Read Termanu MATEOS 23 Bible Online

MATEOS 23 - Termanu bible

MATEOS 23

¹Boema Yesus nafa'da hataholi makadoto kala ma ana mana tunga nala nae,

²“Mese agama la ma hataholi Farisi la hapu koasa, soaneu lafa'da mangalele'do Musa hoholo-lalanen.

³Hu ndia de makatele ma tunga basa hata fo ala paleta kala. Tehu boso tunga hata fo ala tao-no'i ka nana lanoli hataholi, te se'ko na ala ta tao tunga hata fo lanolik sila la fa.

⁴Ala tao nakanenete mabela ina la fo lakaseti hataholi la tungas, tehu ala ta tulu-fali hataholi mana makalala'o kana faa anak boen.

⁵ Ta'ko ala pake kotak bana louk matua ina fo naisi Susula Malalao ka lalane nala, fo ala paken nai dedei nala ma alu nala boema ala tao lamanalu ba'du manalu nala fifiko na!

⁶Ala hii ka'da mamana neulauk nai feta-dote, ma kandela neulauk nai uma mamasok.

⁷Ala hii ka'da hataholi la fes ha'da-holomata, ma laloos lae, ‘Ama Mesen nai hataholi ba'u matan.’

⁸Tehu emi boso nau lalo emi lae: ‘Ama Mesen’, nana emi mesem ka'da esa mesa kana, de emi ia tolanoo kala.

⁹Ma emi boeo boso maloo hataholi esa nai daebafak ia mae, ‘Ama’, nanahu emi Amam ka'da esa mesa kana, fo nde Amak manai nusa so'da ka.

¹⁰Ma emi boso nau lalo emi lae, ‘Mauli-Malangan’, nanahu emi mauli-malangam ka'da esa mesa kana, fo nde Mane Mana Fe So'dak, fo Manetualain helu ka.

¹¹ Hataholi matua ina manai emi tala'da, muse ana da'di emi malalau-maoonom.

¹² Hataholi fo namatutua-namadedema ao na, neukose nananakaloloe-nakadadaek, ma hataholi fo nakaloe-nakadae ao na, neukose nananamatutua-namadedemak.”

¹³“Soe ba'eneu emi, fo mese agama la ma hataholi Farisi la lemin! Emi ia hataholi mana dea-dale kala. Emi mapanggengge hataholi soaneu ala da'di lima eik neme Manetualain hataholi kamahehele nala mai. Emi nde ta nau da'di lima eik neme Manetualain hataholi kamahehele nala mai fa, boema hataholi mana nau kala, emi mapanggengges. [

¹⁴Soe ba'eneu emi, fo basa mese agama la ma hataholi Farisi la lemin! Emi ia hataholi mana dea-dale kala. Emi ke'dindiu ina falu la, ma emi loso ma uma nala. Ma soaneu tatao-nono'i mangalau ka nananafunik, de emi huhule-haladoim nalu na seli. Hu ndia de neukose emi huhuku ma, bela na seli!]

¹⁵Soe ba'eneu emi, fo mese agama la ma hataholi Farisi la lemin! Emi ia hataholi mana dea-dale kala! Emi la'di tasi, fo emi meu leo dae dook meu, ma emi la'ok mafeo basa dae ma'dak lala'ena, ka'da soaneu hataholi esa ana masok emi agama ma. Fo hataholi ndia ana masok nai emi agama ma dalek soona, emi tao ma hataholi ndia hihii nae da'di tasi ha'i ka isi na, fo mangalau na lena heni emi la'i dua bai!

¹⁶Soe ba'eneu emi, fo mauli-malanga poke kala lemin! Emi manoli mae leo ia, Metema hataholi supa-soo ninik Manetualain Uma na soona, hataholi ndia natapo'i neme supa-soon mai, tehu metema ana supa-soo ninik lilopilas manai Manetualain Uman dale soona, ana ta natapo'i neme supa-soon ndia mai fa.

¹⁷Emi hataholi nggoa poke kala! Bee ka nde beli na lena. Lilo pila sa, do Manetualain Uma na nde tao na lilopilas ndia malalao-malalafu ka?

¹⁸Emi manoli mae leo ia, ‘Metema hataholi esa supa-soo ninik mei tutunu-hohotu ka, soona hataholi ndia natapo'i neme supa-soon mai; tehu metema ana supa-soo ninik tutunu hohotuk manai mei tutunu-hohotuk ndia lai na soona, ta natapo'i neme supa-soon ndia mai fa.’

¹⁹Emi poke-pake manseli! Bee ka nde beli na lena? tutunu hohotu ka do mei tutunu hohotu ka nde tao na tutunu-hohotuk ndia malalao-malalafu ka?

²⁰Hu ndia de metema hataholi esa, ana supa-soo ninik mei tunu-hotu ka soona, ndia sosoa na nae, ana supa-soo ninik mei tunu-hotu ka, ma ninik basa tutunu-hohotuk manai mei tutunu hohotuk ndia lai na boe.

²¹Ma metema hataholi esa ana supa-soo ninik Manetualain Uma na, soona ndia sosoa na nae, ana supa-soo ninik Lamatua ka Uman ndia, ma ninik Manetualain fo mana leo nai ndia boe.

²² Ma metema hataholi esa ana supa-soo ninik nusa so'da ka, soona ndia sosoa na nae, ana supa-soo ninik Manetualain kandela mane na, ma ninik Manetualain fo mana mangatuuk nai kandela manek ndia lai na boe.

²³ Soe ba'eneu emi, fo mese agama la ma hataholi Farisi la lemin! Emi ia hataholi mana dea-dale kala. Emi ho'i ma bumbu dala dae, adas makeek, jintan baba'ek esa neme baba'ek sanahulu mai fo emi fen leo Manetualain neu. Te se'ko na dede'a mabeli ina la nai agama hoholo-lalane nala dalek, fo sama na leo: maketu-mala'di tunga ndo na, dale manasue-lai ka ma lilineka ka, emi ta taoafik neu fas. Te se'ko na dede'ak sila nde muse emi tao-noin no boso mafandele heni dede'a fe'e kala boe.

²⁴Emi mauli-malanga poke-pake kala! Pena manai emi nininum dale a emi se'e henin, tehu emi ko'do heni onta matua ina!

²⁵Soe ba'eneu emi, fo mese agama la ma hataholi Farisi la lemin! Emi ia hataholi mana dea-dale kala. Emi safe balisi emi pinga-mangom dea nala, te see ko na dale na soona manggenggeo na seli ninik hata-hata fo emi hapun no nalaka-nasetik ma tenepeta ka.

²⁶Hei, hataholi Farisi poke kala lemin! Safe balisi makahuluk emi pinga-mangom dale na, fo ela dale nala boeo balisi!

²⁷ Soe ba'eneu emi, mese agama la ma hataholi Farisi la lemin! Emi ia hataholi mana dea-dale kala! Emi sama leo late nanadama fula ka, fo meten neme deak mai soona mana'a hiik, tehu nai dalek henuk no duik ma kaboo pulu ka.

²⁸Emi leondiak boe. Meten neme deak mai soona, emi malole moo basa hataholi lala'ena; tehu nai emi dalem dale henuk no peko-pakik ma la'olena ka.”

²⁹“Soe ba'eneu emi, fo mese agama la ma hataholi Farisi la lemin! Emi ia hataholi mana dea-dale kala. Emi mafofo'a late malole soaneu nabi la, ma emi barias hataholi so'da na malole la lutu nala.

³⁰Boema emi mafa'da mae, ‘Leo uni ka ami maso'da ndek lelek ami bei-ba'i kai makahulun eli la soona, ami ta tunga mos fo taomisa nabi la fa.’

³¹Da'di emi manaku aom mae, emi nde hataholi mana taonisa nabi la, tititi-nonosi na!

³²Metema leondiak soona tao makandoo, ma tao makababasak sala-singok fo nanamulai basak neme emi bei-ba'i kaim sila la mai!

³³Emi hataholi mangalau kala, ma tititi-nonosi hataholi mangalauk. Tao leo bee fo emi hapu matapo'i neme huhuku tasi ha'i ka mai?

³⁴Mamanene matalolole, te neukose Au haitua fe emi nabi-nabi, hataholi manatee tenok, ma mese-mese nala; tehu neukose emi taomisa hataholi sila la nggelok, boema emi lona nggange nggelok. Hapu nggelok neukose emi fepa-li'us nai uma mamaso kala dalek, ma emi usis leme kota esa leo kota esa.

³⁵Hu ndia de neukose emi nanahukuk, nana kanisak fo, emi tao-no'in soaneu hataholi sala ta kala, mulai neme kanisak soaneu Habel fo hataholi sala tak ndia, losa kanisak soaneu Berekia anan Zakharia, fo emi taomisan nai Manetualain Uma na no mei tutunu-hohotu ka tala'da.

³⁶Mamahele: te neukose hataholi lelek besak ia la nde lu'a-lepa basa sila la!”

³⁷“Yerusalem, Yerusalem! O taomisa nabi la. Boema o pia Manetualain hataholi nadedenu nala ninik batu losa mates. La'i de'ubee, Au hii holu o hataholi mala sama na leo manu ina nasaluluku ana nala nai li'dan dale, tehu emi ta nau fa!

³⁸Hu ndia de Manetualain ta nok emi so'on.

³⁹Bubuluk leon te, mulai besak ia, neukose emi ta mita Au so'on losa emi mafa'da mae, ‘Nanaba'e-palak ba'eneu Ndia fo Ana mai no Manetualain na'de na.’ ”