Read Termanu MATEOS 16 Bible Online

MATEOS 16 - Termanu bible

MATEOS 16

¹ Hapu hataholi Farisi de'ube ma hataholi Saduki ala mai leo Yesus mai, fo ala sanga lakahihi kana. Ala loke Yesus tao manda'di beuk fo ana da'di buti nae, Ana mai neme Manetualain mai.

²Yesus nataa nae, “Metema le'do a sanga tenak soona, emi mafa'da mae, ‘Lalai a mana'a hiik, nana lalai a pila.’

³Ma nai fafai ana na emi mafa'da mae, ‘Faik ia neukose u'da na mai, nanahu lalai a pila ma nasakoko'a.’ Naa, emi hapu neuk ma hana oe faa ka ninik emi mete ka'da lalai a ta'du-tanan, te see ko na emi ta hapu neuk mala le'do fai ta'du-tanan fa!”

⁴ “Hataholi lelek besak ia la mangalau naseli, ma malena langa-masa'ba soo kala. Emi moke Au tao manda'di beuk, tehu neukose, Au ta tao fe emi manda'di beuk esa boen, ta'da fe'e mana da'di beuk Nabi Yunu sa.” Yesus kokolak basa nae leondia boema ana la'oelas leona.

⁵Lelek fo Yesus ana mana tunga nala losa dano a selik, boema besa ka ala bubuluk lae, lafandele henin de ta lini loti fa.

⁶ Boema Yesus nafa'das nae, “I'akouk soaneu hataholi Farisi la ma hataholi Saduki la lalutei na.”

⁷Yesus ana mana tunga nala lamanene Yesus hala-kokolan ndia boema, esa mulai kokolak no esa nae, “Ana kokolak nae leondia, nana ita ta tini loti fa do.”

⁸Yesus bubuluk hata fo ala kokolak ndia. Da'di nafa'das nae, “Te tao le'e de, emi matatane aok la'eneu emi ta mini loti fa? Emi namahele ma beita dai fa!

⁹ Emi ta malela kana boen do? Ade emi ta mafandele loti kalimak fo, Au tete'i fen neu hataholi lifun lima la'a ndia fa do? Boema la'a ela loti la, emi hehele ma lepeneu de'u bee ndia fa do?

¹⁰ Ma tao leo beek boe no loti bia kahituk fo hataholi lifu kaha kala la'a ka? Emi hehele makabubua la'a ela loti la lepeneu de'ubee?

¹¹Tao le'e de emi beita malelak losa, Au ta kokolak o emi la'eneu loti ndia fa? I'akouk hataholi Farisi la ma hataholi Saduki la lalu tei na!”

¹²Neu makabui na boema besa ka Yesus ana mana tunga nala bubuluk lae, Yesus nadenus fo ala i'akouk ndia nde bee soona, ala i'akouk neu lalu teik fo ala paken neu loti a nde ndia fa, te ala i'akouk neu hataholi Farisi la ma hataholi Saduki la, nanoli nala nde ndia.

¹³Basa ndia boema, Yesus neu leo nusak mana dekak no Kaisarea Filipi neu. Ala losa naa boema natane ana mana tunga nala nae, “Tunga hataholi la hala nafafa'da na, Ana Hataholi ka, see ndia?”

¹⁴ Boema ana mana tunga nala lae, “Hataholi nggelok lafa'da lae, Yohanis Mana Salani ka, nggelok lae, Elia. Tehu nggelok bai soona lae Yeremia, do nabi esa nde ndia.”

¹⁵Boema Yesus natane ana mana tunga nala nae, “Tehu tunga emi hahapu ma, Au ia see?”

¹⁶ Simon Petrus nae, “Ama nde Mane Mana Fe So'da ka, ma Manetualain Anan fo Maso'da ka.”

¹⁷Boema Yesus naen nae, “O maua-manale manseli Simon, fo Yona anan! Nana hataholi daebafak ta nde nafa'da dede'ak ndia neu o fa, tehu Au Amang manai nusa so'da ka.

¹⁸Hu ndia de bubuluk leona te, O nde bee na Petrus, fo batu matea-mahelek. Nai batu netes ndia lain, nde neukose Au apadedeik Au mamaso nga, fo ta hapu sengi fan, leomae mamate sa boe!

¹⁹ Neukose Au fe Manetualain Daebafa Beu na nggoe na neu o, fo hata fo o kena-ka'in nai daebafa ka soona, nanakena-ka'ik nai nusa so'da ka boe. Boema hata fo o mafa'da mae, la'en nai daebafa ka soona, lafa'da lae, la'en nai nusa so'da ka boe.”

²⁰Basa ndia boema Yesus fe ana mana tunga nala nasanene'dak, fo boso lafa'da su'di see a lae, Ndia nde Mane Mana Fe So'da ka.

²¹Mulai neme hatematak ndia mai boe, Yesus kokolak no mangale'dok no ana mana tunga nala nae, Au muse u leo Yerusalem u, fo Au la'ola'di doidosok ba'u ka neme mauli-malanga nala ma malanga imam ala, boema mese agama la. Neukose ala taolisa Au, tehu neu fai katelu na soona, neukose Au aso'da falik.

²²Boema Petrus hela Yesus leo boboak neu de ana ka'in nae, “Boso nalosak dede'ak ndia ana da'di neu Lamatua ka. Sa'di leo bee na Manetualain nadook dede'ak ndia, Lamatuak!”

²³Boema Yesus lipa leo dea neu de nafa'da Petrus nae, “La'o meme ia mai mana dudungu-papau ko nei. O mapalani mapanggengge Au ou! O dudu'a-aafim ndia dudu'a-aafi hataholi; daebafak te Manetualain dudu'a-aafin ta ndia fa!”

²⁴ Basa boema Yesus nafa'da ana mana tunga nala nae, “Hataholi fo ana nau tunga Au soona, muse nafandele heni basa ndia paluun lala'ena fo ana lu'a ai nggange na, ma ana tunga nahele Au.

²⁵ Nanahu hataholi mana ho'u nahele so'da na, neukose namopo so'da na. Tehu hataholi fo, ana tunu-hotu so'da na hu ka nde Au, soona neukose ana hapu so'da na.

²⁶Ade hataholi esa hapu nanalak hata, metema ana hapu daebafa ka lala'ena, tehu namopo so'da samane na? Ade so'dak ndia hapu tukan ninik hata esa do?

²⁷ Ta doo ka so'on te Ana Hataholi ka sama-sama no ata nusa so'da nala, neukose ala mai no Ama ka koasa na. Nai lelek ndia, neukose Ana balas hataholi a esa-esak, nandaa no tatao-nono'in.

²⁸Bubuluk leona! Te nai emi manai ia la dalek, hapu nggelok ta mate fa, metema ana beita nita Ana Hataholi ka fali ma'in da'dileo Mane ka.”