Read Termanu MARKUS 1 Bible Online

MARKUS 1 - Termanu bible

MARKUS 1

¹Hala Malole ia nde bee soona, la'eneu Yesus Kristus fo Manetualain Ana na.

² Hala Malole ndia ana mulai, sama leo nabi Yesaya sulak basan nae leo ia, “Manetualain nafa'da nae, ‘Au hataholi nadedenu nga nde ia; Au adenun nakahuluk neme O mai, fo daenga ana soi enok soaneu O.’

³ Hapu hataholi nalo bou-bou nai mo solokae ka nae, ‘Sadia enok soaneu Lamatua ka leona, tao matetu basa enok fo neukose Ana la'ola'di kala.’ ”

⁴Sama leo nanasulak ndia, leondiak boe Yohanis to'da mai nai mo maloa. Ana mai salani hataholi ma nanduku-nalosak halak maneme Manetualain mai nae, “Emi muse tukatei-saledale neme emi sala-singom mai, ma emi muse salani fo ela Manetualain fe do'o do ampon neu emi.”

⁵Basa hataholi la leme nusa Yudea ma kota Yerusalem mai fo leu lamanene Yohanis tutui-bebengan. Boema ala manaku sala-singo nala, de Yohanis salanis leme Lee Yarden-na.

⁶ Yohanis bua papake na ala taon neme bana unta bulu na mai. Kalikee na ala taon neme bana lou ka mai, boema na'a ka'da lamak ma ninu ka'da fani oe.

⁷Ana tui-benga hala ka nde ia, “Neukose basa au fai nga te Hataholi esa ba'ulena au, neukose Ana mai. Soaneu au akatele fo se'i ta'bu ei na tali na boeo, au ta andaa fa.

⁸Au salani emi ninik oe, tehu neukose Ana salani emi ninik Manetualain Dula Dale na.”

⁹Lelek ndia, Yesus mai neme Nazaret fo nai nusa Galilea, boema Yohanis salanin neme Lee Yarden-na.

¹⁰Yesus bei kalua neme lee ndia dalek mai tutika, nita lalai a natahuka, de Manetualain Dula Dale na kona neu lain sama leo manupui kalua.

¹¹ Basa ndia boema, Manetualain hala na nananamanenek nae, “O nde Au Ana susue-lalai nga. O tao mamahoko Au dale nga.”

¹²Basa ndia tutika Manetualain Dula Dale na no Yesus leo mo maloa neu.

¹³Faik hahulu dale na, Nitu so'ba Yesus neme ndia. Bana fui kala sama-sama lon nai ndia boe, tehu ata nusa so'da kala lasulu-lahapan.

¹⁴Ala huku basa Yohanis boema, Yesus neu leo Galilea neu de Ana tui-benga Manetualain Hala Malole na nai naa.

¹⁵ Yesus tui-benga nae: “Neukose Manetualain mulai paleta no lai-laik. Hu ndia de tukatei-saledale meme emi sala-singo mala mai, ma mamahele Manetualain Hala Malole na!”

¹⁶Lelek fo Yesus la'o-la'o neme Dano Galilea su'u na boema, nita mandolu dala dua fo Simon no fa'di na na'de Anderias. Duas dala i'ak nai dano ndia dalek.

¹⁷Boema Yesus nafa'da duas nae, “Tunga Au leona, fo neukose Au anoli emi da'di manadolu-dala hataholi.”

¹⁸Tutika ala la'oela dala nala de leu tunga Yesus.

¹⁹Yesus la'ok nakandoo, boema nita seluk hataholi dua ka'a fa'di kala, fo Yakobis ma Yohanis, fo Zebedeus anan hataholi kaduak sila la. Duas bei lakahii dala nala nai ofak dale.

²⁰Tutika Yesus nalo duas. Boema duas la'oela duas aman nai ofak dale no hataholi mana'a ngga'di nala leme ndia, de leu tunga Yesus.

²¹Yesus no ana mana tunga nala losa kota Kapernaum. Nai fai Sabat manamai ka boema, Yesus neu leo uma mamasok dale neu de Ana mulai nanoli.

²² Hataholi manamamanene nanoli na, ala dodoo doa kana ma bafanala beepoo la'eneu Ana nanoli na. Nana nanoli no heohaan, de ta sama no mese agama la fa.

²³Nai lelek ndia, hataholi nitu sa'ek esa masok leo uma mamasok dale neu de ana nggasi nae,

²⁴“Hei Yesus fo Hataholi Nazaret. O sanga tao ami le'e ia? O mai soaneu O tao makalulutuk ami do? Au bubuluk see O. O ia Hataholi nadedenu malalaok neme Manetualain mai!”

²⁵Boema Yesus nasapala dula dale mangalauk ndia nae, “Denge-denge! Kalua meme hataholi ia mai leona!”

²⁶Boema dula dale mangalauk ndia ana nggonggongak napane'e hataholi ndia, de basa boema ana kalua neme hataholi ndia dalek mai, ma ana nggasi-nggasi mesan.

²⁷Basa hataholi la dodoo doa kana de nalosa esa kokolak no esa nae, “Wei, te beek ia? Nanoli beuk ia ma. Ana paleta no heohaak ma henuk no koasa de dula dale mangalauk ndia ana kalua, ma ala tunga paleta na.”

²⁸Boema halak la'eneu Yesu sa, ana sipela no lai-laik leo basa nusa Galilea lala'ena neu.

²⁹Yesus no ana mana tunga nala la'oela uma mamasok ndia boema leu leo Simon no Anderias uman leu. Yakobis no Yohanis boeo sama-sama lon.

³⁰Ndia te Simon alina na ao na sumai de nangape'uk nai pepe'uk lain. Da'di lelek fo Yesus no ana mana tunga nala masok lala uma dale boema, lafa'da Yesus dede'ak ndia.

³¹Boema Yesus neu leo Simon alina na neu de Ana ho'u na lima na boema hela nafofo'an. Tutika sumai na mopon, boema ana fo'a de nalalau-naoonos.

³²Le'donoso de le'do tenak boema, hataholi la lo basa hataholi kamahe'di sala ma hataholi nitu sa'e kala leo Yesus mai.

³³Basa kota ndia hataholi nala mai de lakamomotu lai uma so'da na.

³⁴Boema Yesus nakahahaik basa hataholi kamahe'di mata-matak makadotok, ma Ana usiheni dula dale mangalauk makadotok boe. Ana ta fe dula dale mangalauk sila la loak kokolak fa, nana ala bubuluk basa see Ndia so.

³⁵Balahaa fafaianak fo bei makahahatuanak te Yesus fo'a, boema Ana la'oela uma ndia. Neu leo mamana nees esa nai kota ndia deak fo Ana hule-haladoi nai ndia.

³⁶Tehu Simon no nonoo nala leu sangan.

³⁷De ala hapun boema lafa'dan lae, “Basa hataholi la sanga Ama.”

³⁸Tehu Yesus nafa'das nae, “Mai fo ata la'ok takandoo ita leleo-lala'on leo kota-kota fe'ek manai titia-tataik ia la teu. Au muse u tui-benga nai naa boe, nana hu ka nde dede'ak ndia de Au mai leo daebafa ka mai.”

³⁹ Hu ndia de Yesus neu leo basa mamanak lala'ena nai Galilea, de Ana tui-benga nai uma mamaso kala dalek, ma Ana usiheni dula dale mangalau kala.

⁴⁰Hataholi he'di lou mangalauk esa, ana mai leo Yesus mai. Ana senek neu Yesus mata na de nafa'dan nae, “Metema Ama nau soona, Ama makahahaik au dei.”

⁴¹Yesus dale na tu'da neu hataholi ndia de nafaloen ma nafa'dan nae, “Au nau de hai leona!”

⁴²No hatematak ndia boe, he'di na mopo kana de ana lea-hai.

⁴³Boema Yesus nadenun fo ana la'o, tehu Ana balatan nae,

⁴⁴ “Mafandendelek fo boso tui hataholi esa boen, te ka'da mu leo ima ma mu fo moken ana palisak o, tete'e ka o lea-hai so. Boema soaneu o hahaim ndia de, o fe tutunu-hohotuk tunga hata fo Musa paleta ka, fo ana dadi neu buti soaneu hataholi la lae, o hai te'e-te'e so.”

⁴⁵Tehu hataholi ndia neu boema, ana tui manada'dik ndia nakandondoohenin nai basa mamanak lala'ena, nalosak Yesus ta hapu masok leo kota dale no le'do-le'dok fa. Ana leo nai kota deak, nai ka'da mamana nees ala. Tehu hataholi la ka'da mai lakandoo leme basa mamanak lala'ena mai fo leu lakaninin.