Read Termanu MATEOS 28 Bible Online

MATEOS 28 - Termanu bible

MATEOS 28

¹Mamasok fafai ana na, fo nai lelek fai Saba ta seli, boema Maria Magdalena ma Maria esa seluk bai de leu mete Yesus late na.

²Boema no kaiboboi anak de dae a nanggengo matua ina. Lamatua ka ata nusa so'dan esa kona neme nusa so'da ka mai, boema ana loli heni late sa batu kekena na, de nangatuuk neu lain.

³Ata nusa so'dak ndia mata panan sama na leo ndela sa, ma papake-ngganggaon fula mangadilak.

⁴Solda'du manai sila la ala bii lanseli, losa ala dele bee too de nono'ka bai hataholi mates ala.

⁵Ata nusa so'dak ndia nafa'da inak sila la nae, “Boso bii! Au bubuluk emi sanga Yesus fo nanalona-nggange basak ndia.

⁶Ta nai ia so'on. Naso'da falik sama na leo makahulu na nafa'da basan so. Mai mete mamanak fo, langapepe'u kana.

⁷Besak ia la'o lai-lai leona, fo mafa'da ana mana tunga nala mae, naso'da falik so de besak ia nakahuluk neme emi, leo Galilea neu. ‘Neukose emi mitan nai naa!’ Mafandendelek hata fo au afa'da basan neu emi a.”

⁸No lai-laik inak sila la la'oela late sa. Ala la'o no bii biik tehu no namahokok, duas lalai leu lafa'da dede'ak ndia neu Yesus ana mana tunga nala.

⁹No kaiboik Yesus mai natongo no inak sila la de nafa'das nae, “So'da molek!” Boema ala mai deka lon, de basa boema ala holu la ei na ma ala sene-do'o kana.

¹⁰Yesus nafa'das nae, “Boso bii, meu mafa'da Au tolanoo ngala fo leu leo Galilea leu. Neukose lita Au nai na.”

¹¹Inak sila la fali le'us boema, solda'du mana manea lates de'ubee ala fali leo kota dale leu, de lafa'da manda'dik ndia neu malanga ima mala.

¹²Boema malanga ima mala lakokolaok lo lasi-lasi Yahudi la, fo ala fe solda'du mana manea sila la doik makadotok,

¹³ma lafa'das lae, “Emi muse mafa'da mae, Yesus ana mana tunga nala mai le'odaek de lamanako lini popola na, nai lelek fo emi bei sungu.

¹⁴Ma metema gobelno la namanene dede'ak ndia fo natane soona, de'i fo ami kokoen fo emi boso hapu salak.”

¹⁵Solda'du mana manea la sipo la doi kala boema, ala tao tunga hata fo lafa'da basan neus ala. Hu ndia de tutuik ndia bei nanatui-bengak nai hataholi Yahudi la tala'da losa besak ia.

¹⁶ Yesus ana mana tunga kasanahulu esa nala, leu leo pupukuk esa nai Galilea, fo nandaa no Yesus hala hehelun neu sila.

¹⁷Ala losa naa de lita Yesus boema, ala sene-do'o kana. Tehu nai sila dalek, hapu nggelok dale nala bei laba'e.

¹⁸Boema Yesus neu nangatuuk deka nos de nafa'das nae, “Basa koasa manai nusa so'da ka ma manai daebafa ka nanafe basak neu Au so.

¹⁹ Hu ndia de meu leo basa leoina manai daebafa ka lala'ena, fo taos da'di Au ana mana tunga ngala. Salanis ninik Ama ka na'de na, Ana ka nade'na, ma Manetualain Dula Dale na na'de na.

²⁰Boema manolis, fo ala tao tunga basa hata fo Au paleta basan neu emi a. Ma mafandendelek te, neukose Au o ahele emi losa fai mate'e ka.”