Read Termanu MATEOS 18 Bible Online

MATEOS 18 - Termanu bible

MATEOS 18

¹ Lelek ndia, Yesus ana mana tunga nala mai de latanen lae, “See ka nde lafa'da lae matua ba'u lena nai Manetualain hataholi kamahehele nala dalek?”

²Boema Yesus nalo na ni'iana esa, de napadedei kana neu mata nala.

³ Boema nafa'das nae, “Mamahele leona! Ka'da metema emi da'di masafali sama leo ni'iana ia soona, neukose emi da'di lima eik neme Manetualain hataholi kamahehele nala mai.

⁴Hataholi fo nakaloe-nakadae ao ina na, fo ana da'di sama leo ni'iana ia soona, ndia nde matua ba'u lena nai Manetualain hataholi kamahehele nala dalek.

⁵Ma hataholi fo ana sipok ni'iana fo leo ia ka hu ka nde Au, soona sosoa na nae, ana sipok Au.”

⁶“See ka nde tao na hataholi esa neme hataholi kadi'ianak ia la ta namahele Au so'on soona, malole lenak metema pa'a batu tututu matua ina esa neu botolii na, fo makabobolok henin leo tasi oe madema esa dalek neu.

⁷Soe matua ina ba'eneu daebafak ia, nanahu dede'a-dede'ak fo mana tao na hataholi a nasala-nasingo a. Memak basa dede'ak matak leo sila kala, neukose hapu tataas esa, tehu soe ba'eneu hataholi fo mana tao-no'i nana!

⁸ Metema o lima ma do o ei ma tao na o masala-masingo soona, tete man fo tapa henin. Fo malole lenak o maso'da mo Manetualain no lima seselik do ei seselik, neme ala tapa o leo tasi ha'ik dale neu no o limam duas do o eim duas.

⁹ Ma metema o mata ma tao na o masala-masingo soona, e'do man fo tapa henin. Fo malole lenak o maso'da mo Manetualain no mata seselik, neme ala tapa o leo tasi ha'ik dale neu no o matam duas.”

¹⁰“I'akouk! Fo boso makamumulu-makamamaek hataholi esa boen neme hataholi kadi'ianak ia la mai. Nanahu mafandendelek te, sila ata nusa so'da nala lahele tataas esa lai Au Amang manai nusa so'da ka matan. [

¹¹ Nanahu Ana Hataholi ka Ana mai soaneu Ana fe so'dak neu hataholi mana mopo kala!]

¹²Emi hahapu ma leo beek? Leo uni ka hataholi esa bi'ilopon natun esa, boema mopo esa. Neukose hataholi ndia ana tao beek? Mae tao leo bee o neukose ana la'oela bi'ilopo kasiohulu siok sila la, fo neu sanga bi'i mana mopok ndia.

¹³Ma metema ana hapu falik bi'ilopo mana mopok ndia soona, mamahele Au leona te, neukose namahoko nanseli soaneu bi'ilopo kisak ndia, ba'u lena bi'ilopo kasiohulu sio mana mopo ta kala.

¹⁴Leondiak boe emi Amam manai nusa so'da ka, Ana ta nau hataholi esa neme hataholi anak ia la la'ok sala fa.”

¹⁵ “Metema o tolanoo ma nasala-nasingo neu o, soona muu fo mafa'da sala na. Fo ka'da emi dua mesa-mesa ma tao dede'ak ndia no denge-dengek. Metema ana tunga o hala-kokolam soona, o hapu falik o tolanoom ndia so.

¹⁶ Tehu metema ta soona, mo seluk hataholi esa do dua. Nanahu nai Susula Malalaok dale, nanasulak nae, ‘Paluu, nai dae, hataholi dua do telu sakasii, fo lafa'da hataholi nanakalaak esa sala na.’

¹⁷Metema ana ta nau sipok hataholi sila la nanoli-nafa'dan fa soona, mafa'da dede'ak ndia neu salani kala. Mate'e na metema ana ta nau sipok salani kala nanoli-nafa'dan sila la fa soona, bole tafa'da tae hataholi ndia sama leo hataholi mana susu bea do hataholi fo ta nalelak Manetualai na fa.”

¹⁸ “Bubuluk leona: te hata fo emi kena-ka'in nai daebafa ka, nanakena-ka'ik nai nusa so'da ka boe. Ma hata fo emi mafa'da mae ndoos nai daebafa ka soona, nananafa'da ndoos nai nusa so'da ka boe.

¹⁹Ma bubuluk boe: Te nai daebafak ia, metema nai emi dalek hapu hataholi dua lalahalak fo ala hule-haladoi soaneu su'di hata beek ndia boe, soona Au Amang manai nusa so'da ka, Ana sipok huhule-haladoik ndia.

²⁰Nanahu nai bee hataholi dua do telu lakabubua nanahu Au, soona Au nai hataholi sila la tala'da.”

²¹ Basa boema Petrus mai de natane Yesus nae, “Lamatuak, metema au tolanoong esa nasala-nasingo neu au, soona au muse fe do'o do ampon neun, la'i de'u bee? Ade losa la'i hitu do?”

²²Boema Yesus naen nae, “Ta, ta losa ka'da la'i hitu fa, tehu la'i hitu hulu la'i hitu!

²³Nanahu metema Manetualain paleta soona, heheo-hihilun sama leo nakandandaak ia: Manek esa ana nau ndia atan fo mana mahuta nana, ana bae ketu huta nala lala'ena.

²⁴Lelek fo ana mulai palisak boema lo atan esa, nahuta juta-juta,

²⁵de ana ta hapu bae nala fan. Da'di manek ndia, ana fe paleta fo lase'o ata ndia no saoana nala, ma basa hata-heton lala'ena, fo ana bae ketu huta nala.

²⁶Boema ata ndia neu de, ana senek neu manek ndia mata na de ana dokodoe nae, ‘Tuan, tuan boso haelai mamanasa ata ma dei. Te neukose ata ma, bae ketu huta nala lala'ena.’

²⁷Boema manek ndia sue atan ndia, de ana loseheni basa huta nala lala'ena.

²⁸Lelek fo ata ndia ana fali ne'un boema, natongo no nonoon esa bei ata ndia boe, fo nahutan ka'da lifun de'u bee. Boema ana ho'u na nonoon ndia de ana ki'du nan ma nafa'dan nae, ‘Bae ketu o huta mala leona!’

²⁹Boema nonoon ndia senek neu mata na de ana dokodoe nae, ‘Boso haelai mamanasa dei tolanoo, te neukose au baeketu au huta ngala!’

³⁰Tehu ata ndia ta nau sipok fa. Tehu noo ata ndia leo bui a neu de ala hukun, losa ana bae ketu huta nala.

³¹Lelek fo ata fe'e kala lita manda'dik ndia boema dale nala he'di sa, de leu lafa'da dede'ak ndia, neu mane ka.

³²Boema mane ka nalo na ata mangalauk ndia de nafa'dan nae, ‘Ata mangalau ko nei! Au loseheni basa o huta makadotom sila la, ka'da hu ka nde o dokodoe neu au.

³³Ade o dale ma ta kasian neu o nonoom ndia, sama leo au kasian neu o fa?’

³⁴Boema manek ndia namanasa nanseli, boema noo ata mangalauk ndia leo bui a neu fo ala hukun, losa ana baeketu basa huta nala.”

³⁵Yesus tui nate'e tutui na ninik dede'a ka nae leo ia, “Leondiak boe, Au Amang manai nusa so'da ka, neukose Ana tao emi esa-esak leondiak boe, metema emi ta fe do'o do ampon neu emi tolanoo ma no dale katematuak fa.”