Read Termanu MATEOS 13 Bible Online

MATEOS 13 - Termanu bible

MATEOS 13

¹Nai faik ndia boe, Yesus la'oela uma ndia, boema neu leo dano a su'u na neu de nangatuuk neme ndia.

² Boema hataholi makadotok mai lakabubua leme Yesus boboa-kaisun, hu ndia de, neu nangatuuk neu ofak dale, tehu hataholi makadotok sila la lapadeik lai dano a su'u na.

³Boema Yesus nanolis dede'ak makadotok ninik nakandandaak. Nae, “Hataholi mana tao tina-osi esa, neu nggali bini-ngge.”

⁴“Lelek ana nggali bini-nggen, boema nggelok tu'da lai enok lain. Boema manupui la mai de, la'a heni bini-ngges sila la.

⁵Hapu nggelok tu'da lai dae mabatuk lain, fo dae isi na ka'da faa anak. Bini-ngges sila, ala moli no lai-laik hu ka nde dae ni'i anak ndia.

⁶Tehu neu lelek fo le'do a namatetu, boema nupu nala mulai male, de basa boema lamatuu de mates, nanahu oka nala ta tola dema ka fa.

⁷Hapu nggelok tu'da lai dila-nggauk tala'da. Dila-nggauk moli de ala aangu nupuk sila la nalosa mates.

⁸Tehu hapu nggelok tu'da lai dae maisi-maminak lain, boema labuna-laboa; Neu fai keketu-kokolun boema, ala hapu nggelok natun esa, nggelok nee hulu ma nggelok ala hapu didikuk la'i telu hulu.”

⁹Yesus tui basa nakandandaak ndia boema nae, “Metema see madi'idok soona, mamanene!”

¹⁰Basa boema Yesus ana mana tunga nala mai de latanen lae, “Te tao le'e de, metema Ama kokolak no hataholi ba'u ka soona, Ama kokolak pake nakandandaak?”

¹¹Boema Yesus nataa nae, “Nana Manetualain fe basa emi baba'e-babati malole, soaneu emi malelak bibila-babaak la'eneu tao leo beek fo Manetualain paleta, tehu sila soona ta.

¹² Nanahu hataholi mana manuu basa ka, neukose ala fen ba'u ka seluk, fo ana hapu nakalena. Tehu hataholi fo ta nanuu hata esa boen soona, metema bei nanuu faa anak nai ndia soona, neukose nanaho'i nak.

¹³Hu ndia de, metema Au kokolak o hataholi ba'u ka soona, Au pake nakandandaak, nanahu sila lita, tehu sama leo hataholi mana nita ta kala; boema lamanene, tehu sama leo hataholi mana mamanene ta kala, de ta lalelak fa.

¹⁴ No enok ndia, hata fo ela nabi Yesaya nafa'da ka, ana da'di. ‘Manetualain nafa'da nae: Neukose lamanene lakandoo, tehu ta lalelak fa; neukose ala taoafik lakandoo, tehu ala ta lalelak hata fo ana da'di fa.

¹⁵Nanahu hataholi ia la, dudu'a-aafin nala pa'an so, di'idoo nala pakes so, ma mata nala lasusungu kana so. Dede'ak ia ana da'di, fo ela mata nala boso lita, ma di'idoo nala, boso lamanene, dudu'a aafin nala, boso lamatane, fo ela, ala boso fali leo Au mai, fo Au boso tao ahais.’ ”

¹⁶ Boema Yesus nafa'da ana mana tunga nala nae, “Tehu emi maua-manalek manseli, nanahu emi mita ma mamanene te'e-te'e.

¹⁷Mafandendelek te, nabi ba'u ka, ma hataholi mana tunga Manetualain hihii-nanau na, ala hii lita hata fo emi mitan besak ia, tehu ta lita fan. Ala hii lamanene hata fo emi mamanenen besak ia, tehu ta lamanene fan.”

¹⁸“Mamanene matalolole nakandandaak la'eneu mana sele nggali a sosoa-ndandaan leona.

¹⁹Bini-ngges fo mana tu'da nai enok lai na, nakasasama na leo hataholi fo namanene halak la'eneu Manetualain paleta tao leo beek, tehu ta nalela kana fa. Boema Nitu Mangalauk ndia, ana mai de, natona nini hata fo nanasele-nggali basak nai dale nala dalek so.

²⁰Bini-ngges fo mana tu'da nai dae mabatuk lai na, nakasasama na leo hataholi fo namanene halak ndia, tutika ana sipo kana no namahokok.

²¹Tehu halak ndia ta nahuu-naoka nai dale nala dalek fa, nalosa ana ta hapu nakatatakak nala doo ka fa. Leondiak ala hapu doidosok, susa-soe, ma fefepa-lili'uk, nanahu dede'a-kokolak sila la, tutika ala fali deak leona.

²²Bini-ngges fo mana tu'da nai dila-nggauk tala'da, nakasasama na leo hataholi fo namanene halak sila la, tehu dale nala laba'e la'eneu so'da nala, ma ala hii ka'da laso'da lai hahapu-dadai mana dai lena ka dalek. Hu ndia de, halak maneme Manetualain mai a, nananakahapik nai dale nala dalek, de nalosa ta nabuna naboa fa.

²³Ma bini-ngges fo mana tu'da nai dae maisi-mamina ka, nakasasama na leo hataholi fo namanene halak ndia, de ana tao tungan. Boema labuna laboa ba'u ka, de nalosa nggelok hapu buna-boak natun esa, nggelok hapu neehulu, ma nggelok ala hapu didikuk la'i telu hulu.”

²⁴Yesus tui seluk nakandandaak esa, neu hataholi makadoto kala, nae leo ia, “Metema Manetualain paleta soona, heheo-hihilun sama na leo nakandandaak ia: Hataholi mana tao tina-osi esa, neu sele-nggali bini-ngges malole a nai tina.

²⁵Le'odaek esa, nai lelek fo hataholi la basa-basas sungu, boema tina lamatuak ndia musu noo na ana mai de, ana nggali fii de'ek leo gandu ma tala'da neu, boema ana la'o.

²⁶Lelek fo bini-ngges sila la, ala moli de mulai labuna-laboa boema, fii la boeo, ala moli lai nggadu ma tala'da.

²⁷Boema tina lamatuak ndia, hataholi mana'a ngga'di nala ala mai de, lafa'da tina lamatuak lae, ‘Tuan, ade Tuan ta sele-nggali bini-ngge malole nai Tuan tinan dale fa hetu? Na, da'di tao leo bee de, nalosa fii la moli lai tina dale boe?’

²⁸Boema tina lamatuak ndia nafa'das nae, ‘Musu noo ka tatao-nono'in ndia.’ Boema tina lamatuak ndia, hataholi mana'a ngga'di nala lafa'da selu kana lae, ‘Tuan nau ami meu fe'a heni fii sila la do?’

²⁹Tehu tina lamatuak ndia nafa'das nae, ‘Bosok, nana metema emi fe'a fii la soona, neukose emi fe'a minin no gandu ma boe.

³⁰Neme na fo, ala moli lakabubua losa fai ketu-kolu ka soona, de'i fo au afa'da hataholi mana ketu-kolu la, fo ala fe'a lakahuluk fii la, fo ala puputus, basa soona, hotu henis. Basa ndia soona, besa ka lakaduduluk gandu ma la fo tadais leo soka dale neu.’ ”

³¹Yesus tui seluk nakandandaak esa neu hataholi makadotok sila la, nae leo ia, “Metema Manetualain paleta soona heheo-hihilun sama na leo nakandandaak ia: Hataholi esa, ana ho'i nini ai sawi de'ek esa de, neu selen leo tinan dale neu.

³²Ai sawi ia nde bee na ai de'ek esa, lutuanak nanseli. Tehu metema ana moli fo namatua soona, ba'u lena basa bubu'u-palusa lala'ena. Huu na, ba'u na seli, de nalosa manupui la mai landunu lai ndananala.”

³³Yesus tui seluk hataholi makadotok sila la, nakandandaak fe'ek esa seluk nae, “Metema Manetualain paleta soona, heheo-hihilun sama leo inak esa ana ho'i na lalu tei ka fo ana sese'do kana no ha'de sopuk fafa'kama kilo duahulu, tehu ha'de sopuk kilo kaduahuluk ndia, basa-basan sa'e!”

³⁴Yesus nanoli basa sila la neu hataholi makadoto kala, ninik nakandandaak.

³⁵ No enok ndia, hata fo nabi la lafa'da basa ka ana da'di nae, “Metema Au kokolak o hataholi sila la soona, Au pake nakandandaak; neukose Au tui-benga dede'a nananafuni kala, mulai neme daebafak ia dada'di na mai.”

³⁶Basa ndia boema, Yesus la'oela hataholi makadotok sila la, de neu leo uma dale neu. Boema ana mana tunga nala mai de lafa'dan lae, “Soba Ama mafa'da mangalele'do fe ami, nakandandaak fo fii moli nakabubua no gandu ma, sosoa-ndandaan dei.”

³⁷Boema Yesus nataa nae, “Hataholi mana sele-nggali bini-ngge malole ndia, nde Ana Hataholi ka.

³⁸Tina ndia nde daebafak ia. Bini-ngges malole sila la nde hataholi fo, ana da'di Manetualain hataholi kamahehele nala. Boema fii sila la nde hataholi fo, ala lok nitu a.

³⁹Boema musu nook fo mana sele-nggali fii sila la, nde Nitu a. Fai keketu-kokolu ka, nde Fai Mate'e ka, ma hataholi mana ketu-kolu la, nde ata nusa so'da kala.

⁴⁰Sama leo, ala puputu lakabubua fii la fo ala hotu henis nai ha'i dale a, leondiak boe, neu Fai Mate'e ka te leondiak boe.

⁴¹Ana Hataholi ka neukose nadenu ata nusa so'da nala, fo laloo lakabubua basa Manetualain hataholi kamahehelen, fo manini sala-singok fe hataholi fe'e kala ma basa hataholi mana tao tatao-nono'i mangalau kala,

⁴²nanatu'uk leo la'o mana pila lo'a-lo'a ka dalek leu; fo nai ndia neukose ala kii-makaleleu ma ala doidoso.

⁴³Ma hataholi mana tao tunga Manetualain hihii-nanau nala, neukose landela-lasa'a, sama leo le'do a nai sila Aman Manetualain Daebafa Beun dale. Ba'eneu see madi'idook soona, mamanene!”

⁴⁴“Metema Manetualain paleta soona, heheo-hihilun sama leo nakandandaak ia: hapu buas esa, nananatoik nai dae dale. Boema hataholi esa ana kali hapu buas ndia. Tehu nakadofu falik buas ndia leo dae dale neu. Hu ka nde hataholi ndia namahoko nanseli boema ana fali ne'un de nase'o heni basa hata-heton lala'ena, boema ana asa na dae ndia.”

⁴⁵“Metema Manetualain paleta soona, heheo-hihilun sama leo nakandandaak ia! Hataholi mana dangan esa, ana sanga poemata mana'a hiik.

⁴⁶Lelek fo ana hapu poemata de'ek esa, mana'a hiik nanseli, boema ana fali ne'un lai-lai, de nase'o heni basa hata-heto nala, de ana asa na poemata de'e kisak ndia.”

⁴⁷“Metema Manetualain paleta soona, heheo-hihilun lakandandaa kana no ala po'i pu'a ka leo dano dale neu, boema nala i'a mata-mata kala.

⁴⁸Dala ndia henun boema, mana dolu-dala, an hela dala ndia, leo ma'dak lain mai, de ana hehele kofe'ek i'ak sila la: I'a malole bee soona, ala taon leo sosolok dale neu, ma i'a mangalauk bee soona, ana tapa henin.

⁴⁹Leondiak boe, neu Fai Mate'e ka te, neukose ata nusa so'da kala, ala ta'da fe'e hataholi mangalau kala leme hataholi mana tao tunga Manetualain hihii-nanau na.

⁵⁰Basa soona, ala tapa hataholi mangalauk sila la leo tasi ha'ik dale neu, fo ala kii-makaleleu ma ala doidoso lai ndia.”

⁵¹Boema Yesus natanes nae, “Ade emi malelak basa dede'ak sila la do ta?” Lataa lae, “Ami malela basan so Ama!”

⁵²Boema Yesus nafa'das nae, “Hu ndia de mese agama see, fo ana da'di Manetualain hataholi kamahehelen soona, hataholi ndia sama na leo uma lamatuak esa, fo ana kalua bua beu palan neme petin dale mai.”

⁵³Yesus tui basa nakandandaak sila la boema, Ana la'oela mamanak ndia,

⁵⁴de Ana fali leo nggolo-ta'dun neu. Ana losa boema, nanoli neme uma mamasok dale, de hataholi sila la, ala dodoo doa kana, boema beekola lae, “Hataholi ia, hapu malelak ia neme bee mai? Ma Ana hapu koasa neme see mai, de Ana tao manda'di beuk?

⁵⁵Ade tuka ai a, ana na ta nde ndia fa hetu? Ade inan nde Maria ndia, boema tolanoo nala nde, Yakobis, Yusuf, Simon, ma Yudas hetu?

⁵⁶Ma tolanoo ina nala boeo, ala leo lai ia boe hetu? Te nana, Ana hapu basa malelak sila la, leme bee mai?”

⁵⁷ Hu ndia de, ala ta nau sipok Yesus fa. Boema Yesus nafa'das nae, “Ala fe ha'da holomata neu nabi esa, nai basa mamanak lala'ena, ta'da fe'e nggolo isi nala, ma uma isi nala.”

⁵⁸Hu ndia de, Yesus ta tao mana da'di beuk ba'u ka nai ndia fa, nanahu ala ta nau lamahele fan.