Read Termanu MATEOS 9 Bible Online

MATEOS 9 - Termanu bible

MATEOS 9

¹Boema Yesus kae leo ofak lain neu, fo Ana fali leo nggolo na nai dano selik.

²Ana losa ndia boema hataholi la ndolo lo hataholi lu'uk esa pe'u-pe'u nai ne'ak lain. Lelek Yesus nita hataholi sila namahehele na ba'u na seli, boema nafa'da hataholi lu'uk ndia nae, “Matetea o dale ma, ana ngo! Te o sala-singom hapu do'o do ampon so.”

³Mese agama de'u bee lai ndia, ala bedoo nai dale nala dalek lae, “Hataholi ia nakamumulu-nakamamaek Manetualain!”

⁴Yesus bubuluk mesen sila la dale nala, de nafa'das nae, “Te tao le'e de emi mape'da dudu'a-aafi mangalauk leondia ka?

⁵Bee ka nde ndofo na lena: afa'da ae, ‘O sala-singom hapu do'o do ampon so’, do au afa'da ae, ‘Fo'a fo la'ok leona’?

⁶Tehu besak ia neukose Au fe emi buti esa nae, nai daebafa ka Ana Hataholi ka nanuu koasa fe do'o do ampon neu sala-singo ka.” Boema Yesus nafa'da hataholi lu'uk ndia nae, “Fo'a fo ho'i ma o ne'a ma fo fali mu'u ma leona!”

⁷Boema hataholi lu'uk ndia fo'a de ana fali ne'un leo uma neu leona.

⁸Lelek hataholi la lita manda'dik ndia boema ala bii, ma ala koa-kio Manetualain, nanahu Manetualain fe hataholi daebafa ka koasa matua ina so.

⁹Basa boema Yesus la'oela mamanak ndia. Ana la'o-la'o boema nita tou mana susu bea esa, na'de Mateos, nangatuuk nai uma bea dale. Yesus nafa'dan nae, “Mai tunga Au leona!” Boema Mateos fo'a de, neu tunga Yesus.

¹⁰ Lelek fo Yesus bei na'a-ninu nai Mateos uman boema hataholi mana susu bea makadotok ala mai, fo tunga lau nala nafafa'da soona lae, hataholi sila ta malole la fa, tehu la'a lakabubua lo Yesus no ana mana tunga nala.

¹¹Hataholi Farisi la lita manda'dik boema, latane Yesus ana mana tunga nala lae, “Te tao le'e de, emi mese ma na'a-ninu nakabubua no mana susu bea la, ma hataholi ta malole la fa?”

¹²Yesus namanene hataholi sila la natatane na boema nataa nae, “Hataholi so'da-la'da ka ta paluu dotel fa, te ka'da hataholi kamahe'di ka dei.

¹³ Palisak matalolole Susula Malalao ka lalane na nde ia nae: ‘Au hii ka nde susue-lalai ka, te ta nde bana-manu tutunu-hohotu ka fa.’ Nanahu Au ta mai alo hataholi fo nafa'da nae ndia hataholi malole so, te Au mai neu hataholi fo lafa'da lae, hataholi ta malole fa.”

¹⁴Basa ndia boema, Yohanis Mana Salani ka ana mana tunga nala mai leo Yesus mai. Boema latanen lae, “Te tao le'e de ami ma hataholi Farisi la oka ao mala, te Ama ana mana tunga nala soona ta?”

¹⁵Yesus nataa nae, “Ade emi hahapu ma leo beek? Ade fui manai feta ka'bi nga dale nala he'di sa, metema mana ka'bing tou ka bei sama-sama nos do? Tao leo bee o ta! Tehu neukose losa fai na, te mana ka'bing touk ndia la'oelas. Fo neu lelek ndia soona, besa ka ala oka ao nala.

¹⁶Ta hapu hataholi tana tema bibia beuk neu tema palaa ka fa. Nanahu tema nanatana beuk ndia ana kukulu soona, siiba'e ba'du ndia, fo mate'e na ba'du ndia siba'e na boetai namaloa ka.

¹⁷Leondiak boe, ta hapu hataholi sali angol beu ka leo alukosu banalou palaak dale neu fa. Nanahu neukose alukosu ndia siba'en ma nalutun fo po'aheni ango la. Angol beu ka muse salin leo alukosu beuk dale neu boe, fo tao ka nde duas beuk mesa-mesan.”

¹⁸Yesus bei kola-kola no Yohanis Mana Salani ka ana mana tunga nala te, malanga uma mamasok esa mai. Boema ana senek neu Yesus mata na de nafa'dan nae, “Au ana fe'o nga, besa ka maten. Tehu au amahena, ela leo bee na, Ama neu fo nafaloe la'en, fo ela naso'da falik.”

¹⁹Boema Yesus no ana mana tunga nala fo'a de ala tunga hataholi ndia.

²⁰Nai eno tala'dak, hapu inak esa ana hapu he'di bulak de, ana po'a daak, teuk sana hulu dua dale na, ana mai deka no Yesus neme dea mai. Ana dudu'a nai dalen dale nae, “Sa'di au tai la'e ka'da ba'du manalu na soona, neukose au hai.” Boema ana koi la'e Yesus ba'du na pe'da na.

²²Hatematak ndia boe, Yesus lipa leo dea neu, de nita inak ndia boema, nafa'dan nae, “Matetea o dale ma leon ana ngo! Hu ka nde o mamahele au de, o hai so!” No hatematak ndia boe, inak ndia hai.

²³Basa boema, Yesus losa malanga uma mamasok ndia uman. Lelek fo nita hataholi mana makaminak musik manai mamate sa ma hataholi makadotok lakalupu boema,

²⁴nafa'das nae, “Basa-basa mala kalua leo deak meu dei! Ni'iana ia ta mate fan, te ka'da ana sungu ia.” Tehu basa-basas hika Yesus.

²⁵Nadenu hataholi sila la kalua leo deak leu, boema Yesus neu leo ni'iana ndia kaman dale neu de, ana ho'u na lima na. Boema ni'iana ina anak ndia, ana fo'a leona.

²⁶Boema ala benga manda'dik ndia, leo basa nusak lala'ena neu.

²⁷Yesus la'o neme ndia mai, de Ana losa eno tala'dak boema, hataholi pokek dua tungan. Duas nggasi lae, “Dauk anan, sue-lai ami dei!”

²⁸Lelek fo Yesus masok nala uma dale boema, hataholi poke kaduak sila la ala mai. Boema Yesus natane duas nae, “Ade emi dua mamahele, Au hapu tao ahai emi dua do?” Boema duas lataa lae, “Ama, ami dua mamahele te'e-te'e!”

²⁹Boema Yesus nafaloe duas mata nala, de nafa'das nae, “Hu ka nde emi mamahele de, ana da'di sama leo hata fo emi mamahena ka.”

³⁰Boema duas hapu lita leona. Yesus balataa duas, fo daenga boso lafa'da dede'ak ndia neu hataholi esa boen.

³¹Tehu duas leu de ala tui-benga halak la'eneu Yesus leo basa nusa-nusak kala neu.

³²Lelek hataholi ka duak sila la'o, boema hataholi la lo hataholi hala ta nitu sa'ek esa, leo Yesus neu.

³³Boema Yesus usiheni nitu mangalauk ndia, de no hatematak ndia boe, hataholi hala tak ndia hapu kokolak nalelak leona. Hataholi makadotok sila la, ala dodoo doa kana, de lafa'da lae, “Ami beita mita manda'di matak leo ia ka, nai Israel fa!”

³⁴ Tehu hataholi Farisi la lafa'da lae, “Nitu mangau kala malanga na, nde fen koasa, fo ana usiheni nitu mangalauk sila la.”

³⁵ Leondiak Yesus la'ok feo neme kota esa leo kota esa neu, ma neme nggolok esa leo nggolok esa neu. Nanoli nai uma mamaso kala dalek, ma Ana tui-benga Hala Malole la'eneu, tao leo beek fo, Manetualain paleta da'dileo Mane ka. Nakahahaik hataholi mana doidoso hu ka nde he'di mata-mata kala, ma lu'u-la'a kala.

³⁶ Lelek fo Yesus mete nita hataholi makadotok sila la, boema dale na tu'da neus, nanahu langgangok ma bendole-bendaku, sama leo bi'ilopo fo mana foon ta.

³⁷ Boema Yesus nafa'da ana mana tunga nala nae, “Keketu-kokolu ka ba'u ka, tehu mana ketu-kolu ka'da lumaanak.

³⁸Hu ndia de, moke osi lamatuak ndia, fo daenga ana haitua mana ketu-kolu mai, fo ala ketu-kolu leona.”