Read Termanu MATEOS 20 Bible Online

MATEOS 20 - Termanu bible

MATEOS 20

¹“Metema Manetualain paleta soona heheo-hihilun sama leo nakandandaak ia: Hataholi maosi angol esa ana kalua fafaik fo neu sanga hataholi soaneu laue-lale'di nai ndia osi angol dale.

²Laketu basa ngga'di a, faik esa soona, doi isi lilo fulak esa, boema nadenus fo leu laue-lale'di nai ndia osi angol dale.

³Li'u sio fafai na boema, osi lamatuak ndia, neu sanga seluk hataholi, boema nita hataholi de'u bee ala tee bekau nai pasak.

⁴Boema nafa'das nae, ‘Meu maue-male'di nai au osi angol dale. Au bae emi ngga'di ma sama leo ngga'di mandoo fai a no matetu-mandaak.’

⁵Boema ala la'o leona. Basa de li'u sanahuludua le'dohana na, ma li'u telu le'donoso na, boema osi lamatuak ndia neu sanga seluk hataholi. Ana kokolak nos bei sama leo makahulu kala boe.

⁶Fafaka ma li'u lima le'donoso na, boema neu sanga seluk hataholi, de ana bei hapu seluk hataholi la tee bekau. Boema natanes nae, ‘Tao le'e de fai katemak esa dale na, ka'da emi mapadeik bee ta mahele mai ia, te emi ta tao hata-hata esa boen?’

⁷Boema hataholi sila la lae, ‘Hataholi ta noke ami maue-male'di fa.’ Boema osi lamatuak ndia nae, ‘Metema leondiak soona, meu maue-male'di nai au osi angol dale.’

⁸ Le'donoso boema osi lamatuak ndia nafa'da malanga mana so'u bela ka nae, ‘Maloo ma basa mana-mana so'u bela kala fo bae ngga'di nala, mulai neme hataholi mana masok makabui ka, losa mana masok makasososa ka.’

⁹Boema mana so'u belak fo mana maue-male'dik neme li'u lima le'donoso na ala mai. Sila esa-esak ana sipo doi isi lilo fulak esa.

¹⁰Basa boema mana masok fafai ana kala ala mai. Ala bedoo lae neukose sila sipo ba'u lena. Te se'ko na ala fes ka'da doi isi lilo fulak beke esak boe.

¹¹Ala sipo la boema, bemumu lo osi lamatuak lae:

¹²‘Hataholi mana masok makabui kala laue-lale'di ka'da li'u esa mesa kana. Te ami maue-male'di fai katemak esa, nai le'do mahaak ndia boe na, tuan bae ami, sama leo sila boe!’

¹³Boema osi lamatuak ndia, nafa'da mana maue-male'di sila la esa nae, ‘Tolanoo ei, au ta tao sala o fa. Ade o ta makaheik o ngga'di ma faik esa soona, doi isi lilo fulak esa fa do?

¹⁴Naa, sipo ma o ngga'di ma, fo la'o leona. Memak au hii fe hataholi mana masok makabuik sila la ngga'di nala sama leo au fen neu o a boe.

¹⁵Ade au boso ito-ato au hata-hetong, tunga au dale hihii nga fa do? Do o dale he'di sa, hu ka nde au dale malole nga do?’ ”

¹⁶ Boema Yesus kokolak seluk nae, “Leondiak boe hataholi makabui ka, neukose ana da'di hataholi makahuluk, ma hataholi makahulu ka, neukose ana da'di hataholi makabuik.”

¹⁷Lelek Yesus neu leo Yerusalem neu a, nai eno tala'dak nalo nakabubua ana mana tunga kasanahulu dua nala mesa kasa, boema nafa'das nae,

¹⁸“Mamanene! Te besak ia ita teu leo Yerusale ma teu ia so, de nai naa neukose ala fe Ana Hataholi ka leo malanga imam ala, ma mese agama la, fo ala huku lisan,

¹⁹basa soona, ala fen leo hataholi ta Yahudi la neu. Neukose ala hakinonolin, ala fepa-li'un, ma ala lona-nggangen. Tehu neu fai ka telu na soona, naso'da falik.”

²⁰Basa boema Zebedeus saoina na ma ana nala mai leo Yesus mai. Ana senek neu Yesus mata na soaneu noken hata esa.

²¹Boema Yesus natanen nae, “Ina nau beek?” Inak ndia nataa nae, “Metema Ama da'di manek soona, au hii ana kaduang ia la, esa nagatuuk nai Ama boboa kii na, ma esa nai Ama boboa kona na.”

²²Boema Yesus nafa'das nae, “Emi ta bubuluk hata fo emi moke ka fa. Ade emi mapalani minu nggalaa doidosok, fo Au muse inu ka do ta?” Lataa lae, “Ami mapalanin.”

²³Boema Yesus nae, “Memak neukose emi minu neme Au nggala nga mai. Tehu soaneu see ka nde nangatuuk nai Au boboa kii nga, ma Au boboa kona nga ndia, Au ta anuu hak, aketu dede'ak ndia fa. Mamanak sila la, soaneu hataholi fo, Au Amang naketu basan so.”

²⁴Lelek ana mana tunga kasanahulu fe'e nala lamanene dede'ak ndia boema, lamanasa hataholi ka'a fa'di kaduak sila la.

²⁵ Hu ndia de, Yesus nalo na basa-basas, de nafa'das nae, “Emi bubuluk basa hataholi fo, ta lalelak Manetualai na, mauli-malanga nala, ala tuni-ndeni lau nala. Boema hataholi matua-madema nala boeo ala tuni-ndenis.

²⁶ Tehu emi soona ta bole tao leondiak fa. Nasafali na nae, hataholi fo ana nau da'di matua nai emi tala'da soona, muse ana da'di emi malalau-maoonom.

²⁷Ma hataholi fo ana nau da'di makasososak nai emi tala'da soona, muse ana da'di emi atam.

²⁸Sama na leo Ana Hataholik ndia boe. Ana mai fo ta soaneu hataholi la lalalau-laoono fan, te Ana mai soaneu nalalau-naoono ma Ana fe heni so'da na, soaneu Ana soi-po'i hataholi ba'u ka.”

²⁹Lelek ala la'oela Yerikho, boema hataholi makadotok tunga Yesus.

³⁰Ndia te hataholi pokek dua, langatuuk nai eno ka su'u na. Lelek fo duas lamanene lae, Yesus la'ok tunga enok ndia, boema ala nggasi ma lae, “Dauk Anan, sue-lai ami dei!”

³¹Boema hataholi makadotok manai sila la lamanasa duas, de lafa'das fo ala bedenge. Tehu duas nggasi lapane'e seluk lae, “Tuan, fo Dauk anan, sue-lai ami dei!”

³²Boema Yesus nate'e de nalo duas, boema natanes nae, “Emi dua hii Au tao emi dua le'e?”

³³Boema duas lataa lae, “Tuan, ami hii mita!”

³⁴Boema Yesus dale na tu'da, de nafaloe duas mata nala. No hatematak ndia boe duas lita, boema duas tunga Yesus.