Read Termanu MATEOS 8 Bible Online

MATEOS 8 - Termanu bible

MATEOS 8

¹Yesus kona neme pupukuk lain mai boema, hataholi makadotok tungan.

²Lelek ndia hataholi he'di lou mangalauk esa, ana mai. Ana senek neu Yesus mata na de nafa'dan nae, “Ama nau soona, Ama tao mahai au dei.”

³Boema Yesus nafaloe hataholi ndia de nafa'dan nae, “Au nau de, hai leona!” No hatematak ndia boe, he'di na mopon.

⁴ Boema Yesus nafa'dan nae, “Mafandendelek! Boso tui hataholi esa boen. Tehu besak ia mu leo ima ma mu fo moken nafa'da nae, tete'e ka o hai so. Basa ndia soona, fe tutunu-hohotuk tunga Musa paleta na, fo ana da'di buti esa soaneu hataholi la bubuluk lae, te'e-te'e o lea-hai so!”

⁵Lelek Yesus losa Kapernaum boema, malanga solda'du matua ina Roma esa ana mai natongo non de, noke Yesus tulu-falin.

⁶Malanga solda'du matua ina ndia nafa'dan nae, “Ama, au ata nga namahe'di nai uma. Ana lu'u de, nangape'uk nahele nai pepe'un lain, ma ana doidoso nanseli.”

⁷Boema Yesus nafa'dan nae, “Neukose Au u akahahai kana.”

⁸Tehu malanga solda'du ndia nafa'dan nae, “Au ta andaa sipok Ama nai au umang fa. Ka'da Ama paleta leona. Neukose au atang ndia ana hai.

⁹Nanahu au boeo muse akatele neu au malanga na paleta na. Boema nai au dae boeo, bei hapu solda'du ana kala, fo sila muse lakatele neu au paleta nga boe. Metema au adenu solda'du esa ae, ‘La'o!’ soona, ana la'o. Boema au afa'da seluk esa ae, ‘Mai ia!’ soona, ana mai; boema metema au paleta au ata nga ae, ‘Tao ia leon!’ soona ana taon.”

¹⁰Lelek fo Yesus namanene hata fo malanga solda'du matua ina ndia hala-kokola na boema Ana dodoo doa kana. Boema nafa'da basa hataholi mana tunga nana nae, “Hataholi ia anseli. Nanahu nai hataholi Israe la dalek, Au beita atongo o hataholi namahehelen ba'u ia fa!

¹¹ Tete'e ka! Neukose hataholi ba'u ka ala mai leme dulu ma muli mai, fo lamahoko sama-sama lo Abraham, Isak ma Yakob nai Manetualain Daebafa Beun dale.

¹² Te see ko na hataholi fo tunga ndo na ala da'di Manetualain hataholi kamahehele nala, neukose sila nanatapahenik leo makahatuk manai dea ka leu. Nai ndia neukose ala doidoso.”

¹³Boema Yesus nafa'da malanga solda'du ndia nae, “Fali leona, te hata o mamahele ka, ana da'di so.” Boema no besak ndia boe, ata ndia ana lea-hai.

¹⁴Yesus neu leo Petrus uman neu. Ana losa boema nita Petrus aliina na ao na sumai de nangape'uk nai pepe'uk lain.

¹⁵Yesus nafaloe lima na tuti ka sumai na mopon. Boema ana fo'a de nalalau-naoono Yesus.

¹⁶Nai lelek sanga le'donoso, boema hataholi la lo hataholi nitu sa'ek makadotok leo Yesus mai. Boema no ka'da dede'ak de'ek esa mesa kana de Ana usiheni basa dula dale mangalauk sila la. Ana nakahahaik hataholi kamahe'dis makadotok boe.

¹⁷ Yesus tao basa manda'dik sila la, fo ela hata fo Nabi Yesaya nafa'da ka ana da'di. Nae leo ia, “Ana lu'a-lepa ita doidoson, ma Ana nakahahaik ita he'di-lau nala.”

¹⁸Hapu hataholi makadotok nanseli lai Yesus boboa kaisun. Lelek Yesus mete nita hataholi sila la, boema nadenu ana mana tuga nala leu leo dano selik leu.

¹⁹Boema mese agama esa mai de nafa'dan nae, “Ama Mesen, au nau tunga Ama, su'di leo bee neu!”

²⁰Boema Yesus nataa nae, “Busa fui boeo mabolok, ma manupui mandunuk, tehu Ana Hataholi ka mamanan ta soaneu nakalololik ao na.”

²¹Boema ana mana tungan fe'en esa nae, “Ama, fe au loak fo au u atoi au amang.”

²²Tehu Yesus naen nae, “Tunga Au leona, neme na fo hataholi mana mate ka natoi-natono aon hataholi mana mate na.”

²³Yesus kae leo ofak lain neu boema, ana mana tunga nala tunga lon.

²⁴No kaiboik, ani matua ina da'di nai dano dale, de nalosa lii a ana puka ofa ka. Ndia te Yesus sungu.

²⁵Boema ana mana tunga nala leu fafaen lae, “Ama! Fo'a dei! Te ita soe nde ia so!”

²⁶Yesus fo'a boema nafa'das nae, “Te tao le'e de emi bii? Emi kulang namahehelek neu Au!” Basa boema Yesus fo'a napadeik de, nasapala ani na ma dano a. Boema dano a oe na nakamate.

²⁷Boema Yesus ana mana tunga nala dodoo doa kana. Ala bee kola lae, “Ade see hataholi ia, de nalosa ani na ma lii a boeo tunga paleta na!”

²⁸Lelek Yesus losa dano selik fo nai nusa Gadara, boema hataholi nitu sa'ek dua ala mai. Hataholi kaduak sila la nasa mangalau kala de nalosa hataholi esa boen ta napalani la'ok tunga ndia fa.

²⁹Duas kalua leme lea-luak manai lates sila la dalek mai, de ala nggasi lae, “Manetualain Anan O, de O sanga tao ami le'e ia? Ade O sanga tao doidoso ami, leomae fai na beita losa fa do?”

³⁰Ta doo ka neme mamanak ndia mai, bafi makadotok totofi sanga nana'ak lai ndia.

³¹Tehu dula dale mangalauk sila la dokodoe neu Yesus lae, “Metema O sanga madenu ami kalua soona, madenu ami meu leo bafi sila la dalek meu.”

³²Boema Yesus nafa'das nae, “Meu leona!” Boema dula dale mangalauk sila la kalua leme hataholi kaduak ia la mai de leu leo bafi sila dalek leu. Boema bafi sila la lalai de, lakaboku leme fela ka poi na mai de, lapoko dano dale, de ala bolo.

³³Hataholi mana manea bafi la lita boema lalai leo kota leu, de ala tui basa mana da'dik sila la ma ala tui la'eneu hata da'di hataholi nitu sa'ek kaduak sila la.

³⁴Boema basa hataholi manai kota ndia ala mai de leu latongo lo Yesus. Lelek fo lita Yesus boema loke lanseli, fo Ana la'oela sila nggolo na.