Read Termanu MATEOS 19 Bible Online

MATEOS 19 - Termanu bible

MATEOS 19

¹Yesus nafa'da basa dede'ak sila la boema Ana la'oela Galilea, de neu leo nusa Yudea, nai Lee Yarden-na selik neu.

²Hataholi makadotok ala tungan. Nai hataholi makadotok sila la dalek, hapu hataholi kamahe'di sala boe, de Ana tao nahais leme ndia.

³Boema hataholi Farisi la mai fo sanga lakahihi'i kana. Latane Yesus lae, “Tunga ita agama na loholo-lalanen soona, Ade touk esa, bole elaheni saoinana ninik eno leo bee ka?”

⁴ Yesus nataa nae, “Ade emi beita lees mitan nai Susula Malalaok dale nanasulak nae, Mana makadada'dik hataholi daebafa ka, nai makasososa na nakadada'dik touk ma inak hetu?

⁵ Basa ndia boema nafa'da nae, ‘Hu ndia de, tou ka la'oela inan no aman, fo ana dadi esa no saoina na soona duas da'di esa.’

⁶Da'di duas ta hataholi dua so'on, tehu hataholi esa so. Hu ndia de, hata fo Manetualain tao basan da'di esa soona, hataholi daebafa ka, ta bole binga-ba'e fas.”

⁷ Boema hataholi Farisi la latanen lae, “Metema leondiak soona, tao le'e de Musa nanoli hataholi la, fo ala fe saoina na susula naelak, fo daenga ana ela henin?”

⁸Boema Yesus nataa nae, “Musa po'i emi maelak mo saoina mala nanahu nanoli doak emi. Tehu tunga ndo na, neme makasososan mai a ta leondiak fa.

⁹ Da'di mamanene dede'a ka nde ia: See elaheni saoina na, te se'ko na inak ndia ta leo-la'ok nasala fa, fo neu makabui na touk ndia sao seluk ina fe'ek soona, touk ndia ana hohonge ndia.”

¹⁰Boema Yesus ana mana tunga nala lafa'dan lae, “Metema saotou ka ma saoinaka, tututi-nanaton leondiak soona, malole lenak boso sao ana.”

¹¹Yesus nataa nae, “Ta basa hataholi la hapu sipok dede'ak ndia fa. Ka'da hataholi fo Manetualain naketu basa kala dei.

¹²Nanahu hapu hataholi nggelok ta saoana fa nana, hataholi sila nanabongik leondiak. Hapu nggelok boeo ala ta saoana fa nanahu hataholi fe'ek tatao-nono'in. Ma nggelok bai soona, ala ta nau saoana fa, fo ela ala hapu lalalau-laoono Manetualain. Ba'eneu see fo ana sipok nanolik ia soona, neme na fo ana sipo kana leona.”

¹³Boema hataholi la lo ana nala leo Yesus mai, fo Ana lalaa lima na neu ni'iana sila la langan lain, fo Ana hule-haladoi fes. Tehu Yesus ana mana tunga nala, lamanasa hataholi sila la.

¹⁴Boema Yesus nafa'da ana mana tunga nala nae, “Neme na fo ni'iana sila la mai leo Au mai! Boso kena-ka'is, nanahu hataholi leo ia kala, nde da'di lima-eik neme Manetualain hataholi kamahehele nala.”

¹⁵Boema Yesus lala liman na neu ni'iana sila la lain de Ana fes baba'e-papalak. Basa boema Ana la'oela mamanak ndia.

¹⁶Faik esa boema touk esa mai leo Yesus mai nafa'dan nae, “Ama Mesen, tatao-nono'i malole bee ka nde au muse tao-no'in, fo ela au hapu sipo so'da matetu ka ma mana ketu basa ta ka?”

¹⁷Boema Yesus nataa nae, “Tao le'e de o matane Au la'eneu hata bee ka nde malole a? Hapu ka'da Esa mesa kana nde malole a. Metema o hii maso'da soona, o muse tao tunga Manetualain paleta nala.”

¹⁸ “Paleta bee ka nde ndia?” Hataholi ndia natane Yesus nai leondia. Boema Yesus nataa nae, “Boso manisa, boso hohonge, boso mamanako, boso sakasii pepekok,

¹⁹ fe ha'da-holomata neu o inam no amam; ma sue-lai o nonoo hataholi ma sama na leo o sue-lai o ao ina ma mesa kana.”

²⁰Boema touanak ndia nae, “Basa paleta sila la au tao tungas so, te bei paluu seluk beek bai?”

²¹Boema Yesus nafa'dan nae, “Metema o nau matetu-mandaa soona, muu mase'oheni basa o hata-hetom lala'ena, fo fe doi na leo hataholi nuu ta-hata ta ka neu, fo daenga neukose o hapu hata-heto nai nusa so'da ka. Basa ndia soona, mai fo tunga Au!”

²²Tou muli-soluk ndia namanene dede'ak ndia boema ana la'o no dale he'dik, nanahu touanak ndia hataholi kamasu'i ina.

²³Boema Yesus nafa'da ana mana tunga nala nae, “Au afa'da neu emi te, tea na seli ba'eneu hataholi kamasu'i ka ana da'di lima eik neme Manetualain hataholi kamahehelen.

²⁴Ma Au afa'da seluk dede'ak esa ia neu emi nae leo ia; mu'dak la'iesa kana onta esa masok tunga ndandau ka bolo na, neme hataholi kamasu'ik esa, ana masok leo Manetualain Daebafa Beun dale neu.”

²⁵Lelek Yesus ana mana tunga nala lamanene kokolan ndia boema ala dodoo doa kana. Lafa'da Yesus lae, “Metema leondiak soona, see ka nde hapu so'da ka?”

²⁶Yesus nanganalos boema nae, “Soaneu hataholi daebafa ka soona, dede'ak ndia ana ta da'di fa! Tehu ba'eneu Manetualain soona, basa-basas mana da'dik mesan.”

²⁷Boema Petrus nae, “Mete dei, te ami la'oela basa ami hata-hetom lala'ena soaneu tunga Ama. De neukose ami hapu beek?”

²⁸ Yesus nafa'das nae, “Mamahele leona: Nai Daebafa Beu ka dalek, neukose Ana Hataholi ka nangatuuk neu kandela manen fo mandela-masa'a ka lain. Nai lelek ndia emi fo Au ana mana tunga ngala, neukose emi mangatuuk nai kandela mane kasanahulu dua kala lain, fo emi maketu-mala'di leoina Israe la leo ana kasanahulu dua nala!

²⁹Ma see la'oela uma-loon do tolanoo tou tolanoo inan, do ina aman, do upu-anan, do tina-osin nanahu Au soona, neukose hataholi ndia, ana sipo fali kana didikuk la'i natun esa. Ma neukose, ana sipo so'da matetu ka, ma mana ketu basa ta ka boe.

³⁰ Tehu hataholi ba'u ka besak ia lakahuluk, te neukose ala da'di hataholi makabuik, ma hataholi makabuik besak ia la, neukose ala da'di hataholi makahuluk.”