Read Termanu MATEOS 12 Bible Online

MATEOS 12 - Termanu bible

MATEOS 12

¹ Nai fai Sabat esa, lelek Yesus no ana mana tunga nala la'ok la'di osi gandum esa, boema Yesus ana mana tunga nala mulai ketu gandum de la'a, nanahu lamala'a.

²Lelek hataholi Farisi la lita, boema lafa'da Yesus lae, “Mete mitak O ana mana tunga mala la'o lena ita agama na hoholo-lalanen, nana ala tao hata fo nanakena ka'ik nai fai Saba ta.”

³ Boema Yesus nataa nae, “Ade emi beita lees mita, la'eneu hata fo Dauk tao-no'in nai lelek fo Dauk no hataholi nala lamala'a fa do?

⁴ Dauk masok leo Manetualain Uman dale neu, boema na'a loti fo nanafe basak neu Manetualai na. Te se'kona tunga ita agama na hoholo-lalanen soona, nau Dauk do hataholi nala boeo, ta bole la'a loti ndia fa. Te ka'da imam ala, nde la'a loti ndia dei.

⁵ Do emi beita lees mita nai Musa hoholo-lalanen dale, nanasulak nae, tunga-tunga fai Saba ta, imam ala lalau-laoono lai Manetualain Uman, fo ndia boeo, ala la'o lena fai Saba ta nakanenete na, tehu emi ta fe salak neu fas?

⁶Hu ndia de, taoafik neu hata fo Au afa'dak ia: nai ita ia, hapu nggelok ba'u lena Manetualain Uma na.

⁷ Nai Susula Malalaok dale nanasulak nae: Au hihii ka nde, susue-lalai ka, te Au ta hii bana tutunu-hohotuk fa. Metema tete'e ka emi bubuluk dede'ak ndia soona, neukose emi ta fe salak neu hataholi sala ta kala fa.

⁸Nanahu Ana Hataholi ka nde koasa fai Saba ta.”

⁹Yesus la'oela mamanak ndia boema, neu leo uma mamasok esa neu.

¹⁰Nai ndia, nita hataholi lima mate seselik esa. Nai ndia boeo, hapu hataholi de'u bee, ala sanga Yesus sala na. Boema latanen lae, “Ade bole tao nahai hataholi nai fai Saba ta do ta?”

¹¹ Boema Yesus nataa nae, “Leo uni ka, emi hataholim esa, nanuu bi'ilopo esa, Boema bi'ilopo ndia, ana tu'da leo bolo madema esa dalek, la'e fai Sabat; ade hataholi mabi'ik ndia, ana ta sanga enok fo, ana kalua heni bi'in ndia, neme bolok ndia dalek mai fa do?

¹²Na, Ade hataholi daebafa ka, beli na ta lena heni bi'i lopo ndia fa do! Da'di tete'e ka hetu, bole tulu-fali hataholi nai fai Saba ta.”

¹³Basa boema Yesus nafa'da hataholi lima mate seselik ndia nae, “Look o lima ma mai.” Hataholi ndia, lok lima na neu te, liman ndia ana hai de sama leo liman seli a so

¹⁴Boema hataholi Farisi la la'oela uma mamasok ndia, de leu lala halak fo ala taolisa Yesus.

¹⁵Yesus bubuluk, hataholi Farisi sila la, lape'da dale mangalauk neun. Da'di Ana la'oela mamanak ndia, tehu hataholi ba'u ka tungan. Nai hataholi sila la dalek, hapu hataholi kamahe'di sala boe. Boema Ana tao nahai la'i esa kasa.

¹⁶Tehu Ana ka'is fo, boso lafa'da Ndia neu hataholi esa boen.

¹⁷No enok ndia, hata fo Manetualain kokola kana tunga Nabi Yesaya, ana da'di.

¹⁸ Nae, “Ia nde bee na, Au Atang fo nanahele ka, Hataholi fo Au sue-lai ka, ma nandaa no Au dale nga. Neukose Au fen, Au Dula Dale nga, Neukose ana tui-benga Au nakeketu ndo nga neu basa leoina la.

¹⁹Neukose Ana ta nasipo bafak, do nasanggati fa, do Ana kokolak nai okofoo la lain.

²⁰Hanoe mana male ka, neukose Ana ta tao la'di fan, Banu mana pila ma'u-ma'u ka, neukose Ana ta taonisa fan. Neukose Ana sanga enok besa-besa, fo Ana hapu ndo na.

²¹Neukose basa leoina lala'ena, tao namahehena nala neun.”

²²Basa boema, hataholi la lo hataholi esa pokek ma hala tak, nana dula dale mangalau ka, koasa nan. Yesus tao nahai hataholi ndia, de nalosa ana hapu kokolak nalelak ma nita no malole.

²³Basa hataholi la dodoo doa kana de beekola lae, “Fafa'ka ma, Hataholi ia nde Dauk anan fo, nanaheluk ndia do?”

²⁴ Lelek hataholi Farisi la lamanene dede'ak ndia boema lae, “Hataholi ia, hapu usiheni dula dale mangalauk ndia, nana Baalzebul, fo nitu mangalau kala malanga na, ana fe basan koasa ndia so.”

²⁵Tehu Yesus bubuluk hataholi Farisi la dale aafi na. Da'di nafa'das nae, “Metema nusa ina esa, hea ba'en neu bubua-buak fo esa musu no esa soona, neukose nusa ina ndia, ta nakatatakak fa. Boema kota esa, do uma lo esa, heaba'en fo esa musu no esa soona, neukose kota do uma lo ndia, nakalulutuk.

²⁶Leondiak boe, nai nitu la nusan dale. Metema bubuak esa usi bubuak esa soona, neukose nitu la nusan ndia heaba'en, fo nakalulutuk.

²⁷Emi mafa'da mae, Au hapu usiheni dula dale mangalau ka, nana Baalzebul koasa na. Metema leondiak soona, emi ana mana tunga mala, ala usiheni dula dale mangalau kala, ninik see koasa na. Hu ndia de, emi ana mana tunga mala nde fe buti lae, emi nde sala.

²⁸Tehu Au usiheni dula dale mangalau kala, ninik Manetualain Dula Dale na koasa na. Fo dede'ak ndia, sosoa na nae, Manetualain mulai paleta nai emi tala'da so.

²⁹Tao leo bee fo, hataholi a hapu masok leo hataholi mabe'i-balakaik esa uman dale neu fo namanako hata-heton, metema ana ta henge nakahuluk hataholi mabe'i-balakaik ndia fa? Basa ndia soona, besa ka namanako na hataholi ndia hata-heton.

³⁰ Hataholi see ta nok au fa soona, te'e-te'e ana lena-la'ban Au. Ma hataholi see ta tulu-fali Au fa soona, te'e-te'e ana tao nakalulutuk Au tatao-nono'ing!

³¹Hu ndia de bubuluk leona te, metema see tao sala-singok, boema ana kokolak dede'a nakamumulu-nakamamaek soona, ana hapu do'o do ampon! Tehu metema nakamumulu-nakamamaek Manetualain Dula Dale na soona, ana ta hapu do'o do ampon fa!

³² Metema hataholi a, ana kokolak dede'ak esa, fo ana lena-la'ban Ana Hataholi ka soona, ana hapu do'o do ampon, tehu metema nakamumulu-nakamamaek Manetualain Dula Dale na soona, ana ta hapu do'o do ampon fa, nau nai besak ia do nai fai mate'e ka boe!”

³³ “Ai huu na nalole soona, neukose naboa boa malole. Metema ai huu na ta nalole fa soona, neukose boa na boeo ta malole a fa. Ita bubuluk ai esa nalole do ta nalole, neme ai ndia boa na mai.

³⁴ Emi hataholi mangalauk, na tao leo bee fo emi hapu kokolak dede'a malole, metema emi hataholi mangalauk? Hata fo bafa ka kokola kana, ndia nde kalua neme dale ka mai!

³⁵Hataholi malole a, ana kokolak dede'a malole, nanahu dale na henuk no malole a. Nasafali na, hataholi mangalau ka, ana kokolak dede'a mangalauk, nanahu dale na henuk no mangalau ka.

³⁶Da'di, mafandendelek te: neu Fai Mate'e ka, hataholi a esa-esak nataa, ndia hala-kokola mangalau nala.

³⁷Nanahu emi hala-kokolam nde nanapakek soaneu nafa'da, ade emi masalak do ta.”

³⁸ Basa boema mese agama de'u bee ma hataholi Farisi la lae, “Ama Mesen, ami hii mita Ama tao manda'di beuk.”

³⁹ Boema Yesus nataa nae, “Hataholi besak ia la, mangalau na seli Emi moke Au tao manda'di beuk do? Neukose Au ta fe emi manda'di beuk esa boen, ta'da fe'e mana da'di beuk fo Nabi Yunus a, la'o la'di nana.

⁴⁰ Yunus leo lele'dok telu le'odaek telu neme i'a matua ina tein dale. Leondiak boe, Ana Hataholi ka, neukose Ana leo lele'dok telu le'o daek telu nai dae dale.

⁴¹ Neu Fai Mate'e ka te, neukose hataholi Niniwe la, ala fo'a sama-sama lo hataholi besak ia la, fo ala kalaa kasa. Nanahu hataholi Niniwe sila la tuka tei-sale dale leme sala-singo nala mai, nai lelek fo Yunus tui-benga fes ala. Tehu besak ia, hapu hataholi nai ia, ba'u lena Yunus!

⁴² Neu Fai Mate'e ka te, ina mane ka neme nusa Kona mai, fo neukose ana fo'a no hataholi besak ia la, fo ana kalaak asa. Nanahu soaneu ana nau namanene Salomo fo hataholi manatee tenok ndia, nanoli-nafa'dan, de ina manek ndia, ana la'ok doo na seli neme daebafa ka pe'da na mai. Tehu besak ia, hapu hataholi nai ia, ba'u lena Salomo!”

⁴³“Metema dula dale mangalau ka, la'oela hataholi esa soona, dula dalek ndia ana la'ok nafeo basa mamana ma'dak lala'ena, fo ana sanga mamana hahae aok, tehu ana ta hapu fan.

⁴⁴Hu ndia de, ana dodoo nae, ‘Malole lenak au falik seluk leo au la'oela uma u.’ Lelek fo ana losa uma ndia te, uma ndia louk, balisi, ma nanaito-ato matalololek.

⁴⁵Boema ana fali de, nalo no seluk dula dale mangalauk hitu, mangalau nala lena heni ndia. Basa boema ala masok leo hataholi ndia dalek leu de ala leo leme ndia. Neu mate'e na, hataholi ndia ha'da tataon, mangalau ba'u lena heni makasososa na. Ha'da tatao matak leondia ka, ana da'di neu hataholi mangalauk besak ia la boe.”

⁴⁶Yesus bei kola-kola no hataholi makadotok sila la te, inan no tolanoo nala mai. Lapadeik ka'da deak. Boema ala sanga enok fo ala hapu kokolak lon.

⁴⁷Boema hataholi esa neme hataholi makadotok sila la tala'da mai, de neu nafa'da Yesus nae, “Ama, Ama inan ma Ama tolanoo nala lai deak. Ala sanga kokolak lo Ama.”

⁴⁸Tehu Yesus naen nae, “Au inang ma au tolanoo ngala nde see ka?”

⁴⁹Boema Yesus natu'du leo ana mana tunga nala neu de nae, “Au inang ma Au tolanoo ngala nde hataholi ia la.

⁵⁰Hataholi mana tao tunga Au Amang manai nusa so'da ka hihii-nanau na, hataholi ndia nde da'di Au tolanoo toung, Au tolanoo inang, ma Au ina nga.”