Read Termanu MARKUS 10 Bible Online

MARKUS 10 - Termanu bible

MARKUS 10

¹Basa boema, Yesus la'oela mamanak ndia de neu leo nusa Yudea ma nusak manai Lee Yarden-na selik neu. Hataholi makadotok, ala mai de lakamomotu okofeo la seluk Yesus, de nanolis sama leo mandoo fai a nanolis ala.

²Hataholi Farisi de'ubee ala mai boe, fo ala sanga lakahihi'ik Yesus. Latane Yesus lae, “Tunga ita agama na hoholo-lalanen soona, ade hataholi bole elaheni sao na do ta?”

³Boema Yesus nae, “Musa fe paleta beek neu emi so?”

⁴ Boema lataa lae, “Musa fe hataholi loak fo ala elaheni saoinan na, sa'di ala sulak lakahuluk susula naela ka.”

⁵Yesus nafa'das nae, “Musa sulak paleta ndia, nana lanoli doak emi makandondook.”

⁶ “Tehu nai makasososa na, nai lelek fo Manetualain nakadada'dik hataholi daebafa ka, nananafa'dak nae, ‘Manetualain nakadada'dik touk ma inak.

⁷ Hu ndia de, neukose tou ka ana la'oela ina aman, fo ana da'di esa no saoinan na

⁸soona duas da'di esa.’ Da'di sila ta hataholi dua so'on, te ala da'di esa so.

⁹Hu ndia de, hata fo Manetualain taos da'di esa soona, hataholi daebafa ka ta hapu ba'e-bati fan!”

¹⁰Ala masok lala uma dale boema, ana mana tunga nala latane Yesus la'eneu dede'ak ndia.

¹¹ Boema Yesus naes nae, “See elaheni saoina na fo ana saoina fe'ek soona, hataholi ndia ana hohonge soaneu saoina makasososa na.

¹²Leondiak boe, inak fo ana elaheni saotou na, fo ana sao seluk tou fe'ek soona, inak ndia boeo ana hohonge ndia.”

¹³Boema hataholi la lo ni'iana la leo Yesus mai fo nafaloes ma Ana fes baba'e-papalak. Tehu Yesus ana mana tunga nala lamanasa hataholi sila la.

¹⁴Yesus nita boema, namanasa de nafa'da ana mana tunga nala nae, “Neme na fo ni'iana sila la ala mai leo Au mai! Boso kena-ka'is, nana hataholi leoia kala nde da'di lima eik neme Manetualain hataholi kamahehele nala mai.

¹⁵ Mafandendelek dede'a ka nde ia! See ta neu nataa Manetualain sama na leo ni'iana esa fa soona, neukose ana ta da'di lima eik neme Manetualain hataholi kamahehele nala fa.”

¹⁶Nafa'da basa nae leondia boema, Ana ifa na ni'iana sila la de basa boema, Ana lalaa lima na neu niiana sila la esa-esak lain de Ana fes baba'e-papalak.

¹⁷Lelek fo Yesus la'ok nakandoo seluk boema, hataholi esa nalai-nalai mesan leo Yesus mai de ana sene neu Yesus mata na, de natanen nae, “Mesen, fo malole, au muse tao leo beek fo au hapu so'da matetu ka ma mana ketu basa ta ka?”

¹⁸Boema Yesus natanen nae, “Tao le'e de o mafa'da mae, Au malole? Ta hapu hataholi esa boen malole fa, te ka'da Manetualain mesa kana.

¹⁹ O bubuluk basa, Manetualain paleta nala nae, ‘Boso manisa, boso hohonge, boso mamanako, boso sakasii pepekok, boso ke'dindiu, fe ha'da-holomata neu o ina amam.’ ”

²⁰Boema hataholi ndia nae, “Ama Mesen, basa paleta sila la, au tao tungas neme au muli-solu nga mai so.”

²¹Yesus mete hataholi ndia no susue-lalaik, boema nafa'dan nae, “Bei ela ka'da dede'ak esa mesa kana, fo o paluun. Mu leona, fo mase'oheni basa o hata-heto mala, fo fe doi na neu hataholi nuu ta kala, te neukose o hapu hata-heto nai nusa so'da ka. Basa ndia soona, mai fo tunga Au.”

²²Hataholi ndia namanene Yesus nafa'da nae leondia boema, dale na ba'ihana, tutika ana la'oela mamanak ndia no dale na susa, nana hataholi ndia kamasu'iina.

²³Boema Yesus mete ana mana tunga nala de nafa'das nae, “Sosotak la'iesa kana soaneu hataholi kamasu'i ka, ana da'di Manetualain hataholi kamahehelen!”

²⁴Yesus ana mana tunga nala lamanene Yesus kokolan ndia boema, ala dodoo doa kana. Tehu Yesus kokolak seluk nae, “Ana ngala lemin, memak sosotak la'iesa kana, soaneu da'di Manetualain hataholi kamahehelen!

²⁵Ndofo na seli, bana unta esa masok tunga ndandau ka bolo na, neme hataholi kamasu'ik esa ana masok leo Manetualain Daebafa Beun dale neu.”

²⁶Yesus hala-kokolan sila la tao na ana mana tunga nala dodoo doa kana, de nalosa latataneaok lae, “Metema leondiak soona, see ka nde hapu maso'da ka?”

²⁷Yesus metes boema nae, “Ba'eneu hataholi daebafa ka soona, dede'ak ndia ana ta da'di fa, tehu ba'eneu Manetualain soona, ana da'di. Ba'eneu Manetualain soona, basa hata lala'ena manda'dik mesa-mesan.”

²⁸Boema Petrus nae, “Mete leona, te ami la'oela basa ami hata-hetom lala'ena, de ami tunga Ama.”

²⁹Yesus nae, “Mamahele leona! Te hataholi fo ana la'oela uma lon, do tolanoo toun, do tolanoo inan, do inan, do aman, do ana nala, do ha'deoe ma tina osin boe, hu ka nde Au ma Hala Malole maneme Manetualai na mai,

³⁰soona, neukose hataholi ndia sipo lena ba'u ka, nai lelek besak ia. Neukose ana hapu didikuk la'i natun esa, de'u lena uma, tolanoo toun, tolanoo inan, inan, ni'iana la, ha'deoe, tina osi, leomae neukose ana hapu doidosok boe. Ma neukose nai le'do fai mana mai ka te, neukose hataholi ndia sipo so'da matetu ka ma mana ketu basa ta ka.

³¹ Tehu besak ia, hataholi makahuluk ba'u ka, neukose ala da'di hataholi makabuik, ma besak ia hataholi ba'u ka lakabuik, tehu neukose ala da'di hataholi makahuluk.”

³²Yesus no ana mana tunga nala bei lai eno tala'dak leo Yerusalem leu. Yesus nakahuluk de ana mana tunga nala tunga dea na. Dale nala lapangamak. Ma hataholi mana tunga dea nala boeo, ala bii. Basa boema Yesus nalo seluk ana mana tunga nala fo mesa kasa fe'e, boema nafa'das basa hata fo neukose neu fai makabuin te, ana da'di neu aoina na.

³³Yesus nae, “Mamanene leona, te besak ia ita teu leo Yerusalem teu ia so. Nai naa, Ana Hataholi ka neukose nanafek leo malanga ima mala, ma mese agama la. Neukose ala hukulisan, fo basa soona ala fen leo hataholi ta Yahudi la neu.

³⁴Neukose lakamumulu-lakamamae kana, ala mu'di lakadoen ape, ala fepa-li'un, ma ala lona-nggangen. Tehu neu fai katelu na soona, neukose naso'da falik.”

³⁵Boema Yakobis ma Yohanis fo Zebedeus ana nala leu leo Yesus leu de lafa'dan lae, “Ama Mesen, ami nau Ama fe ami dede'ak esa nde ia.”

³⁶Boema Yesus natanes nae, “Te emi moke Au fe emi beek ndia?”

³⁷Duas lataa lae, “Ami nau mangatuuk nai Ama boboa kii boboa kona na, metema Ama nangatuuk neu kandela Mane ka no mandela-masa'an lain.”

³⁸ Boema Yesus nafa'das nae, “Emi ta bubuluk hata fo emi moken ndia fa. Ade emi mapalani minu neme nggalaa doidosok fo neukose Au inu ka, ma emi mapalani losa mamana doidosok fo neukose Au la'ola'dik ndia do ta?”

³⁹Boema duas lae, “Ami mabe'in.” Boema Yesus nafa'da selu kasa nae, “Memak, neukose emi minu neme nggalaa doidosok fo neukose Au inu ka, ma emi mapalani losa mamana doidosok fo neukose Au la'ola'di nana.

⁴⁰Tehu la'eneu see fo neukose nangatuuk nai Au boboa kona nga, do Au boboa kii nga ndia soona, Au ta anuu hak aketu dede'ak ndia fa. Manetualain nde naketu, see nde neukose nangatuuk nai mamanak sila la.”

⁴¹Lelek fo Yesus ana mana tunga kasanahulu fe'e nala lamanene dede'ak ndia boema, lamanasa Yakobis no Yohanis.

⁴² Hu ndia de, Yesus nalo na basa-basas de nafa'das nae, “Emi bubuluk basa, mauli-malanga leoina la fo ta lalelak Manetualai na, ala tuni-ndeni lau nala. Ma sila hataholi matua-madema nala ne'e laheles.

⁴³ Tehu emi soona, boso tao leondiak! Dede'a nasafali na nae, hataholi fo ana nau da'di matua nai emi tala'da soona, muse ana nau da'di emi manamalalau-maoonom.

⁴⁴Ma hataholi fo ana nau da'di manamakahuluk nai emi tala'da soona, ana muse da'di ata neu emi basa-basa mala.

⁴⁵Nana Ana Hataholi ka boeo, Ana ta mai soaneu lalalau-laoono fan. Te Ana mai soaneu nalalau-naoono, ma soaneu Ana feheni so'da na, soaneu Ana soi-po'i hataholi ba'u.”

⁴⁶Yesus no ana mana tunga nala losa Yerikho de basa boema ala la'oela kota ndia, sama-sama lo hataholi makadotok. Ndia te hataholi pokek esa nangatuuk nai enok fo ala tunga ndia su'u na, fo noke su'di bee ka neme hataholi manala'ok tunga ndia. Hataholi ndia na'de Bartimeus, fo Timeus anan ndia.

⁴⁷Lelek fo namanene hataholi la lafa'da lae, Yesus fo hataholi Nazaret ndia nde mana la'ok tunga ndia, boema ana nggasi ma nae, “Yesus, fo Dauk Anan! Sue-lai au dei!”

⁴⁸Hataholi makadoto kala lamanasan de lafa'dan fo ana denge-denge. Tehu ana boetai nggasi napane'e seluk nae, “Dauk Anan, sue-lai au dei!”

⁴⁹Boema Yesus nate'e de nae, “Malo dein.” Dadi lalo hataholi pokek ndia. Lafa'dan lae, “Denge-denge leona! Te Yesus nalo o de fo'a fo mu leona!”

⁵⁰Boema hataholi pokek ndia tapaheni ba'du manalu na de napadeik lai-lai, boema neu leo Yesus neu leona.

⁵¹Yesus natanen nae, “O nau Au tao o le'e?” Hataholi pokek ndia nae, “Ama Mesen, au hii au ita.”

⁵²Boema Yesus nafa'dan nae, “Mu leona, nana o mamahele Au de o lea-hai so.” No hatematak ndia boe, hataholi ndia hapu nita. Boema ana tunga Yesus.