Read Termanu MATEOS 15 Bible Online

MATEOS 15 - Termanu bible

MATEOS 15

¹Hataholi Farisi bubuak esa ma mese agama de'u bee leme Yerusalem, fo ala mai leo Yesus mai. Latanen lae,

²“Tao le'e de O ana mana tunga mala la'olena ita bei-ba'i kai nala ha'da na? Lelek sanga la'a-linu soona, ta lafui oe lakahuluk, tunga nakanenete ka fa?”

³Boema Yesus nataa nae, “Ma tao le'e de emi boeo la'olena Manetualain paleta na, nana ka'da emi nau tunga bei ba'ikai mala ha'da na?

⁴ Nanahu Manetualain nafa'da nae, ‘Fe ha'da holomata neu ina amam,’ ba'eneu ‘See fo ana kokolak dede'a mangalauk neu ina aman soona, muse huku nisan.’

⁵Tehu emi manoli mae, metema hataholi nafa'da ina aman nae, ‘Hata fo au muse fen neu au ina ama nga, au fe henin leo Manetualain neu so,’

⁶soona boso makaseti hataholi ndia fo ana fe ha'da-holomata neu ina aman bai. Da'di hu ka nde emi bei-ba'i kai mala ha'da na, de emi makadadaek Manetualain dede'a-kokolan.

⁷Emi ia hataholi mana dea-dale kala! La'en la'iesa kana, hata fo Yesaya nafa'da elan soaneu emi fo nde nae,

⁸ ‘Manetualain nafa'da nae leo ia: Hataholi sila ka'da lakaluku-laktele neu Au, ninik ka'da hala-kokola nala, tehu dale nala doo ka neme Au mai.

⁹Palsuma la'iesa kana, ala sene-do'ok neu Au, nanahu nakanenete hataholi daebafa ka, nde sila lanoli nana, nonoo ka bai de, Au nakaneneteng sila.’ ”

¹⁰Basa boema Yesus nalo na hataholi la de nafa'das nae, “Mamanene leona fo malelak!

¹¹Fo mana masok leo bafak dale neu a, ta tao na hataholi a nanggenggeo fa; ka'da mana kalua neme bafak dale mai a, ndia nde nakadada'dik manggenggeo ka.”

¹²Boema Yesus ana mana tunga nala mai de lafa'dan lae, “Ade Ama bubuluk hataholi Farisi la dale nala ba'i hana, nai lelek lamanene Ama kokolak nae leondia do ta?”

¹³Boema Yesus nataa nae, “Bubu'u-palusa fo Au amang manai nusa so'da ka, ta nde sele nana fa soona, neukose nanafe'a henik.

¹⁴ Lokopae hataholi Farisi sila tao. Sila mauli-malanga poke kala; de metema hataholi poke ka hela-nole seluk hataholi poke ka soona, neukose duas tu'da leo oe lolok dale leu.”

¹⁵Boema Petrus nae, “Ama sue na mafa'da mangalele'do fe ami, nakandandaak ndia sosoa-ndandaan dei!”

¹⁶Yesus nataa nae, “Ade emi beita malela kana boen?”

¹⁷Ade emi ta bubuluk fa te, hata fo ana masok leo bafak dale neu, fo ana kona nakandoo leo teik dale neu, fo basa soona ana kalua seluk fa?

¹⁸ Tehu mana kalua neme bafa ka mai a, ana kalua neme dale ka mai; fo ndia nde tao na hataholi a nanggenggeo.

¹⁹Nanahu dudu'a-aafi mangalau ka da'di neme dale ka mai, fo ana tao na hataholi a nanisa, hohonge, sosoa-piao, namanako, fe sakasii pepekok ma nakasasa'ek dede'ak neu hataholi.

²⁰Dede'ak sila la nde tao na hataholi a tao sala ka, te ta nde ta'a te ta tafui oe fa.

²¹Basa boema, Yesus la'oela mamanak ndia, de neu leo nusak mana deka no kota Tirus ma kota Sidon a neu.

²²Boema ina Kana'an esa nai nusak ndia, ana mai de nalo bou-bou nae, “Dauk anan, sue-lai au dei! Te dula dale mangalau ka, ana masok nai au ana fe'o nga dalek, de namahe'di belak.”

²³Yesus ta nataa inak ndia makandondook fa. Boema ana mana tunga nala mai, de ala dokodoe neun lae, “Ama, madenu inak ndia fali ne'un te ka'da nakalupu nai ita dea na!”

²⁴Boema Yesus nataa nae, “Au nananadenuk ka'da soaneu leoina Israe la, lena-lenak soaneu mana sala eno kala.”

²⁵Boema inak ndia mai de ana senek neu Yesus mata na, de nafa'dan nae, “Fali ma au dei, Tuan.”

²⁶Yesus nataa nae, “Metema ita ho'i ta ni'i ana la nana'a na. Fo ita tu'un leo busa neu soona, ndia ta malole fa.”

²⁷Inak ndia nataa nae, “Tete'e ka Tuan, tehu busa boeo na'a nana'a elak fo mana tu'da leme lamatua na mein lain a mai boe.”

²⁸Boema Yesus nafa'dan nae, Ina, o namahehele ma te'e-te'e ba'u na seli. Neme na fo, hata fo o mahii kana, ana da'di leona! No hate matak ndia boe, inak ndia ana na, ana hai.

²⁹Yesus la'oela mamanak ndia boema Ana la'ok ndolo tunga dano Galilea su'u na. Basa boema Ana kae leo pupukuk esa lain neu, de nangatuuk neme ndia.

³⁰Boema hataholi makadotok mai, lo hataholi ei hela kala, poke kala, lu'u kala, nggoa kala, boema hataholi kamahe'di fe'ek ba'u ka seluk bai. Langapepe'uk hataholi kamahe'dis sila la leu Yesus mata na de Ana tao nahai la'i esa kasa.

³¹Hataholi makadotok manai sila la ala dodoo doa kana lanseli, nai lelek lita hataholi hala ta kala kokolak, ei hela kala hai, lu'u kala la'ok, ma hataholi poke kala lita. Boema ala koa-kio leoina Israe la Manetualai na.

³²Basa boema Yesus nalo na ana mana tunga nala de nafa'das nae, “Au dale nga tu'da neu hataholi makadotok ia la. Faik telu dale na, ala sama-sama lo Au, de besak ia basa nana'a nala so. Au ta nau po'ilota kasa fali lo tei lou nala fa, te boso nalosak ala sapala'o nai enok.

³³Boema Yesus ana mana tunga nala latanen lae, Tehu ita nai nusa mana pasi fe'ek ia, de ita hapu nana'a ka nai bee fo ata fe hataholi de'u-de'u basa ia la, la'a?”

³⁴Yesus natanes nae, “Emi mini loti biak de'ubee lai ndia?” Boema lae, “Loti hitu ma i'a lutuk boak de'u bee nde ia.”

³⁵Boema Yesus nadenu hataholi makadotok sila la langatuuk leu dae lain.

³⁶Boema Ana ho'i na loti kahitu kala ma i'a boa ka de'u beek sila la, de noke makasi neu Manetualain. Basa ndia boema Ana tete'i loti ma i'ak sila la, de Ana fes leo ana mana tunga nala, fo ala baba'e fen neu hataholi makadotok sila la.

³⁷Hataholi sila la basa-basas la'a losa lakabete. Basa ndia boema Yesus ana mana tunga nala, ala hehele lakabubua nana'a elak sila la basa-basas henu lepeneu hitu.

³⁸Leke ka'da touk fo mana'ak nai faik ndia dale na, hataholi lifun ha. Te beita leke ina kala lo ni'i ana la fa.

³⁹Basa boema Yesus nadenu hataholi makadotok sila la fali leona. Yesus mesa kana sa'e ofak esa de neu leo nusa Magada na neu.