Read Termanu MATEOS 2 Bible Online

MATEOS 2 - Termanu bible

MATEOS 2

¹Bongi Yesus nai kota Betlehem, nai nusa Yudea nai lelek Mane Herode sa paleta. Nai lelek ndia, hapu hataholi malela nduuk telu leme dulu mai fo ala leo Yerusalem leu.

²Latane basa mamanak lala'e na lae, “Ala bongi ni'i ana fo Ana sanga da'di hataholi Yahudi la manen ndia nai bee? Ami mita nduu ka ana tii nai dulu so. Nduuk ndia ana da'di ta'du-tana esa nae, manek ndia nanabongik so Hu ndia de ami mai sangan, fo ami sanga sene-do'o kana.”

³Lelek fo Mane Herode sa namanene boema, ana nggenge nanseli. Leondiak boe, basa hataholi manai Yerusale mala lamanene halak ndia, boema ala nggenge beeno'u.

⁴Boema nalo nakabubua basa malanga ima mala lo mese agama Yahudi la de natanes nae, “Ala bongi Manek fo Manetualain helu ka nai bee?”

⁵Boema lae, “Nai kota Betlehem fo nai nusa Yudea. Nanahu nabi esa, ana sulak basan nae leo ia,

⁶ ‘Hai, basa hataholi manai Betlehem, fo nai nusa Yehuda, Ade o nusa ma, ta nusa anak nanseli fa, Nanahu neme o hataholi mala dalek, neukose mauli-malangan esa, nanabongik, fo nasulu-nahapa Au hataholi Israel ngala.’ ”

⁷Herodes namanene basa halak ndia boema no denge-dengek, nalo hataholi malela nduuk sila la de natanes nae, emi mita nduuk ndia, ndek fai hi'da ka.

⁸Basa ndia boema nadenus leu leo Betlehem leu. Ana helus nae leo ia, “Meu soona, sanga matalolole ni'iana ndia. Fo metema emi hapun soona, mai mafa'da au, fo daenga au boeo u sene-do'o kana.”

⁹Boema ala la'o leona. Lita seluk makahulu na lita nduuk mana tii neme dulu mai ndia. Lita nduuk ndia boema, lamahoko lalan seli! Nduuk ndia nakahuluk, de nate'e neme ni'iana ndia ndandaan lain.

¹¹Boema lakandoo leo uma dale leu de lita ni'iana ndia no inan Maria. Tutika ala senek de lakaluku-lakatele neu ni'iana ndia. Boema ala buka sila mamana pepe'da bua lo'an de, ala ho'i-la sila tutunu-hohotun de ala fen neu ni'iana ndia. Hataholi kateluk sila la lini lilopilas, boominik, ma aidaa tuu kaboominik.

¹²Manetualain fes nasanene'dak nai me'is esa dalek, fo daenga ala boso fali leo Herodes leu bai. Da'di, ala fali tunga enok fe'ek.

¹³Hataholi malela nduuk sila la la'o boema, Lamatua ka ata nusa so'dan esa natu'du ao na neu Yusuf nai me'is esa dalek nae, “Herodes tutu'u basa, ana sanga ni'iana ndia fo ana sanga taonisan. Hu ndia de fo'a leona, fo malai mo ni'iana ndia no inan leo Masir meu. Leo mahele meme naa, losa Au kokolak seluk o emi.”

¹⁴Yusuf nggenge de ana fo'a boema, le'odaek ndia boe no ni'iana ndia no inan leo Masir leu.

¹⁵ Ala leo leme ndia losa Herodes maten. Dede'ak ndia ana da'di, fo daenga nandaa no hata fo Lamatua ka nafa'da basan tunga nabi nala nae, “Au alo falik Au Ana nga neme Masir mai.”

¹⁶Nai lelek fo Herodes bubuluk hataholi malela nduuk sila la ke'dilan boema namanasa nanseli. Boema ana po'i paleta fo daenga do'dolisa basa ni'iana touana kala lala'ena. Mulai neme teuk dua leo dae neu. Mulai neme Betlehem ma nggolo titia-tatai nala. Dede'ak ndia nandaa no hataholi malela nduuk sila la hala nafafa'dan la'eneu lelek fo nduuk ndia ana to'da mai,

¹⁷Nandaa no hata fo Nabi Yeremia, nafa'da basan nae,

¹⁸ “Makaleleu kala nananamanenek nai kota Rama, hoo-nggu'u ka ma kikii ka. Rahel kii-makaleleu ana nala; Ana ta nau kokoe-nanasi fan nanahu ana nala ta kasa so.”

¹⁹Mate basa Herodes boema, Lamatua ka ata nusa so'dan esa natu'du ao na neu Yusuf neme Masir nai me'is esa dalek nae,

²⁰“Hataholi fo ana sanga taonisa ni'iana ndia, maten so. Hu ndia de, fo'a leona fo mo ni'iana ndia no inan fali leo Israel meu leona.”

²¹Yusuf fo'a boema no falik ni'iana ndia no Maria fali leo Israel leu.

²²Tehu neu makabui na, Yusuf namanene Herodes anamanen Arkelaus da'di manek nggati aman nai nusa Yudea, boema ana bii fali leo Israel neu. Tehu Lamatua ka nafa'da selu kana nai mei'is esa dalek besa ka ana fali leo nusa Galilea neu.

²³ Ana leo neme kota esa nai ndia na'de Nazaret. No enok ndia, hata fo nabi la lafa'dan la'eneu ni'iana ndia, ana da'di: “Neukose loken soona lae, Hataholi Nazaret.”