Read Termanu MARKUS 16 Bible Online

MARKUS 16 - Termanu bible

MARKUS 16

¹Lelek fai Saba ta seli boema, Maria Magdalena, Maria, fo Yakobis inan, ma Salome, leu asa bunga henasina, fo leu nggali neu Yesus late na.

²Fafaianak, lelek le'do tii fo fai makasososa ka nai mamasok ndia dale na, boema ala leo lates leu.

³Ala losa eno tala'dak boema, esa kokolak no esa nae, “See nde tulu fali ita fo ana loliheni batu nanatatanak manai late sa?” Nana batu ndia ba'u naseli. Tehu ala losa lates te, lita batu ndia nanalolihenik so.

⁵Boema lakandoo leo lates dale leu. Nai lates dale, fo nai late sa boboa kona na, lita hataholi muli-soluk esa, ana pake ba'du manalu fulak nagatuuk nai ndia, boema ala nggenge la.

⁶Tehu hataholi muli-soluk ndia nafa'das nae, “Boso bii! Au bubuluk emi mai sanga Yesus hataholi Nazaret fo nanalona-nggange ka. Ta nai ia so'on. Naso'da falik so! Mete mitak mamana nangapepe'u na nde ia dei.

⁷ Besak ia meu leona, fo manduku-malosak halak ia neu ana manatunga nala, boema Petrus boe. Mafa'das mae, ‘Ana la'o nakahuluk neme emi leo Galilea neu. De neukose emi mitan nai naa, sama leo hata fo nafa'dan neu emi.’ ”

⁸Boema ala kalua leme lates dale mai de lalai, nana nggenggenge ka ma bibii ka. Ta lafa'da hata-hata neu hataholi esa boen.

⁹Yesus naso'da falik basa neme mamate sa mai boema, mamasok fafaiana na natu'du aoina na makasososa neu Maria Magdalena. Yesus kaluaheni hai, dula dale mangalauk hitu neme Maria ndia aon dale mai so.

¹⁰Boema Maria Magdalena neu nafa'da manda'dik ndia neu Yesus tia-lai nala. Ndia te Yesus tia-lai nala bei falu ma ala kii makaleleu.

¹¹Lelek fo lamanene Yesus naso'da falik ma Maria nitan so, tehu ala ta lamahele fa.

¹²Basa ndia boema, Yesus natu'du aoina na neu ana manatungan dua, tehu eno na fe'ek bai. Manda'dik ndia ana da'di nai lelek fo hataholi kaduak sila la bei bela'o leo nggolok esa leu.

¹³Boema ala fali ma'is de lafa'da manda'dik ndia neu nonoo fe'e nala. Tehu ala ta nau lamahele fa.

¹⁴Neu mate'ena boema, Yesus natu'du aoina na neu ama manatungan sanahulu esa, nai lelek fo la'a-linu. Yesus nabengas nana namahehele nala beita dai fa, boema langa batu nala seli, de nalosa ta lamahele hataholi manita matan Yesus naso'da fali ka tutui na fa.

¹⁵ Boema Yesus nafa'das nae, “Meu leo basa daebafa ka lala'ena meu, fo tui mamaloloa Manetualain Hala Malolen ndia neu basa hataholi daebafa ka lala'ena.

¹⁶Hataholi see ta namahele fa soona, neukose nanahukuk. Tehu hataholi see namahele fo salanin soona, neukose ana hapu so'da ka.

¹⁷Fo ana da'di buti esa nae, sila lamahele soona neukose ala usiheni dula dale mangalau kala ninik Au na'de nga. Neukose ala kokolak lalelak dede'ak fo ala ta lalela kana fa.

¹⁸Metema ala ho'u menge do linu laso soona, neukose ala ta hapu susa-soe fa. Metema ala lalaa lima nala neu hataholi kamahe'di sala lain soona, neukose hataholi kamahe'dis sila la ala lea-hai.”

¹⁹ Lamatuak Yesus kokolak basa nos boema, Yesus nanaso'uk leo nusa so'da ka neu. Nai naa, Ana paleta sama-sama no Manetualain.

²⁰Boema ana manatunga nala leu tui lamaloloa halak maneme Manetualain mai, leo basa mamanak lala'ena neu. Lamatua ka boeo Ana toa-no'i sama-sama nos, fo nananatu'duk tunga, ala tao manda'di beu kala. Fo dede'ak ndia, ana da'di ta'du esa nae, sila tutui-bebengan memak tete'ek-ka.