Read Termanu MATEOS 25 Bible Online

MATEOS 25 - Termanu bible

MATEOS 25

¹ “Metema Ana Hataholi ka Ana mai sama leo Lamatua ka soona, heheo-hihilun sama leo nakandandaak ia: Ana fe'oanak sanahulu lini banuk fo ala sipok mana ka'bing tou ka mamai na. Esa na nini banuk esa fo leu soluk mana ka'bing tou ka.

²Ana fe'oanak sila la lima nggoak ma lima malelak.

³Ana fe'oana nggoak kalima kala lini banuk, tehu ala ta lini mina lenak fa.

⁴Tehu ana fe'oana malela kalima kala soona, lini banuk ma mina lenak.

⁵Losa fai na so, te mana ka'bing touk ndia beita mai fa, hu ndia de mata nala ndua ka de ala sungu.

⁶Fatila'da boema besa ka lamanene hala ka nalo nae, ‘Mana ka'bing tou ka mai so, de mai sipo kana leona!’

⁷Boema ana fe'oana kasanahuluk sila la fo'a de lafafa'u banu nala beno'u.

⁸Boema ana fe'oana nggoa kalima kala lafa'da ana fe'oana malela kalima kala lae, ‘Fe ami mina faa anak dei, te ami banu mala sanga mates nde ia so,’

⁹Tehu ana fe'o ana malela kalima kala lae, ‘Ta bisa fa, nanahu boso nalosak ami mina ma ta dai fa, de meu asa nai toko a.’

¹⁰Boema ana fe'oana nggoa kalima nggoa kala leu asa mina. Ala la'o tutika mana ka'bing tou ka losa. Boema ana fe'oana malela kalimak fo mana mahehele ao basak sila la, ala masok sama-sama lo mana ka'bing tou ka leo mamana feta leu de ala kena lelesu a!

¹¹ Basa boema besa ka ana fe'oana nggoa kalima kala ala losa. Lalo lae, ‘Tuan, Tuan, soi fe ami lelesu a dei.’

¹²Tehu mana ka'bing tou ka nataa nae, ‘Au ta alelak emi fa!’ ”

¹³Boema Yesus kokolak nate'e nakandandaak ndia nae leo ia, “Hu ndia de manea leona, nanahu emi ta bubuluk fai na do li'u na fa.”

¹⁴ “Metema Ana Hataholi ka ana mai da'dileo Lamatua ka soona, heheo-hihilun sama leo nakandandaak ia: Touk esa, ana sanga neu leo mamana dok neu. Boema nalo na basa malalau-maoono nala de nahoho'u hata-heton neus.

¹⁵Ana fe malalau-maoonon sila la hata-heto nandaa no esa-esak bebe'i na. Ana fe esa doi isi lilopilas lifun lima. Boema ana fe esa, doi isi lilopilas lifun dua. Ma ana fe esa soona, ka'da doi isi lilopilas lifun esa, boema ana la'o leona.

¹⁶Touk ia la'o boema, malalau-maoono mana sipo doi isi lilopilas lifu kalima ka, lai-lai neu dangan besak ndia leona. Boema ana hapu bunak lifun lima seluk.

¹⁷Leondiak boe, malalau-maoono mana sipo doi isi lilopilas lifu kadua ka, ana hapu bunak lifun dua seluk.

¹⁸Tehu malalau-maoono mana sipo doi isi lilopilas lifu kisa ka ana kali bolok de nafuni tua na doi na.

¹⁹Basa ndia de doo na seli besa ka tuan ndia fali ma'in. Boema nalo na basa malalau-maoono nala de nokes ala leke doi nala.

²⁰Malalau-maoono mana sipo doi isi lilopilas lifu kalima ka ana mai boema, ana leke fen lifun sanahulu. Nafa'da tua na nae, ‘Tuan fe au doi isi lilopilas lifun lima, de mitak au hapu bunak lifun lima seluk.’

²¹Boema tua na nae, ‘Malole, o malalau-maoono malole ma mana lilinekak. Hu ka nde o hapu nananamahelek nai dede'a kome'do ana la dalek, de neukose au fe namahehelek ba'u ka neu o. Masok leo dalek ia mai, fo mamahoko sama-sama mo au!’

²²Boema malalau-maoono mana sipo doi isi lilopilas lifu kadua ka ana mai, de nafa'da tua na nae, ‘Tuan, tuan fe au doi isi lilo pilas lifun dua, de mitak au hapu bunak lifun dua seluk.’

²³Boema tua na nae, ‘Malole, o malalau-maoono malole ma mana lilinekak. Hu ka nde o hapu nananamahelek nai dede'a kome'do ana la dalek, de neukose au fe namahehelek neu o. Masok leo dalek ia mai, fo mamahoko sama-sama mo au!’

²⁴Basa ndia boema malalau-maoono mana sipo doi isi lilopilas lifu kisa ka ana mai, de nafa'da tua na nae, ‘Tuan, au bubuluk tuan hataholi mana keke'ek ma maa mana talifefelok. Tuan seu ai boak nai mamanak fo tuan ta sele ai fa, ma tuan ketu-kolu buna-boak nai mamanak fo tuan ta sele-nggali bini-ngges fa.

²⁵Da'di au bii de au u afuni tuan doi na nai dae dale. Tuan doi na nde ia de ho'i ma fali kana.’

²⁶Boema tuan ndia naen nae, ‘O malalau-maoono mangalauk ma pelatua! Ade o bubuluk mae, au seu ai boak nai mamanak fo au ta sele ai fa, ma au ketu-kolu buna-boak nai mamanak fo au ta sele-nggali bini-ngges fa do?

²⁷Metema leondiak soona, o muse pe'da au doing ndia leo mamana nakabubuna doi ka neu, fo nai lelek au fali ma'i nga, au sipo falik au doing ndia no buna na.

²⁸Hu ndia de ho'i ma doik ndia neme hataholi ia mai, fo fen leo hataholi mana manuu doi isi lilopilas lifu kasanahuluk ndia neu.

²⁹ Nanahu hataholi mana nanuu ka, neukose fen ba'u ka seluk. Tehu hataholi fo ta nanuu, do bei nanuu faa anak nai ndia, soona nanaho'i falik boe.

³⁰ Ma malalau-maoono sososa-ndandaa tak ndia, tu'un leo makiu-makahatuk manai deak eli neu. Nai naa, neukose ana kii-makaleleu ma ana doidoso!’ ”

³¹ “Metema Ana Hataholi ka Ana mai da'dileo Lamatua ka, nonok ata nusa so'da nala soona, nangatuuk neu kandela mandela-masa'an lain,

³²Neukose nalo nakabubua basa leoina lala'ena neu mata na. Boema Ana ta'da ba'es neu bubuak dua, sama leo mana foo a ta'da fe'e bi'ilopo neme bi'ihii ka mai.

³³Hataholi mana tao tunga Manetualain hihii-nanau na, neukose Ana tao nakabubuas neu boboa kona na, ma fe'e kala nai boboa kii na.

³⁴Basa ndia soona, Manek ndia nafa'da basa hataholi manai boboa kona na nae, ‘Mai leon emi fo Au Amang ba'e-pala kala lemin! Masok leo nusak fo nanasadiak soaneu emi, ndek daebafa ka da'di makasososa na.

³⁵Nanahu nai lelek Au amala'a, emi fe Au u'a, ma nai lelek Au maa ma'da, emi fe Au inu. Au hataholi mana mai, emi sipok Au nai emi umam.

³⁶Au papake-ngganggaong ta, boema emi fe Au papake-ngganggaok. Au amahe'di, boema emi puli mamo'do Au. Au nanahukuk, boema emi tulu-fali au.’

³⁷Boema hataholi manai boboa kona na lae, ‘Lamatuak, faihi'da ka nde ami mita Lamatua ka namala'a, boema ami fe Lamatua ka na'a do maa ma'da de ami fe Lamatua ka ninu?

³⁸Faihi'da ka nde ami mita Lamatua ka da'di hataholi mana mai, boema ami sipok Lamatua ka nai ami umam? Faihi'da ka nde Lamatua ka papake-ngganggaon ta hai so, boema ami fe Lamatua ka papake-ngganggaok?

³⁹Fai hi'da ka nde ami mita Lamatua ka namahe'di do nai bui dale, boema ami tulu-fali Lamatua ka?’

⁴⁰Neukose Manek ndia nataa nae, ‘Bubuluk leona, te nai lelek emi tao dede'ak sila la, leomae neu hataholi esa neme Au tolanoong matasi'da-matasai ngala mai, soona ndia sosoa na nae, emi tao-no'in soaneu Au nde ndia so!’

⁴¹Basa ndia boema, neukose Manek ndia nafa'da hataholi manai boboa kii na nae, ‘La'o heok meme ia mai, hei hataholi mangalau kala lemin! Masok leo ha'i mana mate ta ka dalek meu, te mamanak ndia nanasadia basak soaneu nitu a no basa lima ein lala'ena!

⁴²Nanahu nai lelek Au amala'a, emi ta fe Au u'a fa; ma nai lelek fo Au maa ma'da, emi ta fe Au inu fa.

⁴³Au hataholi mana mai, te emi ta sipok Au nai emi umam fa. Au papake-ngganggaong ta, te emi ta fe Au papake-ngganggaok fa. Au amahe'di ma Au nai bui dale, te emi ta meu donge-dama Au fa.’

⁴⁴Boema lafa'dan lae, ‘Lamatuak, faihi'da ka nde ami mita Lamatua ka namala'a, do maa ma'da, do hataholi mana mai, do papake-ngganggaon ta, do mamahe'di, do nai bui dale, te ami ta tulu-fali Lamatua ka fa?’

⁴⁵Neukose Manek ndia nataa nae, ‘Bubuluk leona, te nai lelek fo emi ta nau tulu-fali hataholi matasi'da-matasaek esa nai daebafa ka fa soona sosoa na nae, emi ta nau tulu-fali Au fa.’

⁴⁶ Soona neukose hataholi sila la nanahukuk ninik huhuku mana ketu basa ta ka, tehu hataholi mana tao tunga Manetualain hihii-nanau na, neukose ala hapu maso'da matetu ka, ma mana ketu basa ta ka.”