Read Termanu MARKUS 11 Bible Online

MARKUS 11 - Termanu bible

MARKUS 11

¹Lelek Yesus no ana mana tunga nala deka lo Yerusalem, dekat nai kota Betfage ma Betania, fo nai lete Pupuku Zetun-na huu na, boema Yesus nadenu ana mana tungan dua lakahuluk.

²Yesus nafa'das nae, “Meu leo nggolok esa nde ita matan eli. Emi losa nggolok dale tutika, emi mita keledei ana esa nanapa'ak nai ndia. Keledei ana ndia, hataholi beita sa'e nitan la'iesa boen. Soona, se'ima keledei ana ndia fo minin leo ia mai.

³Metema hataholi natane emi nae, tao le'e de emi se'ima keledei ndia soona, mafa'dan mae, ‘Lamatua ka sanga paken, fo basa soona nini fali kana no lai-laik.’ ”

⁴Boema Yesus ana mana tunga kaduan sila la la'o leona. Ala losa boema, lita keledei ana esa nanapa'ak nai uma so'da na, nai eno ka su'u na. Boema ala se'ilan leona.

⁵Tutika hataholi mana mapadeik manai ndia, natane duas lae, “Heh, emi tao beek ndia? Tao le'e de emi se'ima keledei ana ndia?”

⁶Duas lataa sama leo Yesus nafa'da duas natataa ka. Boema ala fe duas helalini keledei ana ndia.

⁷Duas fali de ala losa Yesus mata na boema, ala o'du la ba'du manau nala de ala belan neu keledei ndia muliha'in lain de Yesus sa'e.

⁸Hataholi makadotok o'du la ba'du manalu nala de ala belas neu enok lain, nggelok ta'tilini ai ndanak neme tina mai de lakalelekas neu eno ka tala'da.

⁹ Hataholi manala'ok nai Yesus uluk ma manatunga Yesus dea na lalo bebou lae, “Kokoa-kikiok ba'eneu Manetualain! Manetualain fe baba'e-papalak neu Ndia fo Ana mai no Lamatua ka na'de na!

¹⁰Nanaba'e palak soaneu paleta na, fo neukose paletan ndia ana mai, fo Dauk ita bei ba'ikain paleta na! Kokoa-kikiok ba'eneu Manetualain Fo Mademaina!”

¹¹Yesus losa Yerusalem boema, Ana masok leo Manetualain Uman dale neu. Ana losa dalek boema, Ana mete leo boboa-kaisun neu. Tehu sanga nae makahatu ka so, boema Yesus no ana mana tunga kasanahulu dua nala, leu leo Betania leu.

¹²Balahaa boema, Yesus no ana mana tunga nala kalua leme Betania mai fo ala sanga fali leo Yerusalem leu. Ala losa eno tala'dak boema, Yesus namala'a.

¹³Neme doo ka mai, Yesus nita ai kak esa doo na eloaka. Boema neu mete kak ndia, fafa'kama maboak. Tehu Ana losa ai ndia huu na te, Ana ta hapu boak esa boen, te ka'da doo na mesa kana, nana nai lelek ndia ai kak kala fai naboan beita.

¹⁴Boema Yesus nafa'da ai kak ndia nae, “Mulai besak ia, ta hapu hataholi esa boen, na'a o boa ma so'on!” Yesus ana mana tunga nala lamanene Yesus kokolan ndia.

¹⁵Yesus losa Yerusalem boema, neu seluk leo Manetualain Uman dale neu. Ana losa dalek boema, Ana mulai usiheni basa hataholi manamase'o-banasa kala. Ana fae nalenga-natono basa hataholi manatuka doi kala mei nala, ma manamase'o manupui kalua sina la bangu nala.

¹⁶Ma Ana ta fe loak neu hataholi esa boen, fo lini su'di bee ka tunga Manetualain Uman ndia so'da na.

¹⁷ Basa boema, Yesus nanoli hataholi manai sila la nae, “Nai Susula Malalaok dale nanasulak nae leo ia: Manetualain nafa'da nae, ‘Neukose loke Au Uma nga lae, mamana huhule-haladoik ba'eneu leoina lala'ena.’ Tehu emi taon da'di manabonga uma la ndunu na!”

¹⁸Malanga ima mala ma mese agama la lamanene Yesus kokolan ndia boema, ala mulai sanga enok fo taolisan. Tehu ala biin, nana basa hataholi la koa-kio nanoli na.

¹⁹Sanga nae le'odae boema, Yesus no ana mana tunga nala la'oela kota ndia.

²⁰Balahaa fafaianak boema, ala la'ok tunga ai kak ndia huu na. Tehu ala mete neu te, ai ndia maten losa oka na so.

²¹Boema Petrus nafandele na hua sa manda'di ka. Boema nafa'da Yesus nae, “Ama Mesen, mete su'di kana dei! Te ai kak fo Ama supa-sook ndia maten so!”

²²Boema Yesus nae, “Emi muse mamahele Manetualain.

²³ Soona mamahele te, metema emi mafa'da lete pupukuk ia mae, ‘O lali meme ia leo tasi dale mu!’ soona ba'eneu emi, dede'ak ndia neukose ana'di; sa'di emi dale ma boso naba'e, ma emi mamahele hata fo emi mafa'dak ndia, neukose anda'di te'e-te'e.

²⁴Hu ndia de mafandendelek dede'ak ia: Metema emi hule-haladoi fo emi moke hata esa soona, mamahele te, Manetualain fe basa hata fo emi mokek ndia so, de neukose emi sipon.

²⁵ Ma metema emi hule haladoi, tehu emi dale ma ta malole no hataholi esa, soona fe do'o do ampon nakahuluk neu hataholi ndia, fo ela emi Amam manai nusa so'da ka boeo, Ana fe do'o do ampon neu emi sala-singo mala. [

²⁶Makanaema emi ta fe do'o do ampon neu hataholi fe'ek fa soona, emi Amam fo manai nusa so'da ka boeo, neukose Ana ta fe do'o do ampon neu emi sala-singo mala fa.]”

²⁷Yesus no ana mana tunga nala fali seluk leo Yerusalem leu. Boema Yesus la'ok okofefeo Manetualain Uman dale. Boema malanga ima mala, mese agama la, ma lasi-lasi Yahudi la ala mai leo Yesus mai.

²⁸Latane Yesus lae, “O manuu hak hata tao basa ia la? See ka nde fe O hak ndia?”

²⁹Boema Yesus nae, “Au boeo sanga atane emi, fo metema emi mataa man soona, besa ka Au afada emi, Au tao basa dede'ak ia la ninik see koasa na.

³⁰Yesus natanes nae, Yohanis salani ninik see koasa na, Manetualain do hataholi daebafak?”

³¹Boema malanga ima mala ma lasi-lasi Yahudi la mulai lakokolaok lae, “Metema ita tafa'da tae, ‘Ninik Manetualain koasa na,’ soona neukose nae, ‘Na tao le'e de emi ta mamahele Yohanis fa?’

³²Tehu tea na seli boe, soaneu ita tafa'da tae, ‘Ninik hataholi daebafak koasa na.’ ” Hu ka nde ala bii hataholi makadoto kala, nana basa hataholi la lafa'da lae, Yohanis ndia, nabi esa.

³³Hu ndia de lataa lae, “Ami ta bubuluk fa.” Boema Yesus nafa'das nae, “Metema leondiak soona, Au boeo ta afa'da emi, Au tao basa ia la ninik see koasa na fa.”