Read Termanu MATEOS 24 Bible Online

MATEOS 24 - Termanu bible

MATEOS 24

¹Lelek Yesus la'oela Manetualain Uma na, boema ana mana tunga nala mai de latu'du leo basa uma-uma manai Manetualain Uman ndia.

²Boema Yesus nafa'das nae, “Ade emi mita basa uma sila la so hetu? Bubuluk leona, te ta hapu batu esa boen neme uma sila la, neukose nananakatoto'dok nahelek neu mamana na fa. Te neukose basa-basas nanatao natu'uk.”

³Basa boema Yesus neu leo pupuku Setu na neu, de Ana bei nangatuuk te ana mana tunga nala mai fo ala kokolak lon mesa kana lae, “Mafa'da fe ami, faihi'da basa sila la neukose ala da'di, ta'du-tana bee ka nde natu'du Ama ka mamai na, ma le'do-fai mate'e ka?”

⁴Boema Yesus nataa nae, “Masanene'dak leona, fo boso nalosak hataholi ke'dindiu emi.

⁵Nanahu neukose hataholi ba'u ka ala mai lini Au na'de nga fo lae, ‘Au nde Mane Mana fe So'da ka!’ Neukose ala ke'dindiu la hataholi ba'u ka.

⁶Neukose emi mamanene hataholi mana musu kala hala na, ma halak la'eneu matee-matati kala, tehu boso bii. Nana dede'ak sila la muse ala da'di, tehu ndia beita nafa'da nae fai mate'e ka losa so.

⁷Neukose leoina esa natati no leoina esa, ma dedeo esa natati no dedeo esa, neukose la'a-ndoe sa nai basa mamanak lala'ena, ma dae manggengo ka ana da'di.

⁸Basa sila la besa ka makasososa na nde ndia, sama leo inak esa name'da he'di bobongi na nai lelek fo ana sanga bongi a.

⁹ Basa soona, neukose ala ho'u la emi fo ala fe heni emi soaneu ala fepa li'u emi, ma ala taolisa emi. Neukose basa daebafa ka lakamuu-lakadau emi nanahu Au ana mana tungang emi.

¹⁰Neu lelek ndia te neukose hataholi ba'u ka fali deak, ma ala da'di mana ke'dindiuk, boema esa nakamuu-nakadau esa.

¹¹Neukose nabi pepekok ba'u ka ala to'da mai fo ala ke'dindiu la hataholi ba'u.

¹²Neukose tatao-nono'i mangalau ka boetai nakadedelek nalosa hataholi la ta lasue-lalai ao so'on.

¹³ Tehu hataholi fo nakatatakak losa mate'e na, neukose ana hapu so'dak.

¹⁴Ma Hala Malole la'eneu tao leo beek fo Manetualain paleta, neukose nanatui-bengak leo basa daebafa ka lala'ena neu, fo ela basa hataholi la lamanenen. Basa ndia soona, besa ka fai mate'e ka ana losa.”

¹⁵ “Neukose emi mita ‘Mangalauk fo mana tao makalulutu ka’, nangatuuk nai mamana malalao ka, sama leo nabi Danial-la nafa'da ka. Basa hataholi fo mana lee ia, so'ba malela kana leona.

¹⁶Nai faik ndia, hataholi manai nusa Yudea la muse lalai leo lete lepa kala leu.

¹⁷ Hataholi manai uma punin lai na, ana boso kona fo ana ho'i hata-hata neme uma dale mai.

¹⁸Hataholi manai tina, ana boso fali fo ana ho'i ba'du manalu na.

¹⁹Bibii namata'u ka ba'u naseli nai fai-faik sila la ba'eneu ina kailus ala ma ina mana masu'u ni'iana beu ana la!

²⁰Hule-haladoi, fo boso nalosak emi muse malai la'e oe faak do la'e fai Sabat!

²¹ Bibii namata'uk matua ina nai fai-faik sila la, neukose hapu toto'a-sosota matua ina sama leo ana beita da'di nita neme daebafa ka dada'di makasososa na losa besak ia, ma neukose ana ta da'di seluk so'on.

²²Leo uni ka Manetualain ta tao keke'u fai na fa soona, ta hapu hataholi esa boen hapu naso'da fa. Te hu ka nde hataholi kamahehele nala, de Manetualain tao keke'u le'do-fai ndia.

²³Nai lelek ndia, metema hataholi esa nafa'da emi nae, ‘Mitak, Mane Mana Fe So'dak ndia nai ia, do nai na’, soona boso mamahele hataholi ndia.

²⁴Nanahu, neukose mana soi-tefa pepeko kala, ma nabi pepeko kala ala to'da mai. Fo neukose ala tao tatao-nono'i matua ina la ma manda'di beu kala soaneu sanga tao leondia fo ala ke'di-ndiu la Manetualain hataholi kamahehele nala.

²⁵Da'di mafandendelek! Te dede'ak sila la ala beita da'di fa, te Au afa'da akahuluk emi so.

²⁶ Metema hataholi nafa'da emi nae, ‘Mitak, Mesias nai naa fo nai mo maloa!’ Soona boso meu leo naa meu. Do metema lafa'da lae, ‘Mita kana, Ana keke nai kama ia dalek!’ Soona boso mamahele.

²⁷Nanahu, Ana Hataholi ka mamai na sama leo ndela sa nangale'do neme dulu mai, fo nangale'do losa muli.

²⁸ Nai bee hapu paa puluk soona, nai ndia hapu manupui mana'a paa pulu kala.”

²⁹ “Lelek toto'a tataa ka nate'e beita doo ka boen te, le'do a neukose makahatuk, ma bula ka ta nasalaa so'on. Neukose nduu kala, ala tu'da leme lalai mai, ma mana koasa manai lalai maloa, neukose ta latetu-landaa so'on.

³⁰ Basa ndia soona, ta'du-tana Ana Hataholi ka nananitak nai lalai. Neu lelek ndia, basa leoina manai daebafa ka neukose ala kii makaleleu. Neukose lita Ana Hataholi ka Ana mai nai ko'as lain no koasa ma mandela-masa'a matua ina.

³¹Pupuu matua ina nanapuuk soona neukose Ana Hataholi ka nadenu ata nusa so'da nala tao lakabubua hataholi kamahehele nala leme daebafa ka bu'un has mai, ma leme lalai pe'dan esa losa pe'dan esa.”

³²“Ho'i nanonolik neme ai kaa ka mai. Metema ndana nala momo'do, ma mangana'uk, boema mulai lape'du beu soona, emi bubuluk mae, fai hana sa, ana deka so.

³³Leondiak boe, metema emi mita dede'ak sila la da'di soona, bubuluk leo na te fai na ana deka nanseli so.

³⁴Bubuluk leona! Te hataholi maso'dak besak ia la beita mate fas, te basa dede'ak sila la ala da'di so.

³⁵Lalai a no daebafa ka neukose mopos, tehu Au dede'a-kokolang lahele losa dodoo na.”

³⁶“Ta hapu hataholi bubuluk fai na do liu na fai hi'da fa. Ata nusa so'da kala boeo ta. Manetualain Ana na boeo ta, te ka'da Ama ka mesa kana nde bubulu kana.

³⁷ Metema Ana Hataholi ka sanga mai soona, heheo-hihilun sama leo nai lelek Noh tepo-lele na.

³⁸Nai fai-faik fo faa tua ka beita da'di fa te, hataholi a na'a-ninu ma saoana. Leondiak nakandoo losa faik fo Noh masok leo ofak dale neu.

³⁹ Nai faik fo faa-tua ka luu nalas, besa ka lame'da hata fo ana da'di so. Metema Ana Hataholi ka mai soona, heheo-hihilun leondiak boe.

⁴⁰Nai lelek ndia, hataholi dua bei laue-lale'di lai tina: soona neukose lo esa ma ala la'oela esa.

⁴¹Inak dua bei mol gandum: soona neukose lo esa ma ala la'oela esa.

⁴²Da'di manea leona, nana emi ta bubuluk faihi'da fo neukose emi Lamatua ma Ana mai fa.

⁴³ Mafandendelek dede'a ka nde ia! Leo uni ka uma lamatuak bubuluk li'u de'u bee fo nakodaa ana mai, soona neukose nanea fo nakodaa boso masok leo uman dale neu.

⁴⁴Hu ndia de emi boeo muse mahehele ao mala. Nanahu Ana Hataholi ka Ana mai nai faik fo emi ta hapu neuk mala fan.”

⁴⁵Boema Yesus kokolak seluk nae, “Metema leondiak soona, malalau-maoono bee ka nde mana lilinekak ma manatee teno ka? Ndia nde tua na so'un da'di malangan neu malalau-maoono fe'e kala, fo ela ana fes la'a-linu la'e fai na.

⁴⁶Malalau-maoono ndia naua-nanale nanseli, metema tua na ana fali ma'in te nitan ana bei pue-lau no bela ba'un.

⁴⁷Mamahele leona, te neukose malangan ndia nahoho'u basa hata-heton neu malalau-maoono ndia.

⁴⁸Tehu metema malalau-maoono ndia mangalau ka soona, neukose ana dodoo nai dalen dale nae,

⁴⁹‘Au tua nga bei doo ka besa ka ana fali ma'in, boema ana mulai fepa-li'u malalau-maoono fe'e kala,’ ma na'a-ninu no hataholi mana mafu kala.

⁵⁰Neu makabui na neukose tua na fali ma'in nai faik ma li'u fo ana ta neuk nala fan.

⁵¹Soona neukose tua na fepa-li'u nalo'bo malalau-maoono ndia, basa soona ana tapan leo hataholi mana dea-dale kala mamana na neu. Neukose ala kii-makaleleu ma ala doidoso nai naa.”