Read Termanu MARKUS 14 Bible Online

MARKUS 14 - Termanu bible

MARKUS 14

¹ Bei faik dua seluk bai soona, Fai Paskah ma Feta Loti Lalu Tei Ta ka mulai. Lelek ndia, malanga ima mala lo mese agama la, ala sanga enok fo ala ho'u Yesus no denge-dengek fo taolisan.

²Lakokolaaok lae, “Tehu ata boso ho'un la'e fai feta, nana tao leo bee o tasi'bu da'di.”

³ Yesus bei nai Betania nai Simon uman, fo makahulu na ana hapu he'di lou mangalauk. Boema inak esa ana mai. Inak ia, nini mina kaboominik nai boto fulak esa dalek. Mina kaboominik ndia ala taon neme ai oka kaboomini ka mai. Ndia te, Yesus bei nangatuuk na'a. Boema inak ndia, ana tao ba'e boto ndia, de ana po'a mina kaboominik ndia neu Yesus langa na.

⁴Hataholi manai sila la, sila de'ubee lamanasa de esa kokolak no esa nae, “Sosoak hata, popo'a-ngganggangaheni mina kaboominik ndia?

⁵Mina ndia metema nase'on soona, beli na lena neme doi isi lilofulak natun telu, fo fe doi na leo hataholi nuu ta-hata ta kala neu!” Boema lamanasa inak ndia.

⁶Tehu Yesus nae, “Su'di inak ndia tao! Tao le'e de emi tao susa inak ndia? Ana tao hata esa malole naseli, ma nanakoa-kiok soaneu Au.

⁷ Hataholi nuu ta-hata ta kala, mandoo fai a lai emi tala'da. Metema emi nau soona, tunga faik emi hapu tulu-falis. Tehu Au ta sama-sama o emi tataas esa fa.

⁸Inak ia, ana tao basa hata fo ana hapu tao na so. Fai na beita losa fa te, Ana sadia basa Au natoi-natonong ninik ana po'a mina kaboominik neu au ao nga so.

⁹Mamahele leona! Te nai basa daebafa ka lala'ena nai bee boe, Manetualain Hala Malole na nanatui-bengak soona, inak ia tatao-nono'in boeo, neukose nanatui-bengak da'dileo nasanene'dak soaneun.”

¹⁰Boema Yudas Iskariot, fo hataholi esa neme Yesus ana manatunga kasanahulu dua nala neu leo malanga ima mala neu fo ana ke'dindiu Yesus.

¹¹Malanga ima mala lamanene Yudas hala nafafa'dan ndia boema, lamahoko lanseli de laheluk fo ala fen doik. Boema Yudas boeo, ana mulai sanga fai lelak fo ana ke'dindiu Yesus.

¹²Nai fai makasososa ka, fo nai Feta Loti Lalu Tei Ta ka, nai lelek fo hataholi la do'do bi'ilopo Paskah boema, Yesus ana manatunga nala latane Yesus lae, “Ama nau ami meu sadia fe Ama nana'a Paskah nai bee?”

¹³Boema Yesus nadenu ana manatungan dua nae, “Meu leo kota meu te nai ndia, emi matongo mo touk esa nini oe nai uleoe esa dalek, fo metema ana masok

¹⁴leo uma bee dalek neu soona, tungan leon fo mafa'da uma lamatuak ndia mae, ‘Ama Mesen natane nae, Ndia no ana manatunga nala sanga la'a nana'a Paskah de, mamana ka nai bee.’

¹⁵Neukose hataholi ndia natu'du fe emi kama matua esa nai lain. Lafafa'u matalolole basa kama ndia so, ma loulaa nala basa-basas manadai kala. Soona sadia basa-basas leu ndia leona.”

¹⁶Boema Yesus ana manatunga kadua sila la la'o leona. Ala losa boema, ala hapu basa-basan nandaa no Yesus hala kokola na. Boema ala sadia nana'a Paskah neu ndia leona.

¹⁷Le'odae boema, Yesus no ana manatunga kasanahulu dua nala ala mai.

¹⁸ Yesus no ana mana tunga nala langatuuk de la'a boema Yesus nae, “Mamanene dei, te hataholi esa nai emi dalek, besak ia na'a sama-sama no Au, neukose ana ke'dindiu Au.”

¹⁹Yesus ana manatunga nala lamanene dede'ak ndia boema, dale nala he'di sa lanseli. Boema esa-esak mulai natane Yesus nae, “Tao leo bee o Ama ta mafa'da au nde ndia fa hetu?”

²⁰Boema Yesus nae, “Hataholi ndia nde emi fo hataholi kasanahulu duak ia la esa, fo besak ia ami dua mi'a neu pingak esa.

²¹Memak Ana Hataholi ka neukose maten sama leo hata fo nanasulak nai Susula Malalaok dale. Tehu soe la'i esa kana, ba'eneu hataholi fo mana ke'dindiu Ana Hataholik ndia! Ba'eneu hataholi ndia, malolelenak metema ta nanabongik makandondook fa!”

²²Yesus no ana manatunga nala la'a boema, Ana ho'i na loti a de Ana hule-haladoi noke makasi neu Manetualain. Basa boema Ana tete'i loti ndia, de Ana fen neu ana manatunga nala ma nae, “Ho'i man fo mi'an leona, te ia nde bee na Au ao paa nga.”

²³Basa ndia boema, Ana ho'i na nggalaa angol esa de Ana hule-haladoi noke makasi neu Manetualain, boema Ana fe nggalas ndia neu ana manatunga nala. Basa boema basa basas linu angol ndia.

²⁴ Basa ndia boema Yesus nae, “Ia nde bee na Au daa nga, fo ana pakunisa Manetualain hehelu-balatan, daak fo nanapo'ahenik soaneu hataholi ba'u ka.

²⁵Mamahele leona! Te neukose Au ta inu seluk angol ia so'ok, losa lelek fo Au inu angol beu ka, sama-sama o emi nai Au Amang Daebafa Beun dale.”

²⁶Basa boema, lakamee nakamee kokoa-kikiok esa. De basa ndia boema, leu leo Pupuku Zetun-na lain leu.

²⁷ Basa boema, Yesus nafa'das nae, “Neukose emi malai la'oela Au. Nana nai Susula Malalaok dale nanasulak nae, ‘Neukose Manetualain taonisa manafoo na, fo bi'ilopo nala tapasasala.’

²⁸ Tehu Au aso'da falik soona, neukose Au akahuluk emi leo Galilea u.”

²⁹Boema Petrus nae, “Ta, leomae sila basa-basas la'oela Ama o, au ta alai la'oela Ama makandondook fa.”

³⁰Tehu Yesus naen nae, “Mafandendelek, te le'odaek ia boe, manu beita kokoa la'i dua fa te, o malelesi Au la'i telu so.”

³¹Boema Petrus nataa no balakaik nae, “Leomae au muse mate sama-sama o Ama boeo, au ta alelesi Ama makandondook fa!” Yesus ana manatunga fe'e nala boeo, lafa'da lae leondia.

³²Ala losa mamanak esa na'de Getsemani boema, Yesus nafa'da ana manatunga nala nae, “Emi mangatuuk meme ia, te Au sanga u hule-haladoi.”

³³Boema Yesus leleko no Petrus, Yakobis, ma Yohanis de leu sama-sama. Ana mulai name'da dale na he'di sa, ma dale na ta tesa-tama fa.

³⁴Yesus nafa'das nae, “Au dale nga he'di nanseli. Au ame'dan sama leo Au sanga mate. Ela emi mahani meme ia fo manea!”

³⁵Yesus neu leo uluk neu doo-doo ana faa boema, ana bala neu dae lain de Ana hule-haladoi. Nai huhule-haladoin dale, Ana noke nae, metema da'di soona, Ana boso la'ola'di doidosok ndia.

³⁶Ana hule-haladoi nae, “Ama, ou Ama, ta hapu hata esa boen fo Ama ta hapu tao nala fan. So'u ma doidosok ia neme Au a mai. Tehu boso tunga Au hihii-nanaung, te tunga ka'da Ama ka, hihii-nanaun.”

³⁷Basa ndia boema, Yesus fali ma'in te nita ana manatunga nala sungu. Boema nafa'da Petrus nae, “Simon, o sungu do? O ta hapu manea ka'da li'u esa boen do?”

³⁸Boema Yesus nafa'das nae, “Manea, ma hule-haladoi leona, fo ela emi boso hapu soso'ba-susu'dik. Memak emi dale ma nahiik tao ndoos, tehu emi ta mabe'i fan, nana hataholi daebafa ka hihii-nanaun tapandoes.”

³⁹Yesus neu hule-haladoi la'iesa seluk. Ana bei kokolak dede'a kokolak fo na'ka sa Ana kokolak ndia.

⁴⁰Basa ndia boema, Ana fali seluk leo ana manatunga nala neu te, nitas ala bei sungu, nana mata nala nduak lanseli. Hu ndia de, ala ta bubuluk lafa'da Yesus lae le'e fa.

⁴¹Lelek fo Yesus fali ma'in neu kala'i telu na boema, nafa'das nae, “Ade emi bei sungu fo emi hahae ao mala do? Dai so! Fai na losa soaneu Ana Hataholi ka nanafek leo hataholi masala-masingo kala liman dale neu.

⁴²Fo'a fo ata la'o leona. Mete leona! Te hataholi mana ke'dindiu Au a, ana mai so!”

⁴³Lelek fo Yesus bei kola-kola te Yudas, fo hataholi esa neme Yesus ana manatunga kasanahulu dua nala, ana mai no hataholi makadotok, ala ho'u tetafa ma ai keke'uk. Malanga ima mala, mese agama la lo lasi-lasi Yahudi la nde ladenu sala.

⁴⁴Tou manake'dindiu ka nafa'da basas ta'du tana esa nae, “Au de'i see soona, Hataholi nde ndia so. Ho'u man fo mon, ma manea matalololen.”

⁴⁵Yudas mai tutika nakandoo leo Yesus neu de nafa'dan nae, “Ama Mesen!” basa boema, ana de'i Yesus.

⁴⁶Boema hataholi manamai sama-sama lo Yudas-sa, ala ho'u la Yesus de ala hengen.

⁴⁷Tehu hataholi esa nai ndia, ana fe'a na ta'faina na de ana ta'ti imam matuaina ata na, losa ketuheni di'idoo na.

⁴⁸Boema Yesus nafa'da hataholi manamaik sila la nae, “Ade Au ia hataholi mangalauk, de nalosa emi mini tetafa ma ai keke'uk fo mai ho'u Au?

⁴⁹ Tunga faik Au anoli nai Manetualain Uman dale nai emi matam, te emi ta ho'u Au fa. Tehu memak muse leondiak, fo ela hata fo nanasulak nai Susula Malalaok dale, ana da'di leona.”

⁵⁰Basa Yesus ana manatunga nala lalai la'oelan mesa kana.

⁵¹Ta'eanak esa nalu'e ka'da temak bibiak esa, ana tunga Yesus. Hataholi la sanga ho'un,

⁵²tehu ana nggaliheni tema bibiak ndia de, nalai no makaholak.

⁵³Ala lo Yesus leo imam matuaina uman neu. Basa malanga ima mala, lasi-lasi Yahudi la, ma mese agama la lakabubua nai ndia so.

⁵⁴Ndia te, Petrus tunga Yesus neme doo ka mai, losa ana masok leo imam matuaina uma so'da na. Boema nangatuuk namanelu ha'i sama-sama no manamanea la.

⁵⁵Malanga ima mala ma basa mana Maketu-mala'di Agama Matua la sanga enok fo sue ka nde ala hapu Yesus sala na, fo ala hapu laketu hukulisa Yesus. Tehu ala ta hapu Yesus sala na fa.

⁵⁶Lalo sakasii makadotok fo ala fe sakasii pepekok soaneu Yesus, tehu hataholi sila tutui nala, esa ta ndandaa no esa fa.

⁵⁷Boema sakasii de'ubee lai ndia, ala fo'a lapadeik de ala fe sakasii pepekok la'eneu Yesus lae,

⁵⁸ “Ami mamanene hataholi ia nafa'da nae, ‘Neukose Au tao atu'u Manetualain Uman fo hataholi daebafa ka nde taon ia, fo basa faik telu soona, neukose Au apadedeik uma fe'ek esa, fo hataholi daebafa ka ta nde tao nana fa.’ ”

⁵⁹Tehu hataholi sila la tutui nala boeo, esa ta ndandaa no esa fa.

⁶⁰Boema imam matuaina napadeik neu basa-basas mata nala, de natane Yesus nae, “Ade O ta mataa basa dede'a kalaak fo ala kalaa kana neu O ia fa do?”

⁶¹Tehu Yesus ka'da denge-denge. Ta nataa makandondook fa. Boema imam matuaina natane la'iesa selu kana nae, “Ade O nde Mane Mana Fe So'dak, fo Manetualain Malalao-Malalafu ka, Ana na do?”

⁶² Boema Yesus nae, “Au nde Ndia so. Neukose emi mita Ana Hataholi ka nangatuuk nai Manetualain Fo Mana Koasa boboa kona na, ma neukose Ana mai nai ko'as dale, neme lalai mai!”

⁶³Boema imam matuaina namanasa, de ana sisii-lulu'i bua papake na, ma nafa'da nae, “Ta paluu sanga sakasii seluk so'on!

⁶⁴ Emi mamanene matam, dede'a kokolan fo nakamumulu-nakamamaek Manetualai na so, de besak ia emi nakeketu ma leo beek?” Tutika basa-basas fe nakeketuk lae, Yesus nasala-nasingo de nandaa hukunisan.

⁶⁵Boema hataholi de'ubee lai ndia, ala mulai tupee lakadoe Yesus ape, ma ala potiketu mata na de ala fepan, boema lafa'dan lae, “So'ba neuk su'dik, see ka nde fepa O a?” Manamanea la boeo ala fapa Yesus.

⁶⁶Ndia te Petrus bei nai uma so'da na, boema imam matuaina malalau-maoono inan esa, neu leo ndia neu.

⁶⁷Lelek fo nita Petrus namanelu ha'i, tutika ana taoafik matalolole Petrus mata panan boema nafa'dan nae, “Ade o boeo sama-sama mo Yesus, fo hataholi Nazaret ndia boe hetu?”

⁶⁸Tehu Petrus nalelesi nae, “Au ta bubuluk o dudu'am ndia nae leo bee ndia fa.” Petrus nafa'da ina malalau-maoono ndia nae leondia. Boema Petrus leo imam matuaina ndia lelesu ina na neu. [Nai hatematak ndia boe, manu kokoa.]

⁶⁹Ina malalau-maoono ndia nita seluk Petrus boema, nafa'da hataholi manai sila la nae, “Memak hataholi sila la esa nde hataholi ia boe!”

⁷⁰Tehu Petrus nalelesi seluk. Dodoo faa boema, hataholi manai sila la lafa'da seluk Petrus lae, “Boso boe malelesi bai te, memak hataholi sila la hataholin esa nde o so, nana o meme Galilea mai boe!”

⁷¹Boema Petrus mulai soo-supa ma nafa'da nae, “Au ta alelak hataholi fo emi mafa'dak ndia fa!”

⁷²No hatematak ndia boe, manu kokoa la'i telu. Boema Petrus nafandele na Yesus nafada basan nae, “Manu beita kokoa la'i dua fa te, o malelesi Au la'i telu.” Boema Petrus kii-nasakeke'du.