Read Termanu MATEOS 27 Bible Online

MATEOS 27 - Termanu bible

MATEOS 27

¹Fafai anak boema malanga imam ala ma lasi-lasi Yahudi la ho'i nakeketuk, fo tao lisa Yesus.

²Boema ala henge Yesus de lon leo Pilatus, fo gobelnol manai nusa Roma.

³ Lelek fo Yudas tou mana ke'dindiuk ndia nita laketu basa Yesus huhuku na boema, nasasale dale de nini falik doi isi lilofulak kateluhulu kala leo malanga ima mala ma lasi-lasi Yahudi la.

⁴Neu boema nafa'das nae, “Au asala-asingo so, nana au ke'dindiu hataholi sala tak ndia de nalosak nanahuku nisak!” Tehu lafa'dan lae, “Ami ta mafaduli fa. O dede'am ndia!”

⁵Boema ana tapa doik sila la leo Amak Manetualain Uman dale neu de, ana la'o neu lona aon.

⁶Boema malanga ima mala hele la doik sila la de lakokolaok lae, “Doik ia la doi daak. Tunga agama hoholo-lalanen soona, doik ia la ta bole taos leo peti doik manai Manetualain Uman dale neu fa.”

⁷Lala halak basa boema, ala pake doik sila la fo ala asa dae, fo loken soona lae, Hataholi Mana Tao Ule ka Daen. Dae ndia ala paken soaneu latoi hataholi manamai la.

⁸Hu ndia de losa faik ia loke dae ndia soona lae, “Dae Daak.”

⁹ No enok ndia, hata fo nabi Yeremia nafa'da ka ana da'di, fo nae leo ia, “Ala sipo doi isi lilofulak teluhulu, fo nde leoina Israe la sipo kana da'di neu baba'ek esa soaneu Hataholi ndia.

¹⁰Doik ndia ala paken soaneu asa hataholi mana tao ule ka dae na, sama leo Lamatua ka paletan neu au a.”

¹¹Lelek fo lo Yesus neu nataa Pilatus fo nusak ndia gobelno la, boema natane Yesus nae, “Ade O manek nai hataholi Yahudi la do?” Boema Yesus nataa nae, “Leo o halam ndia,”

¹²Tehu lelek fo malanga ima mala ma lasi-lasi Yahudi la ala hapu dede'a kalaak ba'u ka soaneu Yesus, te ta nataa makandondook fa.

¹³Hu ndia de Pilatus nafa'dan nae, “Ade O ta mamanene hataholi sila la kalaan neu O a fa do?”

¹⁴Tehu Yesus ta nataa faa anak boen, nalosa gobelno la dodoo doa kana.

¹⁵Biasa nai Feta Paskah soona, gobelno la po'i hataholi nanahukuk esa tunga hataholi ba'u hehele na.

¹⁶Nai lelek ndia, hapu hataholi nanahuku nananita-nalelak esa na'de Yesus Barabas.

¹⁷Da'di nai lelek hataholi makadoto kala lakabubua boema Pilatus natanes nae, “Ade see ka nde emi nau au po'i fen neu emi? Yesus Barabas do Yesus fo loken soona lae Kristus?”

¹⁸Pilatus nae leondia nana ana bubuluk basa, mana koasa Yahudi la lo Yesus leondia neu nana, lape'da dalek lon.

¹⁹Nai lelek fo Pilatus bei nangatuuk nai kandela paletan lain te, saoina na nadenu hataholi neu nafa'dan nae, “Boso mu sese'dok nai hataholi sala tak ndia dede'a na dalek, nana hu ka nde Hataholi ndia de, le'odae ka au alame'i me'is esa, nini bibii-namata'u matua ina.”

²⁰Tehu malanga ima mala ma lasi-lasi Yahudi la dudungu-papau lahele hataholi makadotok sila fo loke Pilatus po'i Barabas, ma huku nisa Yesus.

²¹Boema gobelno la natane selu kasa nae, “Neme hataholi kaduak ia la, see ka nde emi nau au po'i fen neu emi a?” Boema lataa lae, “Po'i Barabas.”

²²Boema Pilatus natanes nae, “Metema leondiak soona, au muse tao Yesus fo loken lae Kristus ia le'e?” Boema basa-basas lataa lae, “Lona-nggangen!”

²³Lae leondia boema Pilatus natanes nae, “Tehu Ana tao tatao-nono'i managalauk beek?” Boema ala eki lapane'e seluk lae, “Lona-nggangen!”

²⁴ Mate'e na Pilatus name'da nana, ana ta hapu enok so'on, ma fafa'ka ma hataholi makadotok sila la ala tao tasibu. Da'di noke oe de nafui neu hataholi makadotok sila la matan ma nae, “Au ta lu'a-lepa Hataholi ia mamate na fa! Emi ito-atom ndia!”

²⁵Basa hataholi makadotok sila la lataa lae, “Hei, neme na fo ami mo ami upu-anak mala lu'a-lepa huhukuk soaneu mamate na!”

²⁶Boema Pilatus po'i fes Barabas, ma nadenu hataholi la filuk Yesus; Basa boema ana fen neu fo leu lona-nggangen.

²⁷Basa boema Pilatus solda'du nala lo Yesus leo gobelno la uman manen dale neu, de lapadeik okofefeo lan.

²⁸Ala o'du heni Yesus bua-lo'an, de ala fen pake ba'du manalu kabeli ina esa pila balanggeok.

²⁹Ala ane la ti'ilanga nggauk esa de ala taon neu Yesus langan lain. Basa boema lahoho'u ai tete'ek esa neu lima kona na, boema ala senek leu mata na, de ala hakinonolin lae, “So'dak neu hataholi Yahudi la Mane na!”

³⁰Boema ala mu'di ape neun, ma ala ho'i la ai tete'ek ndia de, ala fepan neu langa na.

³¹Ala hakinonoli basan boema, ala o'duheni ba'du manalu pila balanggeok ndia, de ala o'du falik bua-lo'an ne'un. Basa boema lon leo deak neu fo leu lona-nggangen.

³²Ala losa eno tala'dak boema latongo lo hataholi esa neme Kirene mai na'de Simon. Boema lakaseti hataholi ndia fo ana lu'a Yesus ai nggange na.

³³Basa boema ala losa mamanak esa na'de Golgota, fo sosoa na nae, “Mamana Langa Duik”.

³⁴ Nai mamanak ndia, ala fe Yesus ninu angol nanasese'do bana he'duoe. Tehu Yesus nalamei nita angol ndia boema Ana ta nau ninu fa.

³⁵ Basa boema ala lona nggangen ma ala tu'u batu fo ala baba'e bua papake na.

³⁶Basa ndia boema langatuuk de lanean.

³⁷Ala pasak susula liik la'eneu ala kalaa kana neu langa na ndandaan lain nae: “Ia nde bee na hataholi Yahudi la Mane na”.

³⁸Ala lona-nggange Yesus sama-sama no hataholi mana bonga uma dua; esa nai boboa kona na, ma esa nai boboa kii na.

³⁹ Basa hataholi mana la'ok tunga ndia lakakale langa ma lakamumulu-lakamamaek Yesus.

⁴⁰ Lafa'da lae, “O nde nau tao matu'u Manetualain Uma na, fo mafofo'a fali kana nai faik telu dale na hetu! Metema Manetualain Anan O soona, kona meme ai nggangek ndia lain mai fo ela O maso'da!”

⁴¹Leondiak boe malanga ima mala, mese agama la boema lasi-lasi Yahudi la hakinonoli Yesus lae,

⁴²“Ana soi-tefa hataholi fe'ek, te se'ko na ta nalak soi-tefa na ao ina na fa! Metema hataholi Israe la mane na nde ndia soona, besak ia boe, Ana kona neme ai nggangek ndia lain mai, fo besa ka ami mamahelen.

⁴³ Namahele Manetualain, ma nafa'da nae Manetualain Anan Ndia. Naa, mai fo ata mete su'di kana, tete'e ka besak ia Manetualain nau soi-tefa nan do ta!”

⁴⁴Mana bonga uma fo nanalona-nggangek sama-sama lo Yesu sa boeo, lena-lenak lakamumulu-lakamamaek Yesus lae leondia boe.

⁴⁵Le'dohana boema makahatu ka poti na basa nusak ndia, dodoo na li'u telu.

⁴⁶ Li'u telu le'donoso na boema Yesus nalo napane'e nae, “Eli, Eli lama sabakhtani?” fo sosoa na nae, “Ou Au Manetualaing, ou Au Manetualai nga, tao le'e de O la'oela Au?”

⁴⁷Hataholi de'ubee lai ndia lamanene Yesus hala doidoson ndia boema lae, “Nalo Elia!”

⁴⁸ Boema hataholi esa neme hataholi sila la tala'da mai, lai-lai neu ho'i na bue esa de ana dopen leo angol makeis dale neu. Basa boema ana kofun neu ai esa pe'da na, de ana lo kana leo Yesus difadoo na neu.

⁴⁹Tehu hataholi nggelok lae, “Tahani fo ata mete su'di kana, fafa'ka ma Elia mai soi-tefan!”

⁵⁰Basa boema Yesus nalo napene'e seluk, boema ketu hahae na.

⁵¹ Boema temak nanalonak nai Manetualain Uman dale a, ta'ti ba'en neu biak dua neme lain losa dae. Boema daebafa ka nanggengo, ma lete batu la hea ba'es.

⁵²Lates ala latahuka, de Manetualain hataholi kamahehele mana mate basa nala laso'da falik.

⁵³Boema ala kalua leme lates ala dalek mai, nai lelek Yesus naso'da falik neme mamate sa mai, de ala masok leo Yerusalem leu. Nai naa, hataholi makadotok litas.

⁵⁴Malanga solda'du a no solda'du mana manea Yesu sa, ala bii lanseli, nai lelek lita daebafa ka nanggengo ma basa manda'dik sila la. Boema lae, “Tete'e ka Hataholi ia, Manetualain Anan!”

⁵⁵ Lelek dia, inak makadotok lai ndia boe, tehu ala mete leme doo ka mai. Inak sila nde tunga Yesus, fo ala tulu-falin nai lelek leme Galilea mai a.

⁵⁶Nai inak sila dalek, hapu Maria Magdalena, Maria fo Yakobis no Yusuf inan, ma Zebedeus ana nala, inan.

⁵⁷Le'odaek ndia boe, hataholi kamasu'ik esa neme Arimatea na'de Yusuf, ana mai. Hataholi ndia boeo, Yesus ana mana tungan,

⁵⁸neu noke Pilatus, fo nakona Yesus popola na. Boema Pilatus paleta fo fe Yesus popola na leondia neu.

⁵⁹Boema Yusuf neu nakona na Yesus popola na, de ana popoti-papalun ninik tema fula beuk.

⁶⁰Boema neu natoi Yesus popola na nai ndia laten esa dalek, fo ana kali memak bolok ndia nai pupuku batu esa lain. Basa ndia boema, ana loli na batu matua ina esa, de ana tatanan neu late sa bafa na, boema ana fali leona.

⁶¹Tehu Maria Magdalena ma Maria esa seluk bai, langatuuk lahele lasale leo late sa leu.

⁶²Fai Sabat fafai na boema malanga imam ala, ma hataholi Farisi la, sama-sama leu leo Pilatus leu,

⁶³ de lafa'dan lae, “Tuan, ami bei mafandelek, lelek fo hataholi mana ke'dindiuk ndia bei naso'da, nafa'da hai nae, ‘Basa faik telu soona, neukose Au aso'da falik.’

⁶⁴Hu ndia de, madenu hataholi la leu lanea matalolole lates ndia losa fai katelu na, fo ela ana mana tunga nala boso leu lamanako la popola na, fo lafa'da hataholi la lae, naso'da falik neme mamate sa mai so. Nana mana puputa-papaik makabuik ia, neukose mangalau na lena seluk neme makasososa na mai.”

⁶⁵Boema Pilatus nafa'das nae, “Emi nde manuu solda'du mana manea, de mafa'das fo lanea lates ndia no mahelek.”

⁶⁶Boema leu leo lates leu, de ala segel lisa batu ina fo ala tatanan ninik late sa de lanea lahelen, fo daenga hataholi boso neu adu-dodoki lates ndia.