Read Termanu MARKUS 15 Bible Online

MARKUS 15 - Termanu bible

MARKUS 15

¹Balahaa fafaianak boema, no lai-laik basa mana Maketu-mala'di Agama Matuaina lala'ena lo malanga ima mala, lasi-lasi Yahudi la ma mese agama la lakokolaaok fo ala henge Yesus, de basa boema lon leo Pilatus neu.

²Boema Pilatus natane Yesus nae, “Tete'e ka, hataholi Yahudi la mane na nde O hetu?” Boema Yesus nae, “O nde kokolak mae leondia.”

³Malanga ima mala kalaak dede'ak makadotok neu Yesus.

⁴Boema Pilatus nafa'da seluk Yesus nae, “So'ba mete su'dik, ala kalaak O dede'ak de'ubee nde ndia! Ade O sanga kokolak hata esa do?”

⁵Tehu Yesus ta nataa makandondook so'on, de nalosa Pilatus dodoo doa kana.

⁶Tunga ha'da ka, fo metema Feta Paskah losa soona, ta bole nae ta Pilatus po'i hataholi nanahukuk esa, tunga hataholi ba'u hehele na.

⁷Ndia te ala huku hataholi manatao tasibu esa nai bui dale, na'de Barabas, fo hataholi ia ana taonisa hataholi nai lelek ala tao tasibu nai kota ndia.

⁸Hataholi makadotok lakabubua de loke Pilatus, fo ana po'i fes hataholi nanahukuk esa, sama leo sila ha'da na.

⁹Boema Pilatus natanes nae, “Ade emi nau au po'i fe emi, hataholi Yahudi la mane na do?”

¹⁰Nana Pilatus bubuluk basa, hu ka nde nape'da dale ka de, malanga ima mala fe Yesus leondia neu.

¹¹Tehu malanga ima mala dudungu-papau hataholi makadoto kala, fo loke Pilatus po'i fes Barabas.

¹²Boema Pilatus nafa'da seluk hataholi makadotok sila la nae, “Metema leondiak soona, au muse tao leo beek neu hataholi fo emi moken mae, hataholi Yahudi la manen ndia?”

¹³Tehu ala eki ma lae, “Lona-nggangen!”

¹⁴Boema Pilatus nae, “Tehu ana tao mangalau bee ka?” Boema ala eki lapane'e seluk lae, “Lona-nggangen!”

¹⁵Pilatus nau tao namahoko hataholi makadotok sila la dale na de ana po'i fes Barabas. Basa boema, nadenu hataholi la filuk Yesus, boema ana fen neu fo ala lona-nggangen.

¹⁶Solda'du la lo Yesus leo gobelno la uma na so'da na. Basa boema, lalo lakabubua basa solda'du la.

¹⁷Boema ala papake Yesus ninik ba'du manalu pilabalanggeok, de basa boema ala ane la ti'ilanga nggauk esa de ala paken neu Yesus langa na.

¹⁸Basa ndia boema ala hakinonoli Yesus. Boema late'an ma lafa'da lae, “So'dak ba'eneu hataholi Yahudi la Mane na!”

¹⁹Basa ndia boema, ala fepa Yesus langa na ninik aitete'ek, boema ala mu'di lakadoen ape, ma ala sene-do'ok leu mata na.

²⁰Ala hakinonoli basa Yesus boema, ala o'duheni ba'du manalu pilabalanggeok ndia, de ala o'du falik bua-lo'a papake na ne'un. Basa boema, lon leo deak neu, fo leu lona-nggangen.

²¹ Ala losa eno tala'dak boema, lakaseti la hataholi esa de ala fen lu'a Yesus ai nggange na. Hataholi ndia, besa ka neme nggolo ka mai, fo ana sanga neu leo kota neu. Hataholi ndia na'de Simon, neme Kirene mai fo Aleksander no Rufus aman.

²²Lo Yesus losa mamanak esa na'de Golgota, fo sosoa na nae, “Mamana Langaduik.”

²³Boema ala fe Yesus ninu angol nanasese'do laluteik, tehu Yesus ta nau ninu angol ndia fa.

²⁴ Basa boema, ala lona-nggangen de ala baba'e bua-papake na. Ala tu'u batu fo sue ka nde laketu esa-esak baba'en.

²⁵Ala lona-nggange Yesus la'e li'u sio fafai na.

²⁶Nai Yesus ai nggange na nisilai na, ala pasak papak esa, de ala sulak susula kalaak neu Yesu sa isi-liin nae, “Hataholi Yahudi la, Mane na.”

²⁷Ala lona-nggange Yesus sama-sama no hataholi manabonga uma dua, de esa nai Yesus boboa kona na ma esa nai Yesus boboa kii na.

²⁸ Dede'ak ndia ana da'di, fo ela nandaa no hata fo nanasulak nai Susula Malalaok dale nae, “Ala taon da'dileo hataholi mangalauk.”

²⁹ Basa hataholi manala'ok tunga mamanak ndia, lakakale langa ma lakamumulu-lakamamaek Yesus lae, “Hee, O nde nau tao matu'u Manetualain Uma na, fo O mafofo'a fali kana, ka'da nai faik telu dale na hetu.

³⁰So'ba O kona su'dik meme ai nggangek ndia lain mai, fo O maso'da leona!”

³¹Leondiak boe, malanga ima mala lo mese agama la hakinonoli Yesus. Esa nafa'da esa nae, “Ana soi-tefa na hataholi fe'e kala, tehu Ana ta hapu soi-tefa na aoina na fa!

³²Metema hataholi Israe la mane na nde Ndia, fo Mane Mana soi-tefa ka soona, malolelenak besak ia, Ana kona neme ai nggangek ndia lain mai, fo ela ami mita ma ami mamahelen leona!” Hataholi nanalona-nggangek sama-sama lo Yesus sila la boeo, lakamumulu-lakama maek Yesus.

³³Le'dohana boema, makahatu ka poti na nusak ndia lala'ena, dodoo na li'u telu.

³⁴ Li'u telu le'donoso na boema, Yesus nggasi napane'e nae, “Eloi, Eloi, lama sabakhtani?” fo sosoa na nae, “O Au Manetualai nga, Ou Au Manetualai nga, tao le'e de O la'oela Au?”

³⁵Hataholi manai sila la, de'ubee lamanene ngganggasik ndia boema, ala bekola lae, “Mamanenen dei, te nalo Elia!”

³⁶ Boema hataholi sila la esa lai-lai neu ho'i buebunak, de ana dopen leo angol makeis dale neu. Basa boema ana ko'fu bue bunak ndia neu ai ndanak esa pe'da na, de ana lo kana leo Yesus difadoo na neu, ma nae, “Tahani fo, ata mete su'dik fafa'kama, Elia mai nakonan neme ai nggangek lain mai do.”

³⁷Boema Yesus nggasi tutika maten.

³⁸ Temak fo nanalonak nai Manetualain Uman dale a, tatiba'en neu dua neme lain losa dae.

³⁹Malanga solda'du matua fo napadeik nai ai nggange ka mata na, nita Yesus mate tao leo beek. Boema malanga solda'du matua ndia nae, “Memak tete'e ka, Manetualain Anan Hataholi ia!”

⁴⁰ Ndia te, inak de'ubee lai ndia boe. Tehu ala mete basa manda'dik sila la leme doo ka mai. Nai inak sila la dalek, hapu Salome, Maria Magdalena, ma Yakobis fo bei muli-soluk ndia inan Maria, ma Yoses.

⁴¹Inak sila la nde tunga ma tulu-fali Yesus, nai lelek fo Yesus bei neme Galilea. Boema bei hapu ina fe'ek ba'u ka seluk lai ndia. Fo inak sila la sama-sama lo Yesus leo Yerusalem leu.

⁴²Yusuf neme Arimatea mai te, sanga nae makahatu so. Yusuf ia nde bee na, mana Maketu-mala'di Agama Matua lima ein. Hataholi la fe ha'da-holomata neun. Yusuf ia boeo, bei nahani fai na losa, Manetualain mulai paleta sama leo Mane ka. Faik ndia, fai sadiak. Faik fo fai Saba ta beita losa fa. Hu ndia de no napalanik, Yusuf neu leo Pilatus neu, fo noke Yesus popola na.

⁴³

⁴⁴Pilatus namanene lae Yesus maten so, boema ana dodoo doa kana. Hu ndia de, nadenu hataholi leu lalo malanga solda'du fo natanen, ade Yesus maten doo ka so do beik.

⁴⁵Pilatus namanene basa malanga solda'du matua ndia hala nafa'da na boema, ana po'i Yusuf neu nakona na Yesus popola na.

⁴⁶Boema Yusuf neu asa tema mamates fula aba lutu fo nakona na Yesus popola na soona, ana popoti-papalu nini kana. Basa boema, neu natoi Yesus popola na nai lates esa dalek, fo ala kali lates ndia nai lete batu esa poi na. Natoi basan boema, ana loli na batu matuaina esa de ana tatanan neu bolo ka bafa na.

⁴⁷Ndia te, Maria Magdalena ma Yoses inan Maria, ala taoafik matalole, ala tao Yesus popola na nai bee.