Read Termanu MATEOS 21 Bible Online

MATEOS 21 - Termanu bible

MATEOS 21

¹Lelek ala deka lo Yerusalem fo ala losa Betfage nai Lete Setu na, boema Yesus nadenu ana mana tungan dua lakahuluk. Ana helu duas nae,

²“Meu leo nggolok manai ita matan eli meu. Tutika neukose emi mita keledei esa nanapa'ak nai ndia no anan. Soona se'i ma duas fo minis leo ia mai.

³Metema hataholi natane beek soona mafa'dan mae, ‘Lamatua ka paluu keledei ia’, soona neukose hataholi ndia po'i emi hela mini keledei ndia.”

⁴Dede'ak ndia ana da'di tao leondiak, fo ela hata fo nabi la lafa'da ka ana da'di leona. Nabi la lafa'da ka nae leo ia:

⁵ “Mafa'da Sion mae, emi Mane ma Ana mai so, te Ana beita losa fa. Dale na dale taidaek, ma Ana sa'e keledei esa, fo keledei ana esa.”

⁶Basa boema Yesus ana mana tunga kaduan sila la la'o leona. Ala tao tungan sama leo Yesus helun neu duas.

⁷Da'di duas hela lini keledei ndia no anan. Boema ala o'du la ba'du manalu nala de ala belan neu keledei ndia muliha'in lain, de basa boema Yesus sa'e.

⁸Hataholi makadotok manai sila la, ala bela ba'du manalu nala leu enok lain, ma nggelok soona ala tati ai ndanak, de ala nggenggelas neu enok lain.

⁹ Hataholi makadotok fo mana la'ok nai Yesus uluk ma manai dea na lalo bebou lae, “So'dak neu Dauk Ana na! Baba'e-papalak neu Ndia fo ana mai no Manetualain na'de na! Koa-kio Manetualain, fo Matua Madema ndia!”

¹⁰Boema lelek fo Yesus masok nala kota Yerusale ma dalek, te kota ndia dalek lala'ena, doto-doto, seek-see. Hataholi manai kota ndia, latatane lae, “Te see mana maik ia?”

¹¹Boema hataholi makadotok fo mana tunga Yesu sa lafa'das lae, “Ndia nde Nabi Yesus neme Nazaret fo nai Galilea.”

¹²Basa boema Yesus masok leo Manetualain Uman dale neu, de Ana usiheni basa hataholi mase'o banasak ma nai sila la lala'ena. Ana fae nalenga-natono hataholi mana tuka doi kala mei nala, ma ana soli natu'u, mana mase'o kalua sina la bangu nala.

¹³ Boema nafa'da hataholi sila la nae, “Nai Susula Malalaok dale nana sulak nae, Manetualain nafa'da nae, ‘loke Au Uma nga soona lae Uma fo mamana huhule-haladoik.’ Tehu emi taon da'di mana bonga uma la ndunun!”

¹⁴Boema hataholi poke kala ma lu'u ei kala ala mai leo Yesus nai Manetualain Uman dale de Ana tao nahai la'iesa kasa.

¹⁵Tehu malanga ima mala ma mese agama la lita Yesus tao manda'di beuk sila la boema, lamanasa. Ma lamanasa nai lelek fo lamanene ni'iana la lasanggati lai Manetualain Uman dale lae, “So'dak neu Dauk ana na!”

¹⁶ Lafa'da Yesus lae, “O mamanene ni'iana la lafa'dak ndia do ta?” Boema Yesus nae, “Hei, Au amanene so, te emi beita lees mita Susula Malalao ka lalane na nde ia nae: ‘Au anoli basa ni'iana la ma ni'iana mana su'u kala, fo ala kokolak koa-kiok fo matetu-mandaak fa do’?”

¹⁷Basa boema Yesus la'oelas, boema Ana kalua neme kota ndia mai de neu leo Betania neu, boema Ana sungu neme ndia.

¹⁸Balahaa fafaik boema Yesus fali leo kota neu, boema namala'a.

¹⁹Ana mete nita ai kaak huuk esa nai eno ka su'u na. Boema neu leo ai ndia huu na neu te ta nita boak esa boen, te ka'da doo na mesa kana. Boema Ana nafa'da ai ndia nae, “Neukose o ta maboa so'on!” Tuti ka ai kaak ndia male henin.

²⁰Nai lelek Yesus ana mana tunga nala lita manda'dik ndia, boema ala dodoo doa kana lanseli, de latane Yesus lae, “Tao le'e de, kaak ndia mate la'iesa kana?”

²¹ Boema Yesus nafa'das nae, “Tete'e ka, metema emi mamahele, ma emi dale ma ta naba'e fa soona, emi hapu tao malak hata fo leo, besa ka Au tao basan neu kaak ia boe. Ma ta ka'da ndia mesa kana fa, te lena-lenak neukose emi hapu mafa'da pupukuk ia mae, ‘Pupuku ko nei, keko fo masok leo tasi dale muu’; soona dede'ak ndia ana da'di.

²²Su'di beek ndia boe, fo emi moken nai emi huhule-haladoi ma dalek, soona neukose emi hapun, sa'di emi mamahele.”

²³Basa boema Yesus fali leo Manetualain Uman neu, boema Ana masok leo dalek neu de nanoli neme ndia. Lelek Ana bei nanoli-nanoli te malanga ima mala, ma lasi-lasik Yahudi la ala mai de latanen lae, “O manuu hak beek de O tao basa manda'dik ia la? See ka nde fe hak ndia neu O a?”

²⁴Boema Yesus nataa nae, “Au boeo sanga atane emi. Fo metema emi mataa malan soona, Au afa'da emi, no hak bee ka nde Au tao basa dede'ak sila la. Au natatane nga, leo iak.

²⁵Yohanis salani ninik see hak ka? Manetualain do hataholi daebafak?” Boema malanga ima mala ma lasi-lasi Yahudi la lakokolaok lae, “Metema ita tafa'da tae, ‘Ninik Manetualain hak ka,’ soona neukose nafa'da nae, ‘Metema leondiak soona, tao le'e de emi ta mamahele fan?’

²⁶Tehu metema ita tafa'da tae, ‘Ninik hataholi daebafa ka hak ka soona,’ nate ka ita bii hataholi makadoto kala lamanasa, nana basa-basas lamahele Yohanis ndia nde bee na nabi.”

²⁷Hu ndia de lataa lae, “Ami ta bubuluk fa.” Boema Yesus nafa'das nae, “Metema leondiak soona, Au boeo ta afa'da emi, no see hak ka de Au tao basa dede'ak sila la fa.”

²⁸Yesus kokolak nakandoo nae, “Besak ia emi hahapu ma leo beek la'eneu dede'ak ia? Hapu touk esa ana toun dua. Touk ndia nafa'da ana ulu na nae, ‘Ana ngo nei, faik ia, muu maue-male'di nai osi angol dale.’

²⁹Boema ni'iana ndia nataa nae, au ta nau u fa. Tehu basa boema ana dodoo selu kana bai, de ana la'o leo osi ango la neu.

³⁰Basa boema, touk ndia neu leo ana kadua na neu, de bei nafa'dan dede'ak ndia boe, boema ana kaduan ndia nakaheik, tehu basa boema, ta neu fa.

³¹Na, neme ni'iana kaduak sila la mai a, see ka nde tao tunga, aman hihii-nanaun?” Malanga ima mala ma lasi-lasi Yahudi la lataa lae, “Ana ulu ka”. Boema Yesus nafa'das nae, “Mamahele, te neukose Mana susu bea la, ma ina mana sosoa piao kala, ala da'di Manetualain hataholi kamahehele nala, lakahuluk leme emi mai.

³² Nanahu Yohanis Mana Salani ka ana mai, fo natu'du emi eno-dala maso'dak fo Lamatua ka nahii kana, te emi ta nau mamahele nanoli na fa; tehu mana susu bea la, ma ina mana sosoa-piao kala, lamahelen. Tehu leomae emi malelak basa dede'ak sila la so, tehu emi ta dudu'a masafali emi dudu'a-aafi mala nakalenak bai, emi ta nau mamahele Amak Manetualain fa.”

³³ Boema Yesus nafa'das nae, “Mamanene seluk nakandandaak esa ia bai, dae lamatuak esa, ana sele osi angol esa. Ana pa'a feon, ma ana kali na bolok esa fo ala ka'bi ango la, oe na leo dalek neu, mate'e na, ana tao na lopo naneak esa. Basa ndia boema, ana fe osi angol ndia neu hataholi mana'a ngga'di nala seban, de ana la'o leo nusa fe'ek neu.

³⁴Neu lelek fo fai ketu ango la losa, boema dae lamatuak ndia nadenu malalau-maoono nala leu leo osi ndia mana'a ngga'di nala leu, fo loke dae lamatuak baba'e na.

³⁵Tehu hataholi mana'a ngga'di la ala ho'u la dae lamatuak ndia malalau-maoono nala, de ala tutu-fepa esa, ma ala tao lisa nggelok, boema ala tapa nggelok linik batu.

³⁶Tehu dae lamatuak ndia, nadenu seluk malalau-maoonon, de'u lena makasososa kala bai de, leu seluk. Tehu ala beitao taos leondiak boe.

³⁷Neu mate'e na boema, dae lamatuak ndia nadenu ana bongi na neu. Dae lamatuak ndia, ana dodoo nai dalen dale nae, ‘Tao leo bee o, ala fe ha'da-holomata neu au ana nga,’

³⁸Tehu hataholi mana'a ngga'di la lita dae lamatuak ndia ana na boema, esa kokolak no esa nae, ‘Na, manoo nuu ka, ana mai nde ia so. Tao tisan leona, fo daenga ita hapu pusaka nala!’

³⁹Boema ala ho'u la touanak ndia, de ala hela lon leo osi deak neu, de ala taolisan.”

⁴⁰Boema Yesus natanes nae, “Naa, metema osi angol ndia lamatua na, ana fali ma'in soona, ana tao hataholi mana'a ngga'di sila la le'e?”

⁴¹Lataa lae, “Tao leo bee o ana taonisa hataholi mana'a ngga'di mangalauk sila la, fo ana fe hataholi fe'ek se'ba osi angol ndia, fo neu fai na soona, hataholi ndia ana nau laba'e dae ndia isi na.”

⁴² Boema Yesus nafa'das nae, “Ade emi beita lees mita hata fo nanasulak nai Susula Malalaok dale fa do? Nae leo ia: ‘Batu fo tuka uma la ta pake fan ndia, ana da'di batu makasososak so. Manetualain tatao-nono'in leondiak; Tatao nono'in ndia mana'a hiik!’ ”

⁴³Yesus nafa'da selu kasa nae, “Hu ndia de mafandendelek, emi manuu hak da'di lima eik neme Manetualain hataholi kamahehele nala mai, tehu emi hak ndia Manetualain hela fali kana, fo Ana fen leo leoina fo mana tao tunga Manetualain paleta na.

⁴⁴Metema hataholi fo mana tu'da neu batu ndia lai na, neukose nakalulutuk; ma metema batu ndia napaluni na see soona, neukose ana loli nakasosopu kana, fo ana da'di afu.”

⁴⁵Lelek fo malanga ima mala ma hataholi Farisi la lamanene Yesus nakandandaan ndia, boema ala bubuluk basan, Yesus kokolak sila nde ndia.

⁴⁶Hu ndia de, ala mulai sanga enok, fo ala ho'u Yesus. Tehu ala bii hataholi makadoto kala, nanahu hataholi makadotok sila la sipok Yesus sama na leo nabi esa.