Read Termanu MARKUS 12 Bible Online

MARKUS 12 - Termanu bible

MARKUS 12

¹ Basa boema, Yesus mulai kokolak no malanga ima mala, mese agama la, ma lasi-lasi Yahudi la ninik nakandandaak. Yesus nafa'das nae, “Hapu hataholi esa ana sele angol neu osi esa dalek, boema ana pa'a feon. Basa ndia boema, ana kali bolok fo ana tao mamana kaka'bi ango la neu ndia. Boema ana tao na uma lopo naneak esa. Basa ndia boema, ana fe osi angol ndia neu manaso'u belak de'ubee fo ala seban, boema ana la'o leo nusa fe'ek neu.

²Lelek fo fai ketu ango la losa boema, osi lamatuak ndia ana haitua malalau-maoonon esa, neu leo osi ndia manaso'u bela nala neu, fo ana sipo ndia baba'e na.

³Tehu manaso'u belak sila la ho'u la malalau-maoono ndia de ala fepa-li'un, basa boema ladenun ana fali ne'un no lima louk.

⁴Boema osi lamatuak ndia, ana haitua seluk malalau-maoono fe'en esa neu. Tehu manaso'u belak sila la fepa malalau-maoono ndia langa na, boema ala usin ne'un ma ala dodoki-aalin.

⁵Osi lamatuak ndia, ana haitua seluk malalau-maoono fe'en esa neu bai. Tehu ala taolisa malalau-maoono ndia. Ala tao leondiak lakandoo neu malalau-maoono fe'ek ba'u ka boe. Ala fepa-li'u nggelok ma ala taolisa nggelok boe.

⁶Besak ia, osi lamatuak ndia ana haitua seluk see ka neu bai? Bei ela ka'da hataholin esa so, fo nde ana bongi susue na. Da'di, neu mate'e na boema, ana haitua ana susue na neu leo manaso'u bela kala neu. Ana dodoo nai dalen dale nae, ‘Tao leo bee o, neukose ala fe ha'da-holomata neu au anang ndia.’

⁷Tehu manaso'u belak sila la esa nafa'da esa nae, ‘Ia nde hapu hata-heto nala, de mai fo ata taotisan leona, fo ita hapu hata-heton!’

⁸Boema ala ho'u la ni'iana ndia de ala taolisan. Ala tapaheni popolana leo osi ndia deak neu.”

⁹Boema Yesus natane nae, “Ade neukose osi lamatuak ndia tao beek? Tao leo bee o ana mai fo ana taonisa manaso'u belak sila la fo ana fe osi ndia neu manaso'u belak fe'ek bai.

¹⁰ Tao leo bee o, emi lees basa Susula Malalao ka lalanen esa nde ia nae, ‘Batu fo tuka uma la ta pake fa na, ana da'di batu fo makasososak so.

¹¹Ia nde Lamatua ka tatao-nono'in, lole na seli!’ ”

¹²Boema basa lasi-lasi leoina Yahudi fo mana mamanene nakandandaak ndia, ala sanga enok ho'u Yesus, nana ala bubuluk Yesus kokolak nakandandaak ndia, ana tu'da la'e sila nde ndia. Tehu ala bii hataholi makadoto kala. Da'di, ala la'oela Yesus.

¹³Ladenu hataholi Farisi de'ubee leme Herodes nakabubua na mai, fo leu lakahihi'ik Yesus ninik natatanek.

¹⁴Ala mai boema lafa'da Yesus lae, “Ama Mesen, ami bubuluk Ama manatao ndoos, ma Ama ta paluu pake hataholi hahapun fa. Ama manoli no mangale'dok la'eneu Manetualain hihii-nanaun neu hataholi daebafa ka, nana Ama ta mete matak fa. Naa, so'ba Ama mafa'da su'dik fe ami, ‘Tunga ita agama na nakanenete na soona, ade bole bae bea leo Kese la neu do ta? Ita muse bae bea do ta?’ ”

¹⁵Yesus bubuluk basa sila manadea-dale nala so. Boema nae, “Hu beek de emi sanga makahihi'ik Au? Matu'du su'dik fe Au, doi isi lilofulak esa.”

¹⁶Boema ala fen doi isi lilofulak esa. Boema Yesus natanes nae, “See mata aon ma na'den ia?” Boema lae, “Kese la,”

¹⁷Boema Yesus nafa'das nae, “Naa, metema leondiak soona, Kesel nuun bee soona fen leo Kese la neu, ma Manetualain nuun bee soona, fen leo Manetualai na neu.” Lamanene Yesus nae leondia boema, ala dodoo doa kana.

¹⁸ Hataholi de'ubee leme Saduki nakabubua na mai leo Yesus mai. (Hataholi sila la hahapu na lae, hataholi mana mate kala, neukose ta laso'da falik so'on.)

¹⁹ Boema lafa'da Yesus lae, “Ama Mesen, Musa sulak fe ita hoholo-lalane ka nde ia nae, ‘Metema touk esa maten, te ana ta bongi na fa, soona tolanoo na muse sao na inafalu ndia fo daenga ana bongi fe tolanoo mana maten ndia, tititi-nonosik.’

²⁰Hapu hai hataholi hitu, tolanoo kala. Ana ulu ka sao boema maten, tehu ana ta bongi fa.

²¹Basa boema ana kadua sao na ina manamate saok ndia boema maten, tehu ana ta bongi anak boen. Dede'ak ndia, ana da'di neu ana katelu a,

²²ma nakandondoohenin losa ana kahitu a leondiak boe. Neu mate'e na boema, inak ndia boeo maten.

²³Naa, neu faik fo hataholi manamate kala laso'da fali ka, see ka nde da'di inak ndia sao na? Nana tolanoo kahituk sila la, ala sao no'u inak ndia!”

²⁴Boema Yesus nae, “Emi manggangok manseli. Nana emi ta malelak Susula Malalao ka isi liin, ma Manetualain koasa na fa.

²⁵Nana metema hataholi manamate kala laso'da falik soona, neukose ala ta saoana so'on, tehu neukose laso'da sama leo ata nusa so'dak manai nusa so'da ka.

²⁶ La'eneu hataholi manamate kala laso'da fali ka, ade emi beita les mitan nai Musa susulan dale, la'eneu telas manapilak ndia fa? Nai lalanek sila la dalek, nanasulak nae, Manetualain nafa'da Musa nae, ‘Au nde Abraham Manetualai na, Isak Manetualai na, ma Yakob Manetualai na.’

²⁷Manetualain ndia, hataholi manamate kala Manetualain ta ndia fa, te hataholi maso'da kala Manetualain ndia. Emi menggangok manseli ia!”

²⁸ Boema mese agama esa ana mai nenene Yesus no hataholi maleme nakabubuak Saduki la hala-kokola nala. Mese agama ndia nita Yesus nataa basa hataholi sila la natatane nala no malole. Boema natane Yesus nae, “Paleta bee ka nde lenaheni basa paleta lala'ena?”

²⁹ Boema Yesus nae, “Paleta makasososa ka nde: ‘Mamanene leon, hei hataholi Israe la lemin! Ita Lamatuan Manetualain nde bee na Lamatua kisak.

³⁰Sue-lai emi Lamatuam Manetualaim ninik emi dale katematua ma, ninik basa emi ao paa samanem, ninik basa emi dudu'a-aafim, ma ninik basa emi be'i-balakaim lala'ena.’

³¹ Paleta kadua nde: ‘Sue-lai emi nonoo hataholi ma sama leo emi sue-lai emi aoina ma.’ Ta hapu seluk paleta fe'ek ba'ulena paleta kaduak sila la fa.”

³² Boema mese agama ndia nafa'da Yesus nae, “La'en la'iesa kana Ama Mesen! Memak hata fo Ama nafa'dan ndia, la'en: Lamatua ka nde Manetualain fo kisak, de ta hapu seluk Manetualain fe'ek so'on.

³³ Hu ndia de, hataholi daebafa ka muse sue-lai Manetualain ninik dale katematua na, ma ninik basa dudu'a-aafin ma ninik basa be'ibalakain lala'ena. Ma ana muse sue-lai nonoo hataholi na sama leo ana sue-lai aoina na boe. Ndia nde malole lenak neme fe tutunu-hohotu bana manu ma tutunu-hohotu fe'ek neu Manetualai na.”

³⁴Yesus nita mese agama ndia nataa no malole nanseli. Boema nafa'dan nae, “O mahehele aom basa da'di lima eik neme Manetualain hataholi kamahehele nala mai so.” Basa ndia boema, ta hapu hataholi esa boen napalani natane Yesus so'on.

³⁵Yesus bei nanoli nai Manetualain Uman te, natane nae, “Te tao le'e de, mese agama la lafa'da lae, Mane Mana Fe So'dak ndia, Dauk tititi-nonosin?

³⁶ Te se'kona Dauk boeo, hu ka nde Manetualain Dula Dale na hehela-nonolen de nafa'dan nae, ‘Amak Manetualain nafa'da au Lamatua nga nae: mangatuuk mai Au boboa kona nga losa Au tao a O musu noo mala lakaluku-lakatele leu O.’

³⁷Da'di metema Dauk noke Mane Mana Fe So'dak ndia nae, ‘Lamatuak’, soona da'di tao leo beek de, Dauk tititi-nonosin Mane Mana Fe So'dak ndia?” Hataholi makadotok manai Manetualain Uman sila la, ala hii lamanene Yesus nanoli.

³⁸Boema Yesus nafa'das nae, “Masanene'dak mese agama la. Nana ala hii ka'da pake la ba'du manalu nala fo ala kokook neu mai, ma ala hii ka'da hataholi la fes ha'da-holomata nai mamana nakabubua matua la.

³⁹Ala hii langatuuk lai mamana neulauk nai uma mamaso kala ma nai feta-dote.

⁴⁰Ala tipu-dai inafalu la, ma ala loso la uma nala. Ma soaneu lafunilisa sila tatao-nono'i mangalaun ndia de, ala hule-haladoi soona, nalu naseli. Hu ndia de, huhuku nala neukose bela ka!”

⁴¹Lelek Yesus nangatuuk nasasale matak no peti kolete manai Manetualain Uman dale, boema Ana taoafik neu hataholi manatu'u doi kolete leo peti ndia dalek neu. Nita hataholi kamasu'ik makadotok tu'u doi kolete ba'u ka leo peti dale neu;

⁴²boema nita inafalu nuu ta-hata tak esa, ana mai boe. Ana tu'u doi anamaa liti dua leo peti ndia dalek neu. Doik ndia beli na nai daeanak nanseli.

⁴³Boema Yesus nalo na ana mana tunga nala de nafa'das nae, “Taoafik neu dede'ak ia: Inafalu nuu ta-hata tak fo mana tu'u doi kolete leo peti ndia dalek neu a, beli na ba'u lenaheni basa hataholi fe'e kala tutu'u na.

⁴⁴Nana basa hataholi sila la, ala fe neme sila hata-heto lena nala mai. Te inafalu ndia, leomae nuu ta-hata tak nanseli, tehu ana fe la'iesak hata fo nanuu nana, nanahu ana paluu ka nde maso'da ka.”