Esau fa. Au tao akalulutuk Esau nggolo mapupukun-na so, ma Au fe daen-na, leo bana makaa-makisuk-kala lai moo solokaek-ka.”

⁴Leouni'ka, Esau tititi-nonosin, fo hataholi Edom sila-la lae, “Ami kotam-mala, nanatao nakalulutu basak so, tehu neukose ami mafofo'a falik-kana,” soona neukose, MANETUALAIN nataa nae, “Sila bole lafofo'a falik-kana, tehu neukose Au tao atu'un. Neukose lokes soona lae, ‘Nusak nanasoo-supak’, ma loke sila soona lae, ‘Leoina manahapu MANETUALAIN nasa-melun, losa dodoon-na.’ ”

⁵Neukose, leoina Israel-la lita matan, fo lafa'da lae, “Tete'ek-ka, MANETUALAIN matuaina; koasan-na, losa dae Israel-la selik!”

⁶MANETUALAIN Fo Manakoasa, nafa'da basa imam-mala nae, “Ni'iana esa, ana fe ha'da-holomata neu aman, ma malalau-maoono esa, ana fe ha'da-holomata neu ndia tuan-na. Au ia, emi Amam; tao le'e de, emi ta fe ha'da-holomata neu Au fa? Au ia, emi malangam-ma; tao le'e de, emi ta bii-mamata'u neu Au fa? Emi makamumulu-makamamaek Au, tehu emi matane mae, ‘No enok leo bee ka, ami makamumulu-makamamaek O?’

⁷No emi tunu-hotu nana'a-niniuk, fo ta nandaa nanatunu-hotuk nai Au mei tunu-hotung lain fa. Boema emi matane mae, ‘No enok leo bee ka, ami heheta-aa'i O?’ No emi tao manggenggeo Au mei tunu-hotung.

⁸ Metema, emi tunu-hotu fe Au, bana pokek, kamahe'dik do lu'u eik soona, ade tatao-nono'i masalak ta ndia fa do? So'ba emi fe bana matak leondiak-ka, leo gobelnol-la neu! Ade neukose namahoko, ma ana tao emi no malole do?”

⁹Besak ia, hai imam-imam-mala lemin, so'ba dokodoe neu Manetualain, fo ela Ana sue-lai ita. Neukose ta nataa emi huhule-haladoim fa, soona emi sala mesam ndia.

¹⁰MANETUALAIN Fo Manakoasa, nafa'da nae, “Malole lenak, Au Umang-nga lelesun-na nanakenak, nana sosoa-ndandaan ta la'iesak-kana, emi mapila ha'i nai Au mei tunu-hotung lain. Au ta hii emi, ma Au ta nau sipok emi tutunu-hohotum fa.

¹¹Basa leoina manai daebafak-ka lala'en-na, ala fe ha'da-holomata neu Au. Ala tunu boomenik, su'di nai bee-bee boe, fo ala fe ha'da-holomata neu Au na'deng-nga, ma ala tunu-hotu tutunu-hohotuk-ka nandaa, nana basa leoina-la, ala fe ha'da-holomata neu Au!

¹²Tehu, emi makamumulu-makamamaek Au, nanahu emi mafa'da mae, Au mei tunu-hotung-nga, belin ta, de emi tunu-hotu nana'ak fo emi ta mahiik-kana, nai ndia.

¹³Emi mafa'da mae, ‘Ita malua basa sila-la so’, ma emi heheta-aa'i Au. Emi meni banan-nakok, bana lu'u eik, do kamahe'dik, fo tunu-hotu fe Au. Emi maedaenga, Au nau sipo emi tutunu-hohotum sila-la do?

¹⁴Soo-supak be'eneu manake'di-ndiuk, fo ana tunu-hotu fe Au bana beli tak, metema bei hapu bana neulauk nai banan-nala dalek, fo ana helu basa, ana fen neu Au so! Nana Au nde Mane Matua-madema, ma nanafe ha'da-holo mata neme basa leoina-la mai.”