Read Termanu MATEOS 22 Bible Online

MATEOS 22 - Termanu bible

MATEOS 22

¹Yesus kokolak seluk no hataholi makadoto kala, ninik nakandandaak,

²nae, “Metema Manetualain paleta soona heheo-hihilun sama leo nakandandaak ia: Manek esa ana tao feta ka'bing soaneu ana mane na.

³Manek ndia, nadenu malalau-maoono nala, leu lala hataholi nanaka'i kala leo feta ndia leu. Tehu hataholi nanaka'i sila la ta nau mai fa.

⁴Basa boema manek ndia nadenu seluk malalau-maoonon nggelok leu seluk. Nafa'das nae: ‘Meu mafa'da hataholi nanaka'ik sila la mae, nana'a-nininu feta kabi nga nanasadia basak so. Au do'do basa au sapi ngala ma bana-manu neulau ngala so. Basa-basan nanasadiak so de mai leona!’

⁵Tehu hataholi nanaka'ik sila la ala ta taoafik neu fas. Esa-esak neu leondia ue le'din neu. Nggelok leu leo tina leu, ma nggelok leu sanga tali-doik;

⁶ma nggelok bai soona, ala ho'u la manek ndia malalau-maoono nala de ala fepa-li'us, ma ala taolisa nggelok.

⁷Lelek mane ka namanene dede'ak ndia boema namanasa nanseli, de nadenu solda'du nala leu taolisa basa hataholi kanisak sila la lala'ena, boema ala hotu heni hataholi sila la, kota nala.

⁸Basa ndia boema nalo na malalau-maoono nala de nafa'das nae, ‘Feta ka'bi nga nanasadia basak so, tehu hataholi nanaka'i kala ta landaa fa.

⁹Besak ia, meu leo okofoo la lain meu, fo ka'i hataholi su'di ba'u bee a, fo ala mai leo feta ka'bing ia mai.’

¹⁰Boema malalau-maoono sila la leu leona. Leu leo okofoo la lain leu, de lalo lakabubua basa hataholi fo latongo loos ala, nau hataholi malole do hataholi mangalauk boe. Boema mamanak manai feta ka'bing ndia henuk no hataholi a.

¹¹Basa boema manek ndia neu memete hataholi nanaka'i kala. Boema nita hataholi esa nai feta ndia, ana ta pake bua-lo'a feta fa.

¹²Boema natane hataholi ndia nae, ‘Tolanoo ei, tao le'e de o masok leo ia mai, tehu o ta pake bua lo'a feta fa?’ Hataholi ndia, ta nae le'e esa boen.

¹³ Boema manek ndia nafa'da malalau-maoono nala nae, ‘Pa'a hataholi ia ei liman fo tapan leo deak neu, fo nai mamana makahatu ka. Nai ndia neukose ana hapu ka'da kikiik ma doidoso ka.’ ”

¹⁴Boema Yesus tui nate'e nakandandaak ndia nae leo ia, “Ba'u ka nananalook, tehu faa ka nanahelek.”

¹⁵Basa boema hataholi Farisi la lakabubua, fo lalahalak la'eneu tao leo beek fo ala hapu lakahihi'ik la Yesus ninik natatanek.

¹⁶Boema ladenu sila ana mana tunga nala lo hataholi de'u bee leme Herodes nakabubua na fo leu leo Yesus leu. Boema hataholi sila la lafa'da Yesus lae, “Ama Mesen, ami bubuluk Ama mana tao ndoos. Ama nanoli no mangale'dok la'eneu Manetualain hihii-nanaun neu hataholi daebafa ka, ma Ama tunga hataholi daebafa ka hahapu na fa. Nanahu Ama ta mete matak fa.

¹⁷Hu ndia de, So'ba Ama mafa'da su'dik fe ami: Tunga ita agama na nakanenete na, ade bole bae bea leo Kese la neu do ta?”

¹⁸Yesus bubuluk basa sila dudu'a mangalaun ndia so, da'di nafa'das nae, “Hei hataholi mana dea-dale kala lemin! Tao le'e de, emi sanga makahihi'ik Au?

¹⁹So'ba matu'du fe Au doik fo emi paken soaneu bae bea!” Boema ala fen doi isi lilo fulak esa.

²⁰Yesus sipo nan boema natanes nae, “See mata aon ma na'den ia?”

²¹Boema lataa lae, “Kese la.” Boema Yesus nafa'das nae, “Metema leondiak soona, Kese la nuun bee na, fen leo Kese la neu, ma Manetualain nuun bee na, fen leo Manetualain neu.”

²²Lelek fo lamanene Yesus halan ndia, boema ala dodoo doa kana. Boema ala la'oela Yesus leona.

²³ Bei nai faik ndia dale na boe, hataholi Saduki de'ubee ala mai leo Yesus mai. Hataholi sila la nde bee na leme nakabubuak fo hahapu nala lae, hataholi mana mate kala, neukose ta laso'da falik soon.

²⁴ Boema lafa'da Yesus lae, “Ama Mesen”. Musa nanoli nae leo ia: Metema touk esa maten, tehu ana ta bongi na anak fa, soona tolanoo na, muse sao na ina falu ndia, fo ana bongi fe sao mana maten ndia tititi-nonosik.

²⁵Hapu hataholi hitu ka'a-fa'di kala. Ala leo hai leme ia so. Ana ulu ka saoana boema maten, tehu ana ta bongi anak fa. Boema tolanoo kadua, muse sao na inafalu ndia.

²⁶Basa boema tolanoon ndia boeo maten, te ana ta bongi na fa. Dede'a ka ana da'di tao leondiak neme anatou katelu a losa anatou kahitu a.

²⁷Neu mate'e na boema inak ndia boeo maten.

²⁸Naa, neu lelek fo hataholi mana mate kala laso'da fali ka, see ka nde da'di inak ndia sao na? Nanahu hataholi kahituk sila la, ala sao no'u inak ndia so.

²⁹Boema Yesus nataa nae, “Emi sala manseli, nanahu emi ta malelak Susula Malalao ka isi liin, ma Manetualain koasa na fa.

³⁰Nanahu metema hataholi mana mate kala neukose laso'da falik soona ala ta saoana so'on, nana laso'da sama leo ata nusa so'da kala nai nusa so'da ka.

³¹Ade emi beita lees mita hata fo Manetualain nafadan la'eneu hataholi mana mate kala laso'da falik fa do? Manetualain nafa'da nae leo ia,

³² ‘Au nde Abraham Manetualai na, Isak Manetualai na, ma Yakob Manetualai na.’ Manetualain ndia, hataholi mana mate kala Manetualain ta ndia fa. Hataholi maso'da kala Manetualain ndia!”

³³Lelek fo hataholi makadotok sila la lamanene Yesus nae leondia boema, ala dodoo doak lanseli ma bafa nala bee poo soaneu nanoli na.

³⁴Lelek fo hataholi Farisi la lamanene lae, Yesus tao na hataholi Saduki la ta hapu kokolak so'on, boema lakabubua.

³⁵ Boema sila hataholin esa fo mese agama ndia, ana so'ba nakahihi'ik Yesus ninik natatanek nae,

³⁶“Ama Mesen,” paleta bee ka nde da'di paleta makasososak nai agama hoholo-lalanen dale ka?

³⁷ Boema Yesus nataa nae, “Sue-lai o Manetualaim no o dale katema tua ma, no basa o ao paa samanem, ma no basa o dudu'a-aafim.

³⁸Paleta ndia nde da'di paleta makasososak ma beli na seli a!

³⁹ Paleta kadua, sama leo paleta makasososa ka fo nae: Sue-lai o nonoo hataholi ma sama na leo o sue lai o ao ina ma.

⁴⁰Basa hoholo-lalanek fo Musa fe kala ma nabi la nanoli nala, lapadeik lai paleta kaduak sila la lain.”

⁴¹Lelek hataholi Farisi la bei lakabubua lahele lai ndia, boema Yesus natanes nae,

⁴²“Emi hahapu ma leo beek la'eneu Mane Mana Fe So'da ka? See tititi-nonosin hataholi Ndia?” Hataholi Farisi la lataa lae, “Dauk tititi-nonosin,”

⁴³Boema Yesus natanes nae “Metema leondiak,” soona, “hu beek de Manetualain Dula Dale na nakababale Dauk dale na fo noke Mane Mana Fe So'da ka soona nae, ‘Lamatuak’? Nanahu Dauk nafa'da nae,

⁴⁴ ‘Manetualain nafa'da neu au Lamatua nga nae: mangatuuk mai Au boboa kona nga, losa Au tao ala O musu no mala sene-do'ok leu O.’

⁴⁵Da'di metema Dauk noke Mane Mana Fe So'dak ndia nae, ‘Lamatuak’ soona hapu nai bee, Dauk tititi-nonosin Hataholi ndia?”

⁴⁶Ta hapu hataholi esa boen nataa Yesus so'on. Boema mulai neme faik ndia mai a, ta hapu hataholi napalani natane selu kana hata-hata so'on.