Read Termanu MATEOS 1 Bible Online

MATEOS 1 - Termanu bible

MATEOS 1

¹Yesus Kristus momoli-dada'din leo iak: Yesus nde bee na Dauk tititi-nonosin, fo Dauk ia Abraham tititi-nonosin. Ala sulak la Yesus bei-ba'ikai nala, mulai neme Abraham losa Dauk na'de nala nde ia:

²Abraham bongi Isak, Isak bongi Yakob, Yakob bongi Yehuda no tolanoo nala, Yehuda bongi Peres ma Zerah (fo sila inan na'de Tamar), Yehuda bongi Hezron, Hezron bongi Ram, Ram bongi Aminadab, Aminadab bongi Nahason, Nahason bongi Salmon, Salmon bongi Boas (fo inan nde Rahab), Boas bongi Obed (fo inan nde Rut), Obed bongi Isai, ma Isai bongi Mane Dauk-ka.

⁶ Neme Dauk losa lelek fo ala tu'u hataholi Israe la leo Babel leu a, ala sulak la na'de nala nde ia: Salomo (fo inan nde Uria saoela na), Salomo bongi Rehabeam, Rehabeam bongi Abia, Abia bongi Asa, Asa bongi Yosafat, Yosafat bongi Yoram, Yoram bongi Uzia, Uzia bongi Yotam, Yotam bongi Ahas, Ahas bongi Hizkia, Hizkia bongi Manase, Manase bongi Amon, Amon bongi Yosia, Yosia bongi Yekhonya no tolanoo nala.

¹²Neme lelek fo ala tu'u hataholi Israe la leo Babel leu losa bongi Yesus, ala sulak la na'de nala nde ia: Yekhonya bongi Sealtiel, Sealtiel bongi Serubabel, Serubabel bongi Abihud, Abihud bongi Elyakim, Elyakim bongi Asur, Asur bongi Sadok, Sadok bongi Akhim, Akhim bongi Eliud, Eliud bongi Eliasar, Eleasar bongi Matan, Matan bongi Yakob, Yakob bongi Yusuf, fo Maria sao na. Fo Maria ia nde bongi Yesus, fo loken lae Kristus.

¹⁷Da'di neme Abraham losa Dauk, hapu tititi-nonosik sanahuluha. Ma neme Dauk losa lelek fo ala tu'u hataholi Israe la leo Babel leu a, hapu tititi-nonosik sanahuluha boe. Boema neme lelek fo ala tu'u hataholi Israe la leo Babel losa bongi Kristus, hapu tititi-nonosik sanahuluha boe.

¹⁸ Yesus Kristus bobongi na tutui na leo iak. Yesus inan na'de Maria. Beita bongi Yesus fa te, Maria nahiik no Yusuf. Tehu duas beita lakabubua boen te, Maria nailu so. Yusuf ta bubuluk Maria ilun ndia, ana da'di neme Manetualain Dula Dale na koasa na mai fa.

¹⁹Nana Yusuf fo nahiik no Maria ia nde bee na hataholi malole ma ana tunga te'e-te'e no agama hoholo-lalanen. Da'di ana dodoo nae, ana sanga nggaliheni Maria no denge-dengek fo sue ka nde hataholi ba'u boso lakamamaek Maria.

²⁰Tehu nai lelek fo Yusuf bei dudu'a-dodoo dede'ak ndia te, nalame'i me'is esa. Nai me'is ndia dalek, nita Lamatua ka ata nusa so'dan esa nafa'dan nae, “Yusuf, fo Dauk tititi-nonosin; Boso bii ka'bing mo Maria; te nailu ni'iana ndia ana da'di neme Manetualain Dula Dale na koasa na mai.

²¹ Neukose Maria bongi na ni'iana touanak esa. Soona o muse foi ni'iana ndia na'de Yesus, nanahu neukose ni'iana ndia nde soi-tefa nala hataholi daebafa ka sala-singo nala.”

²²Basa silala ala da'di tao leondiak, fo ela nandaa no hata fo Lamatua ka nafa'da basan tunga nabi nala hala nafafa'da nala lae,

²³ “Ana fe'oana mata tema esa, neukose nailu fo ana bongi na ni'iana touanak esa. Ala foi ni'iana ndia na'de, Imanuel.” Imanuel ndia, metema tunga dede'a Ibrani soona sosoa na nae, “Manetualain no ita”.

²⁴Yusuf fo'a boema, ana tao tunga hata fo Lamatua ka ata nusa so'dan ndia nafa'da neun nana. Boema ana kabing no Maria leona.

²⁵ Nai lelek fo ni'iana ndia beita bongi fa nana, Yusuf no Maria beita lakabubua fa, tehu Maria bongi na ni'iana ndia boema, Yusuf foin na'de Yesus.