Read Termanu MATEOS 3 Bible Online

MATEOS 3 - Termanu bible

MATEOS 3

¹Nai lelek ndia, Yohanis Mana Salani ka ana mai neme Yudea mo solokae na mai de ana tui-benga nae,

² “Tukatei-saledale meme emi sala-singo mala mai leona, nana ta doo ka so'on te, neukose Manetualain Ana paleta leo Mane ka so!”

³ Yohanis ia nde hataholi fo Nabi Yesaya nafa'da ka. Nabi Yesaya nafa'da nae, “Hapu hataholi esa nalo bou-bou nai mo solokae ka nae, ‘Sadia enok soaneu Lamatua ka leona; tao matetu eno kala ba'eneu Lamatua ka.’ ”

⁴ Yohanis ia, bua papake na ala taon neme onta bulu na mai, kalikee na ala taon neme bana lou ka mai, boema nana'a-nininun nde lama ka no fani oe a.

⁵Boema hataholi makadotok ala mai leme Yerusalem, nusa Yudea, boema leme nusa-nusak manai Lee Yarde na titia-tatain mai leo Yohanis mai.

⁶Ala manaku sala-singo nala, de Yohanis salanis leme Lee Yarde na.

⁷ Hataholi Farisi la ma hataholi Saduki la boeo makadotoknan mai fo loke Yohanis salanis. Tehu Yohanis mete nitas ala mai boema nafa'das nae, “Hei, hataholi mangalau kala lemin! See ka nde nafa'da emi nae, emi ta hapu malai meme Manetualain huhuku mana mai na fa?

⁸Matu'dun nai emi tatao-nono'i ma dalek mae, emi tukatei-saledale meme emi sala-singo mala mai so.

⁹ Boso maedaenga emi ba'im nde Abraham de, emi ta hapu Manetualain huhuku na fa! Mafandendelek te, Manetualain hapu tao Abraham tititi-nonosin neme batu ia la mai boe!

¹⁰ Taka nanasadia basak soaneu ala lo'oheni ai huuna no basa oka nala lala'ena so. Metema ai bee ta naboa boa malole fa soona, neukose nanalo'o henik, fo ala tapan leo ha'ik dale neu.

¹¹Au salani emi ninik oe fo daenga emi tukatei-saledale meme emi sala-singo mala mai; tehu basa au fai nga soona, hataholi esa ana mai fo, Ana salani emi ninik Manetualain Dula Dale na ma ha'i. Hataholi ndia ba'ulena au, de au ta andaa ho'u ta'buei na boen.

¹²Ana ho'u ooko a nai liman dale, fo ana da'i-eeko gandu ma losa balisi. Nadai gandum neu kala leo sokan dale neu, tehu gandum nala kala soona, ana hotuhenis nai ha'ipila manamate ta ka dalek.”

¹³Ndia te Yesus mai neme Galilea mai de neu leo Lee Yarde na neu. Ana losa boema, neu leo Yohanis neu de noke Yohanis salanin.

¹⁴Tehu Yohanis so'ba ta sipok Yesus nonoken ndia fa. Yohanis nae, “Tunga ndo na, Ama nde muse salani au dei. Tehu besak ia, Ama nde mai noke au salani Ama bai?”

¹⁵Tehu Yesus nae, “Neme na fo basa sila lala'ena, ala da'di. Nanahu no enok ndia de, ita tao tatetu Manetualain hii-nanaun.” Boema Yohanis salani Yesus leona.

¹⁶Yohanis salani basa Yesus tutika ana kalua neme oe dale mai. No kaiboik, lalai a natahuka de Yesus nita Manetualain Dula Dale na ana kona neme nusa so'da ka mai sama leo kalua sina de ana kona neu lain.

¹⁷ Basa ndia boema Manetualain hala na nana namanenek nae, “Au ana susue-lalai nga nde ia. Ana tao namahohoko Au dale nga.”